((لا أحد يهتم أن كنت تعيس
لذا يمكنك كذلك أن تكون سعيد ))
-
كينثيا نيلمس
Celine's P.O.V
- سيلين : تعااي أسماء الناجحين معلگيها هنا
- زهراء : يي أحسن حتة منشوف مقرر القسم والعميد .
- سيلين : يي عفية ، زهراء أسمي موجود ؟
- زهراء : ما ادري بعدني دا أدور على اسمي
جريت نفسي بالگوة ورحت وگفت گدام اللوحة دا اقرة اسماء الناجحين . لو ما زهراء وياية ولا أصلا اگدر أوصل للكلية .
- سيلين : زهراء بربج شوفي أسمي وياج
- زهراء : حسب إذا نتيجتي أني مصيفة ع الدور الثاني تسحلين نفسچ وتشوفين نتيجتج
- سيلين : واذا ناجحة ؟
- زهراء : هم تسحلين نفسچ و تشوفين اسمچ
- سيلين : لا عفية والله گلبي ميتحمل إلى أن أعرف نجحت لو لا
- زهراء : يي هياتني اسمي !! نجحت !!
وبدت تگمز وترگص بنص الکلية مثل الهبلة ، عزة شنو هالاحراج يعني عدها تصرفات كارثة زهراء
- سيلين : كافي خزيتينة
- زهراء : عيني ناجحة اني ناجحة يعني خلص صرت صيدلانية !
- سيلين : أي أحد يشوفج هسة اگولهم هاي مو وياي
- زهراء : مو وياج مو ؟ لعد تعاي شوفي اسمچ
- سيلين : لا حبيبي زوزو رگصي وتعاي ارگص وياچ مبروك النجاح
- زهراء : عند المصالح تأتي الكلاب
- سيلين : امشي يلة ولي لابو المصالح مالتچ . خل اشوف اسمي
بديت اقرة اللوحة واشوف اسماء اللي حيصيفون ع الدور الثاني يممة بس لا اني منهم حتة ماما بعد مدخلني للبيت .. سين سين ... آه هياتنة حرف السين .. سارة .. سرى ... سرمد ... سيلين ناجح تقدير جيد .. ناجحة . ناجحة ... ناجحة !!
- سيلين : ناجحة !! ههااهي!
- زهراء : طبعا عيني سعياتچ اربعينات عدلة
- سيلين : قل اعوذ برب الفلق .. نجحت زهراء خلص صرنة صيادلة !
- زهراء : اخيرا خلصنة من ذلة دكتور كامل النگس
حضنتني زهراء وأني من الفرحة أريد أركض واعيط وادخل غرفة الدكاترة اصيح نجحت يا سفلة خلصت منكم .
- زهراء : امشي نطلع نحتفل
- اني عازمتكم
- سيلين : مريم... ها حتعزمينة يعني اكيد ناجحة
- مريم : يي ناجحة لج تخيلي دكتور كامل حاطلي تقدير جيد جدا ..
- سيلين : لعد شبيه النگس اني يحطلي متوسط ومقبول
- طيبة : يابة شگد جان يكرهچ
- زهراء : تذكرون من لگفهة تقرة روايات ب محاضرته
- طيبة : هههه يي عزة وتگله اصلا اني كلشي مدا استفاد
- سيلين : خل يطير النگس طردني برة . هسة هيچ هيچ اني مدا استفاد من محاضرتك وفوگاها عبالة طردني يعني حزعل لو عقوبة
- مريم : هاچ استلمي وتگول ليش يكرهني
- سيلين : معلينة بيه ما أريد انكد اني ناجحة .. وين حتعزمينة مريم ؟
- مريم : كيفكم . تريدون صاج الريف لو بيستون صمد
- طيبة : لا امشوا نروح ل بابا روتي
- زهراء : يي عفية أريد حلاة بهاي المناسبة السعيدة
- طيبة : بس اوگفوا خل نأخذ صور هنا بمناسبة النجاح وراها نروح
طگينا صور كومة صور .. وراها رحنة ل بابا روتي اللي بالعرصات . الطريق كله مريم مشغلة (جيناگ بهاية) واحنة نغني وياها . طبعا فرحة هذا اليوم متنوصف انه أخيرا هاهية خلصنة من الدراسة وقرفها . وصلنا ل بابا روتي
- مريم : يلة شتريدون ؟
- طيبة : كييك
- زهراء : اني هم أريد كييك
- سيلين : أي شي وياكم
- زهراء : لج ممصدگة خلص بعد ها هية ماكو دراسة ولا امتحانات ولا أبد
- طيبة : يي وترة زين اني نجحت بتقدير جيد جدا ومريم تقدريها جيد وانتوا
- سيلين : اني تقديري جيد
- زهراء : هاي شنو لعد بس اني تقديري متوسط
- سيلين : أحم أحم منو بأمتحانات المدتيرم راح يفرفر بالمولات
- زهراء : أحم أحم منو چان وياي غيرچ
- طيبة : يا نگسيين جنتوا اطلعون بدون متگولولي
- زهراء : ولي انتي سچاچة قابل چنتي حطلعين
- مريم : يي ع شنو دتحچون؟
- طيبة : دنحچي ع فرحة هذا اليوم
- سيلين : هي أكبر فرحة خلصنة من دكتور كامل و الباقي كلة يهون
- زهراء : لچ عيني بعد نطلع ونطب براحتنة ونتعين عيني .. خلص صرنة رسميا انسات مجتمع
- طيبة : اذا انتي انسة المجتمع خلص ضاع المجتمع
- زهراء : ايبااه عساس انتي شونچ
- مريم : شبيكم شو كلش فرحانين وهيچ مدري الفرحة مدتلزمكم
- سيلين : تخرجنا من الكلية اكو فرحة أكبر مني هيچ ؟
- مريم : تخرجنا عوانس
- طيبة : باع هاي شنو همها
- مريم : لا جديات .. صارلنة 5 سنين بالكلية مطلعنالنة بعريس
- زهراء : عفية بيچ نكدي علية فرحتي
- مريم : اني شنو همة دائما يگولون بالكلية اذا منخطبتي تعنسين
- سيلين : أمداچ هاي صدگ تحچين
- طيبة : لا انخطبنة وي اللي نخطبوا و لا كبلنة وي اللي كبلوا
- سيلين : امداکم اصلا اني أنتظر الحب يلة ازوج
- زهراء : من ورة حچايتچ هاي عنسنه
- سيلين : بلة منو جان خابصني ب شاروخان والحب والافلام الهندية
- زهراء : ده كان زماان
- طيبة : باع شفتحوا موضوع انوب شحيخلصنا من زهراء وشاروخان هسة
ظلوا يسولفون بهاي الأمور التعبانة مالتهم اني مگدرت طلعت تلفوني وفتحت وات باد . احسن شي سوته آسياسيل هو سبيدو .. حتة اگدر افتح وات باد شوكت ما أريد . بعدني حت مفتحت الرواية جان زهراء تجر من أيدي التلفون
- سيلين : يممة ابني جيبيه
- زهراء : شدسوين واحنة طالعين وي حضرتچ
باعت ب تلفوني دشوف شدا اسوي
- زهراء : وات باد فاتحة وات باد ..
- سيلين : يي عيني فاتحة وات باد
- طيبة : محد ضيعنة غير الوات باد مالچ
- زهراء : يي تجي تسولفلي ب ذولي الأبطال الصاكين اللي يخبلون
- سيلين : يمة الحب يمة
- زهراء : ولي انتي والحب مالچ .
- مريم : بعدچ تقرين بهالروايات
-سيلين : مدري شبيكم وياها شمسويتلكم الروايات اللي أقراها
- طيبة : زهراء انطيها التلفون بلة سخافة
- سيلين : باعوا هي هاي الناس اللي تفتهم
- طيبة : اليوم أخر يوم نتشاوف بيه غير نتونس شوية
بعد ما أكلنة وسولفنة وبچينة كومة لان اخر يوم نتشاوف بيه . وصلتني مريم لبيتنا .
دخلت للبيت شفت أمي وأبوية گاعدين بالصالة وياهم أخوية الصغير ميار ديتفرجون تلفزيون .
- سيلين : اني جييت
_ أم سيلين : ها بشري ؟
- سيلين : ناجحة بتقدير جيد
-أم سيلين : الف الحمد الله والشكر الك ربي .
- ابو سيلين : ها بنتي البطلة أكيد تنجح . يلة شتريدين هدية نجاح ؟
- سيلين : احنة مو متفقين سيارة ؟
- ابو سيلين : السيارة هدية النجاح وحد . هذي هدية التقدير جيد
من الفرحة مگدرت الا رحت وحضنته ل بابا
- سيلين : يمة فديتة ﻷبوية
- ابو سيلين : يلة شتريدين ؟
-سيلين : أخذنا اليوم هيج طلعة عائلية نروح نتغدة برة
- ابو سيلين : بس ؟
- سيلين : يي بس
- أم سيلين : مو سويت غدة
- سيلين : ماما حبيبتي خل نغير جو ميخالف عود نتعشه بيه
- ابو سيلين : تمام روحي گولي لخواتچ خل يحظرون نفسهم
- سيلين : تمام
ركض صعدت لغرفهم فوك اني عندي 4 خوات و اخوة اثنين أو بالأحرى غضب نازل على رأسي لأن اني أكبرهم .
دخلت ع غرفتي اول ذبيت غراضي انوب رحت على غرف خواتي دا اگعدهم بس ملگيتهن ولا وحدة بيهم موجودة بغرفتها . گلت اروح أسأل محمد اكيد يدري
- سيلين : محمد مشفت ...
وقبل لا أكمل شفتهم كلهم مسوين إقامة بغرفة محمد المسكين وكلهم نايمين
- سيلين : گوموا گوموا تنابل ساعة وحدة الظهر
- كنار : يبوو رجعت الخاتون
- نياز : عوفوني انام حرام عليكم مصارلي يومين من خلصت
- شرمين : ششش بلا صوت دنام
- سيلين : گوموا بابا شگد ناوين تنامون
- نياز : شعندچ جيتي مو حطلعين وي صديقاتچ
- سيلين : مو صوچكم وربي .. ثانيا شعدكم بغرفة محمد كلكم ؟
- ميديا : البارحة سهرنة ع فلم رعب وغفينة هنا
- سيلين : يا حيوانات بدوني
- كنار : منو خبصنة عوفوني حروح للكلية عوفوني باجر نتائج لحد يحجي وياي
- سيلين : اني هيج سويت ؟
- شرمين : يي انتي
- سيلين : گوموا يلة گوموا لموا هذا الفراش .. عدلوا هاي الهوسة وراها روحوا بدلوا بابا حيغدينة برة
- نياز : چذاببة
- سيلين : يي وربي
- كنار : شعجب ؟
- سيلين : بمناسبة نجاحي عيني
- شرمين : شنو هالتفرقة اني هم نجحت شو معزمنة بمناسبة نجاحي
- كنار : بابا انتي نجحتي بالابتدائي وفوگاها توسطنا يم المعلمة مو زين نجحتي ..
- شرمين : يي فوگ ما أنجح لازم تحتفلون بية
- كنار : يي نجاح واسطات .. كردية بابا انتي
- سيلين : ترة تقنيا كلنة اللي بالغرفة أكراد
- كنار : يي مو مهم المهم المثل
- سيلين : يلة گوموا وميديا گعدي محمد اكيد دوخوه ذني سودة بوجهي شلون نايم هنا
- نياز: باع التفرقة باعي
- سيلين : يلة نص ساعة انتوا مخلصين
طلعت من الغرفة .. هذي اللي يصير بيچ من عندچ هواي خوات . رحت لغرفتي بدلت هدومي ركض همزين حاطة مكياج بس عدلته وعدلت شعري انوب دخلت علية نياز
- نياز : عفية سيلين بدلي ل ميار ما طول انتي مخلصة
- سيلين : تمام هسة ابدله انتي روحي كملي
هذي حياتي 6 أخوان أصغر مني . نياز اللي هي من بعدي خريجة سادس علمي و حتبدي اول كلية عمرها 18 . بعدها ميديا و محمد اخواني التوم بنية و ولد عمرهم 14 . بعدها كنار العمر 12 .. انوب شرمين 9 سنوات وآخر العنقود ميار عمره شهرين يمكن ما ادري من نولد جنت مشغولة بالامتحانات . أحس نفسي عايشة بروضة والنبي .
نزلت أخذت ميار بدلتله واخذته وياي . رديت نزلت يم ماما و بابا علما يخلصون البنات .
- ابو سيلين : ايدنا و لل 3 ميخلصون
- كناري تعيط من فوگ : محد گللكم كعدنة قبل دقايق من الطلعة غير تگولون من الصبح
- سيلين : بس لتعيطين بدلوا وخلصوا يلة تنزلون
- نياز : عفية سيلين تعاي شوية
انطيت ميار لأمي وصعدت فوك
- سيلين : ها ؟
- نياز : حطيلي مكياج
- سيلين : هسة ؟
- نياز : يي هسة
- سيلين : خاف بابا يحجي
- نياز : شنو صرت أول كلية بعد شوكت احط مكياج
- سيلين : تمام تمام تعاي لغرفتي
- كنار : هاي شنو اني هم أريد
- نياز : بعدج صغيرة ولي منا
- سيلين : اششش فضوني بابا صاير عصبي
بعد هاي الهوسة كلها خلصوا أخيرا ورحنة للمطعم طبعا الطلعة كلها كنار و شرمين يتعاندون ويجادلون لو طالبة لابتوب بدال ما اأطلع ذولي الشكول ع الغدة . ورة ما خلصنا رجعنة للبيت بعدنة حت مفتنة جوة اندك الباب . فتح بابا الباب جان خالي أزاد بالباب هو و عائلته ، غريبة يجون هالوكت
