قــــوة الضمائــــــر ... طارق اللبيب

1

ست الجيل بت صالح . ده اسمها الرسمي .. بس بقولو ليها ستو .. اصلا كانت ساكنة بي اسرتها في الولايات برة الخرطوم .. وعندها ولد وبت .. وزوجها الخير ود يوسف عندها بت تشبه القمرة اسمها ملكة ..وفعلا ملكة ..وعندها ولدها اسمو يوسف ..مسمنو على جدو .. عشان كدا ناس البيت والحلة بقولو ليهو جدو ..
اسرة حالتهم دون الوسط .. ضاقت بيهم البلد ورحلو جو الخرطوم .. وراجلها اشتغل في السوق على باب الله .. كان في البداية شغال تاجر متجول .. تاني شوية عمل ليهو فراشة في سوق امدرمان .. ووفر ليهو قريشات . اشترى ليهم قطعة في ام بدة .. وبنى فيها اوضتين بتاعة بلوك .. بس كانت عليهو ديون ماهينة ..من واحد من اصدقاهو المقربين جدا ..وبسدد ليهو فيها بالشهر .. اها يازول
يوم الخير كان ماشي بحري ..عنده بت عمو عملو ليها عملية .. وطلعوها من المستشفى وهو ماسمع بيها.. الا لمن خرجوها.. ساكنة في شمبات الاراضي .. قال لي ملكة بتو .. ملكة البسي ..عشان تمشي معاي بحري تتعرفي على بنات عمتك .. قالت ليهو والله ده مايسعدني يا ابوي ..
الواطة كانت صباح واليوم يوم اتنين .. والمدينة كعادتها .. صاحية بدري والحركة نشيطة .. والحياة بدت ايقاعها السريع .. وزحمة العربات .. وناس ماشة وناس جاية وناس في طرف الظلط منتظرين المواصلات .. الخير سايق معاهو بتو الملكة .. وطلعو .. خلو يوسف وامو في البيت ..
المفروض على الضهرية كدا يكونو رجعو من بحري.. لكن ماحصل .. العصرية جات الخير وبتو ملكة ماوصلو .. المساء جاء وهم برضو ماجو.. الليل دخل وماجو .. ستو اتصلت تلفون على الخير.. تلفونو مقفول .. وحاولو فيهو كتير مافي فايدة ..
يوسف امو قالت ليهو.. الا ناس عمتك ديل يكون حصل ليهم شي .. كدي .. امشي جوه شوف الدفتر حق ابوك.. الكاتب فيهو الاسماء حقت الناس بي نمرهم .. شوف كان تلقى رقم خديجة عمتك دي ..
يوسف دخل جوة .. وفتش فتش في الدفتر.. مالقى اسم خديجة نهائي ..
قال ليها طيب خديجة دي راجلها اسمو منو ناسيهو انا .. قالت ليهو اسمو عثمان حسن .. بقى يفتش .قال ليها في رقم واحد اسمو عثمان حسن .. بس ماعارفو لو ياهو .. قالت ليهو هاك التلفون.. اتصل عليهو قول ليهو انا يوسف ود الخير .. وأسالو نعل مافي عوجة؟؟ ناس ابوك ديل ما من عادتهم يتأخرو زي الوكت ده .. وقول ليهو خلي ابوك يفتح تلفونو ..
يوسف شال التلفون واتصل على عثمان .. كيف ياعمي عثمان .. ؟ انا يوسف الخير ..
قال ليهو عليكم السلام يوسف ان شاء الله كويس ..
قال ليهو حمدلله على سلامة عمتي .. كيف هي هسي ؟
قال ليهو والله كويسة شديد الحمد لله .. قال ليهو ناس ابوي معاكم ولا طلعو؟
قال ليهو ابوك؟ ابوك ماجانا هنا .. انا من امس الصباح ماطلعت من البيت ..
قال ليهو لا ناس ابوي ديل .. طلعو الصباح اليوم معاهو ملكة اختي.. قالو جاينكم ..
قال ليهو ابدا والله .. ماجونا نهائي ..انتو ما اتصلت على ابوك؟؟ .. قال ليهو نحن بنتصل عليهو لينا ساعة تلفونو مقفول ..
قال ليهو والله ياولدي ماجونا ولاشي .. ربنا يجيب العواقب سليمة ..
يوسف مسك سماعة التلفون وسرح .. امو قالت ليهو في شنو يايوسف؟ .. قال ليها الزول ده قال .. ناس ابوي ماجوهم اصلا"
قالت ليهو اجي يا ولدي ؟.. كيف يعني؟ .. مرقو من صباح الرحمن يعني انشقت الواطة وبلعتهم ..
قال ليها والله ماعارف.. لكن بالجد دي حاجة تقلق .. والمشكلة التلفون مقفول ..
القلق ملا البيت .. وحل الظلام اكتر من ظلام الليل .. والام وولدها نزل عليهم غم .. ما تتصور شكلو .. وبقت الدنيا اضيق من خرم الابرة .. والاتنين سكتو قريب نص ساعة ..مافي زول بتكلم مع التاني .. واي واحد فيهم حايم بي مخو في الافكار .. والام مابتقول افكارها للولد .. والولد مابقول افكارو للام .. لانها كلها افكار مصايب .. حادث .. اختطاف .. مصيبة .. وستو بس اكارها انو مشى يشوف ليهو عرسة .. ياربي يكونو مشو وين البت وابوها؟ .. والساعة ماشة على 12 .. ومافي زول عندو رغبة في اكل او نوم ..
قالت ليهو ماتقوم يايوسف ياولدي تشوف الحاصل ده شنو؟
قال ليها اشوف وين هسي يمة؟ .. قالت ليهو كدي اضرب لي مصطفى صاحب ابوك .. قال ليها بس يا امي الوقت اتاخر ..
قالت ليهو خليهو يتاخر .. هو الاصحاب ديل فايدتهم شنو غير وكت الصيق الزي ده؟ ..
قال ليها جدا اوامرك .. تلفون مصطفى بلقاهو في الدفتر ؟
قالت ليهو شوفو .. دخل جوة وبقى يقلب في الدفتر ومنزعج .. حتى المروحة حقة الاوضة ما اتذكر يشغلها .. يقلب في الدفتر وباري الاسماء .. وعرقان لمن العرق نازل بي رقبتو .. في النهاية لقى اسم مصطفى .. واتصل عليهو .. السلام عليكم عم مصطفى ..
قال ليهو عليكم السلام .. منو ؟
قال ليهو انا يوسف الخير .. قال ليهو ان شاء الله مافي عوجة يايوسف؟ ..
قال ليهو والله ابوي وملكة اختي طلعو من الصباح .. قالو ماشين لناس عمتي في بحري .. ولا وصلوهم ولارجعو لاهسع.. انا
بسأل لو عندك اي خبر من ابوي؟؟ لانو التواصل بينك وبينو ..
قال ليهو ابدا والله.. ليهو يومين ما اتصل علي ..وانا كنت في كوستي ..
اهاااا كدا بالجد القلق زاد على يوسف.. ورجع لي امو برة قاعدة في الحوش متمحنة .. وكت عاينت ليهو في وشو لقت الهم ظاهر فوق عيونو .. والعرق متصبب منو .. صراحة جاتها خوفة ماطبيعيه ..
قالت ليهو اها في شنو؟ قالك شنو الراجل ده ؟
قال ليها والله يا امي قال ما عارف ما عندو منو خبر ؟
قالت ليهو ياولدي الله يكضب الشينة .. ست الجيل زولة في غاية الطيبة والمحنة .. وبتحب زوجها جدا وبتحترمو .. وماحصل يوم اتهمتو بي شين ولاشكت فيهو .. والخير كان بحبها وبحترمها احترام فوق القانون .. وبينها وبين الخير قرابة من بعيد .. بس الحب والاحترام بينهم جاهم بعد الزواج .. هي كانت بتحب ليها واحد ..من منطقة تانية لكن اهلها في البلد كانو رافضين .. وابوها شيخ صالح .لزم عليها انها تتزوج الخير .. وهي نفذت كلام ابوها .. وقبلت بالخير .. لي قسمة الوليدات ديل ..
والحمد لله الحب والاحترام جاها بعد الزواج .. وهي لسه ماوصلت الاربعين سنة .. ولدها الكبير ياهو يوسف ده .. امكن في العشرين او 21 سنة ما اكتر .. وبتها ملكة مافايتة السبعطاشر سنة وتاني ماولدت ..وكانت هي وراجلها ماشين في العلاج .. وهرمونات وتنشيط .. وحاجات كدا .. غايتو الحمد لله في الايام دي متهمة نفسها بي حمل .. لانها مواصلة الصلاة ليها شهرين ماقطعت ..
اها هسي شغالة تفكر معقول ياربي الخير ساق الملكة.. ومشى يعقد ليهو علي واحدة.. يجيب منها جنى ؟ لالا مستحيل الخير يعملا بدون مايكلمني .انا اريتني كان كلمتو بالحصل علي .. واني مستبشرة ..
مايكون مشى عمل ليهو عملة بي وراي ..
اها طيب مالو مامشى لي ناس خديجة؟؟ وليه كضب علي الصباح؟؟ قال ماشي ليهم ..
وجدو هناك شغال يفكر .. ياربي ناس ابوي ديل يكون حصل ليهم حادث .. طيب اصلو الحادث لو حصل.. ناس الشرطة بتصلو بي تلفونات الناس الفي الحادث.. ويبلغو اهلهم .. وابوي تلفونو فاتح وبطاريتو ملانة..
ياربي يكون ملكة حصلت ليها حاجة.. وابوي وداها المستشفى وماعايز يكلمنا عشان مانقلق؟ لالالا ابوي دي مابعملا.. طيب يكون في شنو ياربي ؟
المهم الافكار المختلفة في راس الولد وامو .. والليل راح تب ..امو قالت ليهو.. امشي على سريرك ياجدو.. اخد ليك غمضة عشان باكر تقوم تشوف ناس ابوك ديل الحاصل عليهم شنو ؟
قال ليها يا امي مابقدر انوم بالطريقة دي والله عيني ماتغمض ولاحاسي اني نعسان ولاعندي رغبة في نوم .. والخمسة ساعات الفاضلة من هسي للصباح دي مرت.. كانها خمس سنوات من شدة القلق والتوتر عند جدو وامو .. يعني التاخير عادي مافيهو خطورة لكن كونو انهم ما مشو لي ناس عمتهم .. دي الحكاية المامطمنة .. ..
اصبحت واطات الله.. ويوسف كان قاعد في السرير .. ومتكل على الحيطة ونايم .. لكن ستو نهائيا ما غمضت.. ولاعينها لاقت ..
الساعة 6 قالت ليهو قوم يايوسف صلي وامشي مركز الشرطة افتح بلاغ طوالي ..
قال ليها يا امي الحكاية دي كدي صعبة.. بلاغ طوالي هسي ابوي كان جا.. مابرضى مننا.. وبقول لينا انتو قايلني انا شافع بضيع؟ قالت ليهو اها يعني نسوي شنو؟؟ نقعد مكتفين ايدينا كدي لامتين؟؟ ..
قال ليها اصبري كدي.. انا بطلع براي واسأل .. قالت ليهو تسأل وين؟ ...قال ليها والله ماعارف .. يامي ماعارف ..
انا في راي ولانفتش ولا نكوس براهم بجو .. انتي بس اصبري وشوفي بي عينك ..
قالت ليهو والله ياولدي الصبر غالبني تب .. لا ابوك ولابتي ماني عارفة الحاصل عليهم شنو؟ وانت تقول لي اصبري .. اصبر كيف يعني؟ ..
الصباح فتح شوية ويوسف رقد نجيض عيونو مرومات من السهر وبقى يشخر .. ستو طوالي لبست توبا واخدت ليها ركشة ومشت القسم .. من الصباح لقت موظف البلاغات ومعاهو اتنين عساكر .. ولسه الواطة ماصبحت سمح .. مشت ليهو طوالي قالت ليهو والله عندي راجلي وبتي مفقودين ..
قال ليها مفقودين كيف يعني؟ .. قالت ليهو طلعو من امس الصباح وقالو ماشين كيت كيت .. ولاوصلو ولا رجعو والتلفون مقفول ..
قال ليها هم الاتنين سليمين العقول ..؟؟ قالت ليهو سليمين .. قال ليها يعني ح يكونوا مشو وين ؟ فتشتو عند اهلكم الببقوليكم والاصحاب ؟
قالت ليهو سألنا مافي زول قال حاجة
قال ليها بس .. انتي قايلة اي راجل يطلع من البيت ومايكلم مرتو مشى وين .. نحن طوالي بنكتب ليهو بلاغ فقدان؟.. نحن حتى لو اشتبهنا في الحالة .. المفروض نفتح بلاغ بعد تمانية واربعين ساعة الا في حالات خاصة جدا.. زي فقدان الاطفال وكدا .. قالت ليهو انا مامقتنعة بالكلام ده.. افتح لي بلاغ لو سمحت.. وعايزة ناس يفتشو معاي المستشفيات .. قال ليها تعالي لينا بكرة.. وبنمشي معاك اي حتة .. قالت ليهو والله البلد دي هملانة.. ووو قعدت تنقنق .. اصلا مارد عليها.. انشغل في دفترو ..
في مراة ست شاي.. جات جابت شاي للعساكر جوة .. سمعت النقاش بتاع ستو مع العسكري بتاع البلاغات .. ساقت ستو برة .. قالت ليها تعالي اقعدي انا دايرة اقول ليك كلام .. انتي هسع راجلك وبتو طلعو وماعارفاهم مشو وين؟ .. وماقادرة تفهمي الحاصل ؟ دي دايرة ليها فهم؟ خليك مراة ذكية وشاطرة ..
قالت ليها قولي لي انتي ياشاطرة انا مافاهمة .
قالت ليها كويس انا بحكي ليك قصة.. حصلت عندنا هنا قريب في حلتنا ..الراجل يايمة من الصباح لقوهو مافيش معاهو بتو ..
والناس يفتشو فيهم اسبوعين .. في راجل قال شفت فلان الفلاني عيادة نساء وتوليد في مدني ..
معاهو بتو فلانة .. قامو ناس الشرطة اتصلو علي ناس مدني .. واستقصو من الحكاية جات المعلومات قالو الراجل جاب البت عشان يعمل ليها عملية تنزيل جنين ..
وعمل ليها فحوصات وتحاليل في العيادة .. ودكتورة العيادة قالت البت ابوها قال متزوجة .. وجنينها نزل ..وعملنا ليها عملية نظافة وشنو وشنو القصة طويلة ..
اها يختي فهمتي الحاصل؟؟؟ ..
ستو قالت ليها انتي واحدة غبية ومغفلة.. وماعندك طايوق .. دي بتي الملكة .. انا بعرفها اكتر من ابوها .. انا بتي كان قحت بعرفها مالا .. يعني هسي دايرة تقولي لي بتك عاملة عملة .. وابوها ساقها عشان يتصرف ..
قالت ليها اصبري ياختي .. انتي عارفه نهاية القصة شنو؟ قالت ليها اها شنو؟؟ قالت ليها قالو الجنى من ابوها ..
ستو قالت ليها استغفر الله العظيم.. والتوبة لوجه الله الكريم.. انتي يامراة ماعندك كلام غير ده تقوليهو لي .. وين الكلام البتقولي فيهو ده ؟؟ نحن في بلد الكفر؟.. عليك الله خلي الكضب والتاليف.. وابقى في شايك ده ..
وقامت من جمبها طوالي ..لكن الحقيقة المرة انو.. كلام المراة اثر تأثير شديد على نفسيات ستو.. وبقت بتفكر في الحكاية دي .. وتتخيل لامن جاها هبوط .. وجسمها بقى يرجف ورجعت البيت بي حالة لايعلم بها الا الله ..
..
الى اللقاء