Birthday Special (Completed)

I met the REAL one

Storyline By Me
Posted On : 28/ 04/ 2016
Starring : Sunggyu, OC

"ဟဲ့ .... Kim Sunggyu !!! ထစမ်း !!!
အောင်မယ်လေးတော်...
အခန်း တစ်ခန်းလုံးကို အရက်နဲ့များ ဖြန်းထားသလား အောက်မေ့ရတယ်... နံစော်နေပါရောလား!! ဧကန္တ နောက် ကောင်မလေး တစ်ယောက်ဆီက ထပ် အငြင်းခံလာရပြန်ပြီ ထင်တယ်... အော်... ဒီ ကောင်လေးနှယ့်... ဒုက္ခပါပဲ... ဟဲ့... ထစမ်းဆို!!
အခု ချက်ချင်း မြန်မြန် ထစမ်း!!"

ပေါင်ကြားထဲမှာ ခွထားတဲ့ ဂွမ်းစောင်လေးနဲ့ ကျွန်တော့်ရဲ့ ချစ်ခြင်းကို ခွဲလို ခွဲ...

နှစ်ယောက် မရှိတဲ့ သားလေး အဆုတ် ကွာသွားမှဖြင့် ကိုယ်ကျိုးနည်းလှချည်ရဲ့ ဆိုပြီး စိုးရိမ်ပေးဖော် တစ်စက် မရဘဲ Joseon ခေတ်က အပြစ်သားတွေကို နှိပ်စက်သည့် အလား ကျောကို တဘုန်းဘုန်းနဲ့ မညှာမတာ ထုရိုက်လို ရိုက်...

မရှိမဲ့ ရှိမဲ့ နားထင်ဘေးက အမွှေးလေးတွေကို ဆောင့်ဆွဲလို ဆွဲ...

ဟူး ... အသစ်စက်စက် အိပ်ခန်းကလေးထဲက ပထမဆုံး မနက်ခင်းသည် စိတ်ကူးထားသလောက် မရိုးစင်းခဲ့ပေတကား။

"Ahhhhhhh နာတယ် အမေရ!!!!!!
နာတယ်!!!!!
တော်တော့........"

မပွင့်သေးတဲ့ မျက်လုံးတွေနဲ့ အတူ ကုတင်ပေါ်မှာ ခြေကားယား လက်ကားယား လုပ်ရင်းက ကျွန်တော် ထအော်တော့ အမေရဲ့ ရွှေခါးပတ်ရ သိုင်းပေါင်းစုံဟာ ကျွန်တော့် ဗိုက်ရယ်၊ ရင်ဘတ်တွေရယ်ပေါ် ခွင့်မတောင်းဘဲ ကျူးကျော်လာပြန်တယ်။

"နာရင် ထစမ်း!!! မြန်မြန် ထ!!!
ထပြီး နင့်ရုပ် နင် မှန်ထဲ ပြန်ကြည့်စမ်း.... ရုပ်က ငါ့ထက်တောင် ပို အိုစာနေပြီ သိရဲ့လား...
နင့်ကို ငါ့သားလို့ ပြောရင်တောင် ဘယ်သူမှ ယုံမှာ မဟုတ်တော့ဘူး ကောင်စုတ်လေးရဲ့"

မာနကို ထိခိုက်သွားစေတဲ့ ဤ ထိုးစစ်ကြောင့် မျက်လုံးများ ဖွင့်ဖို့ ခဲယဉ်းနေသေးပေမယ့် ကုတင်ပေါ်တော့ ငုတ်တုတ် ကျွန်တော် ထထိုင်လိုက်တယ်။

"အင်း... ဟုတ်ပြီ... လိမ္မာလာပြီ...
ကဲ... အခု သွား.. ရေချိုးခန်းထဲကို..."

စက်ရုပ်တစ်ရုပ်အား သံပတ် ပေးသလို တစ်ခုချင်းစီ အမိန့် ခြွေနေတဲ့ အမေ့ကို... ကြိုးစားကာ ဖွင့်လိုက်သော်လည်း မှိတ်ထားသည်နှင့် မခြားသောမျက်လုံး ပြူးပြူးများဖြင့် ကျွန်တော် ငူငူ ငိုင်ငိုင် ငေးကြည့်လိုက်မိတယ်။ အဲ့အခါ အမေက ပြောတယ်။