Storyline By Me
Posted On : 27/08/2017
Starring : Sung Yeol , OC
"ကိုယ့် မျက်လုံးသေးသေးလေးနှစ်လုံးနဲ့ ဖြန့်ကျက် ကြည့်ရှုရတဲ့ ကမ္ဘာကြီးကို တကယ့်ကမ္ဘာကြီးလို့ ဘယ်တော့မှ မသတ်မှတ်လိုက်မိစေနဲ့" တဲ့။
လောကကြီးက အရမ်းဆန်းကြယ်တယ်။ တွေးထင်ထားတာထက် အဆပေါင်းများစွာ ပိုပြီး အံ့သြဖို့ ကောင်းတယ် လို့ သူ ခဏခဏ ဆိုခဲ့တယ်။
ဒါတွေဟာ အနာဂတ်နေ့ရက်တစ်ချို့အတွက် ရည်ရွယ်တဲ့ နိမိတ်ပြစကားလုံးတွေ ဖြစ်လာလိမ့်မယ် ဆိုတာ သူမ သတိလက်လွတ်နဲ့တောင် ဘယ့်နှယ့် တွက်ဆဖူးမလဲ။
သူမ ချစ်သူက
အားကစားလုပ်ရင်း တောင့်တင်းတင်း ခန္ဓာကိုယ်တစ်ခု မွေးမြူရတာကို အင်မတန် သဘောကျ ပျော်မွေ့တတ်သူ။
အစ်ကိုကြီးတစ်ယောက်လို သူမအပေါ် အမြဲတစေ အရိပ်တကြည့်ကြည့် စောင့်ရှောက်ပေးတတ်သူ။
သူမ အားပြတ်နေရင် အသင့် မှီခိုခွင့်ရှိခဲ့တဲ့ ပုခုံးကျယ်ကျယ်တစ်စုံရဲ့ ပိုင်ရှင်။
သူမဘက်က နေပြီး အရာအားလုံးကို သတ္တိရှိရှိ တိုက်ခိုက်ပေးလေ့ရှိခဲ့တဲ့ အခန့်ညားဆုံး သူရဲကောင်း။
တစ်ခွန်းတည်းဆိုရရင်
သူမရဲ့ ချစ်သူဟာ ဒီ လောကကြီးမှာ ယောကျ်ား အပီသဆုံးသော လူကောင်းလူမွန်။
ဘယ်သိခဲ့မှာလဲ။
ဒီလိုမျိုး ကြောင်တိကြောင်တောင်ကိစ္စတွေ ဖြစ်လာခဲ့လိမ့်မယ် ဆိုတာ။
ဘယ်လိုများကြိုတွေးဖူးမလဲ။
သူ နေ့ချင်းညချင်း ဒီလိုပုံစံအဖြစ် ပြောင်းလဲသွားလိမ့်မယ်မှန်း။
အမှန်ဆို အဲ့ဒီနေ့ညက လမ်းမပေါ် ကားလျှောက်မောင်းကြဖို့ကို သူမဘက်ကစပြီး ဂျီ တပူပူ မကျခဲ့မိဘူးဆိုရင်။
အဲ့လိုသာဆိုရင်။ အဲ့...လိုသာဆိုရင်။
အားလုံး သူမအပြစ်တွေ။
အားလုံးဟာ သူမ အမှား။
အသက်ရှင်နေရက်နဲ့ ဒီလိုပုံစံတွေ မြင်တွေ့ရဖို့က သူမရဲ့ ဝဋ်နာကံနာတစ်ခု ဖြစ်များ ဖြစ်မယ်ဆို အဲ့ဒီ ဝဋ်နာကံနာကို မြန်မြန် ချုပ်ငြိမ်းစေဖို့ Gloomy Sunday သီချင်းလေး Volume မြင့်မြင့် ဖွင့်ပြီး တိုက်ပေါ်က ခုန်ချ၊ ကိုယ့်ကိုကိုယ် အဆုံးစီရင်ပစ်လိုက်ရ ကောင်းမလား တစ်နေ့မှာ ၂၇၈ ခါတိတိ စဉ်းစားတယ်။
