(( أن تكون مكروها لما انت عليه
أفضل من أن تكون محبوبا لما ليس انت ))
-
أندريا جيد
Aiaz's P.O.V
الفترة اللي فاتت سيلين تصرفاتها جدا غريبة يعني لدرجة متصدگ .. محسستني عايشين ب فلم مصري قديم ..
خلص الدوام وردت ارجع للبيت بس إذكرت سيلين گالتلي أمر أجيب نياز قبل لا أجي للبيت ، رحت لبيت عمتي بس دگيت الباب طلعتي جنطة عملاقة متحركة
- إياز : هاي شنو ؟
- نياز : هاي أشياء لازم اجيبها
- إياز : أدري حتهاجرين لبيتنة ترة ما بينة بس كم شارع
- نياز : لا اني ما أجي بس هاي الغراض اللي وصتني اجيبها سيلين
- إياز : ليش متجين ؟
- نياز : اسكت امي مستلمتني علمود النتائج
- إياز : ليش انتي يا صف ؟
- نياز : سادس علمي
رحت حطيت أيدي على چتافاتها
- إياز : صبرا ال ياسر أن موعدكم الجنة
- نياز : تعال قنع امي الجنة أهم من شهادة السادس
- إياز : انتي خايفة ؟
- نياز : لاع
- إياز : بالعين همين
- نياز : يب اني إحساسي مات
- أم سيلين : نيااااز !! منو بالباب ؟!
- نياز : هذا إياز أجة !!
- أم سيلين : هلا حبيبي إياز شلونك ؟
- إياز : هلا بيچ خالة الحمد لله انتي شلونچ ؟ أبو محمد شلونه ؟
- أم سيلين : الحمد لله كلنا بخير
- نياز : أبو محمد
- أم سيلين : أبوچ اسمه أبو محمد
- نياز : ليش ميصيحوله أبو سيلين
- أم سيلين : طبي جوة طبي جوة السادس مأثر عليچ
- نياز : لا خليني دا احچي وي إياز
- أم سيلين : بدال مگاعدة تسولفين شوفي النتائج
- نياز : أهووو رجعنة ع سمفونية النتائج
- أم سيلين : شيخلصچ إلى أن تطلع النتائج يلة طبي شوفي النتائج
- إياز : يلة خالة اني اترخص
- أم سيلين : ليش ابني أكعد تغدة يمنة
- إياز : لا عمة سيلين تنتظرني بالبيت
- أم سيلين : اوك براحتك
- إياز : يلة في أمان الله
- أم سيلين : الله وياك ابني
رجعت للبيت ودا اسحل هاي الجنطة العملاقة وياي ادري شحاطين بيها هيچ عبالك صخرة .. دخلت بالجنطة للصالة ، چانت سيلين متمددة ع القنفة دتگلب بالتلفون و مبتسمة ابتسامة غريبة جدا
- إياز : اني جيت
- سيلين : هاا .. يي .. الله يساعدك
غريب ... كلشي محچت ، چانت تستلمني من الباب
- إياز : يي جبتلچ الغراض من نياز
- سيلين : ليش مجتي نياز ؟
- إياز : لا مجتي
- سيلين : أكيد امي مخلتها .. صدگ إياز عندك رف أو مكتبة فارغة
- إياز : ممم يمكن بالمكتب مالتي عندي ، ليش شحتحطين بيها
عافت التلفون وجتي فتحت الجنطة .. هاي شنو ؟ بحر مال كتب محسستني عدها كشك ب المتنبي تبيع هناك
- إياز : هاي شنو ؟
- سيلين : هاي كتبي
- إياز : أدري شعدنة كشك
- سيلين : للعلم هاي تعب 7 سنين من التجميع والقراءة
- إياز : انتي قارية هذا كله
- سيلين : يي يعني اكو مجموعة قبل الامتحانات اشتريتها بس ملحگت أقراها عفتها
- إياز : شلون نجحتي بتقدير جيد
-سيلين : بابا بنت عمتك مينخاف عليها
- إياز : لازم يحطوچ بالمتحف ع هالإنجاز
- سيلين : هسة عوفك وين نحطها
- إياز : هو ماكو بس مكتبي افرغلچ بيه مكان
شلت الجنطة ورحت للمكتب فرغتلها المكتبة وهي جتي وراية دترتب الكتب
- سيلين : لا لتحط هاي هناك
- إياز : ليش ؟
- سيلين : هاي روايات عبير هاي حطها على صفحة
- إياز : اني قاري من روايات عبير
- سيلين : يب اني اموت على روايات عبير كلش تعجبني
-إياز : يي بيها حلوة بس هاي الرواية ... من أجل براين اني متعجبني ما بيها معنى
- سيلين : بالعكس كلش حلوة ، اني تعجبني كلش
- إياز : ما ادري ما أفهمها
- سيلين : طبعا لأن انت مجربت تحب و تضحي و تصبر علمود اللي تحبهم
- إياز : ايبااه .. وانتي مجربة أم العريف
- سيلين لاع مجربت أحب .. بس قريت أكثر من رواية وتأثرت بيها .. أو لأن انت نگس ما عدك إحساس
- إياز : إحساسي مات كتله السادس
- سيلين : هههههه بعدك تذكر 😂
- إياز : يي وصدفة اليوم نياز ذكرتني بيها
- سيلين : شچد أكره السادس علمي بس بنفس الوقت أتمنى يرجع
- إياز : يي چانت أيام حلوة
- سيلين : لاع منيلها أيام تخزي..
- إياز : لاع .. بيها عين
- سيلين : يي ام العين .. السبب الوحيد اللي يخليني أتمنى يرجع لأن بابا جان يجيبلي كومة روايات و كتب ويگلي من تنجحين انطيچ ياها بحيث دشوف هاي الكتب نصها يمكن بالسادس علمي جابولي ياها
- إياز : كعبة قريتي نصها بالسادس علمي شلون نجحتي ؟
- سيلين : لا ورة السادس قريتها مو گتلك چان بابا يضمها
- إياز : ديلة عيني خل نكمل كتبچ حتة نروح نتغدة
- سيلين : سودة بوجهي جوعان روح اكل أن اصفطها واجي وراك
- إياز : لا نروح سوية ما أحب اكل وحدي
- سيلين : تمام
كملنة الكتب وراها رحنة تغدينة و گعدنة بالصالة لأن الساعة 4 صارت .. هم رجعت سيلين على نفس الگعدة بيدها التلفون والابتسامة المريبة على وجهها
- إياز : سيلين شدسوين ؟
- سيلين : فاتحة واتباد
- إياز : وهذا موقع اباحي ؟
- سيلين : عزززة اكيد لا مستحيل هذا تطبيق مال روايات و قصص .. أي نعم بيه روايات يعني هيچي مدري شسميها .. بس عموما هو موقع مال روايات طاهر
- إياز : اعصابچ بس اعصابچ ..
- سيلين : يا اعصابي اذا دتگولي موقع مال أشياء مدري شنية
- إياز : أباحة
- سيلين : فوگاها يعيدها
- إياز : اني شنو ... ابتسامتچ المريبة تنطي هيچ انطباع
- سيلين : أدري بس اللي يباعون أباحة يبتسمون بلكي دا اباع فلم كوميدي بلكي دا احچي وي صديقاتي
- إياز : ذيچ وحد ذيچ ضحكات مو ابتسامات ..
- سيلين : شنو الفرق .. هسة أني شلون مبتسمة مثلا
- إياز : ابتسامة مال مغتصبين
- سيلين : شنو ابتسامة مال مغتصبين اول مرة أسمع بيها
- إياز : يعني هيج
و قلدتها شلون چانت مبتسمة
-سيلين : هههه هههههههههههههههه امداك امداك ههههههههه لا بطني شلون شكل يا الله 😂😂
- إياز : اني شنو انتي هيچ مبتسمة
- سيلين : لا اوگف خل أخذ نفس 😂
غصبا عني من شفتها تضحك ابتسمت حت بدون ما أحس ع نفسي
- إياز : اتنفسي اتنفسي عيني ل تموتين
- سيلين : عزة اني شكلي هيچ
-إياز : يب شكلچ هيچ
- سيلين : عززة اني أگول چانت كنار تجي تگلي الله يشفيچ الحيوانة مچانت تچولي هيچ شكلي 😂
- إياز : حموت واعرف شدسوين مبتسمة هيچ
- سيلين : چنت دا اقرة رواية
- إياز : وانتي كلما تقرين رواية هيچ يصير شكل
- سيلين لا والله لا 😂 بس أجة مقطع رومانسي وبعد مگدرت مشاعري المعوقة گمت ابتسم وياهم
- إياز : يا رواية
- سيلين : صغيرتي انا
- إياز : وهذي بيها كتاب ؟
- سيلين : ما ادري بس الكاتبة تنشرها ع الواتباد وأني متابعتها
- إياز : اني أحب الكتب أكثر من الروايات اللي ع النت
- سيلين : لا بالعكس كلش كلش حلوة حت بالعراقي كاتبتها
- إياز : متعجبني اذا مو كتب گدامي واقراها
- سيلين : هاك باوع شوف شكد رومانسي
انطتني التلفون وبديت اقرة المكتوب گدامي
(( صغيرتي انا :
اخرج علبة حليب
عمر : هاچ اشربي
سارة : ايع ماريد
عمر : ماكو لازم تشربي
سارة : گتلك ماريد
عمر : ماشي اني هم راح اشرب
اخذ علبة الحليب فتحها و شرب منها بعد ذلك اعطاني إياها لكي اشربها
سارة : ماريد
عمر : هففف .... شگد عنودية
اقترب مني أمسك ب فكي وبدء يشربني الحليب .
بعد ان انهيت شربه ، كان هناك بعض قطرات الحليب بجانب فمي ، انتبه اليها عمر .. اقترب مني وقام بمسحها بأصابعه ولكن كان ينظر الى عيني .
hajirsaad ))
