عبد الله : عندي ليكم فكرة حتعجبكم
بابكر : اها قولها
عبد الله : نحن نشيل نصيب فاطمة و امي و نتقاسمو التلاتة مع بعض و بي كدة اي زول فينا قروشو حتزيد ، اها رايكم شنو
عثمان : و فاطمة و امي يعملو شنو
عبد الله : ما عندك دخل بيهم ،، عايز تكون معانا و لا لا
عثمان : عايز طبعا
عبد الله : طيب اتفقنا
عبد الله : طيب نحن ننتظر حبة لحدي نبيع البيت بالسعر النحن عايزنو لان البيوت اسعارها بتزيد لسه و يمكن نلقى سعر اكتر من مليار و 700 دي
عثمان : كويس ننتظر كم شهر كدة و اهو البيت مؤجر و جاينا قروش منو
فاطمة قررت تشتري مكيفين عشان اخوانها شالو مكيفات البيت كلها و مشت اجرت بيت عشان تقعد فيهو هي و امها و كلمت محمد ود عمها يشوف ليها شغل
محمد : ليه تشتغلي يا فاطمة ، تعالي اقعدي معانا
فاطمة : الشغل بريحني و القعاد معاكم صعب لانو ما عايزة اتقل عليكم انا و امي
محمد : لا تقلة و لا حاجة و لو ما شالتك الارض نشيلك جوا عيونا
فاطمة : تسلم كتير و لو عايز تساعدني بالجد بس شوف لي شغل زي ما قلت ليك
محمد : طيب ، انا عندي صحبي عندو شركة بشوفو ليك
فاطمة : تسلم كتير
محمد لقى ليها شغل في شركة و فاطمة نزلت الشغل
و مشت لي سوسن جارتهم
فاطمة : سلام سوسن
سوسن : و عليكم السلام فاطمة ، كيفك و كيف امك
فاطمة : الحمد لله بخيير والله ، عايزة لي مكيفين لكن هسي ما معاي كاش
سوسن : ما مشكلة يا فاطمة ، انا بديك بالقسط و اول كل شهر ادفعي
فاطمة : تسلمي والله
سوسن : لكن ناس الشغل الا يكون عندكم ضمان حتى يقسطو ليك
فاطمة : انا والله ما عندي حاجة عينية ، غير نصيبي في البيت و انا حاديك شيك بضمان نصيبي لحدي ما اتم الاقساط عشان تضمني حقك
سوسن : طيب
فاطمة : دا شيك حامضي ليك و ما حاكتب السعر او الاسم لانو يمكن ما نحتاج نصرفو و اول ما اتم الاقساط حاجي اشيلو منك ان شاء الله
سوسن : طيب حاحفظو
فاطمة كتبت ليها الشيك و سوسن مشت حفظتو و فاطمة استلمت المكيفات و بقت تدفع الاقساط كل شهر من مرتبها لحدي كملت الاقساط و كان شهر رمضان دخل
و عبد الله عرف انو فاطمة خاتة الشيك عند سوسن لكن هو عارف سوسن ما حتديهو الشيك لانها زولة نزيهة جدا و كمان عارف انو فاطمة بتثق في علي ود جيرانهم كتير و كلم علي انو يمثل الطيبة و الحب على اختو عشان تثق فيهو اكتر و بالفعل علي طوالي بجي لناس فاطمة و يساعدهم في حاجات البيت و فاطمة بقت تثق فيهو ، و كمان جاء مشتري للبيت بتاع الورثة و قال بدفع مليار و 800 مليون و الاولاد قررو يبيعو البيت للمشتري دا و بقى نصيب فاطمة و امها 450 مليون
فاطمة بعد انتهت من دفع الاقساط رسلت ولد جيرانهم علي عشان يجيب الشيك من سوسن
فاطمة : يا علي ممكن تمشي لسوسن تجيب لي الشيك لان امي تعبانة حبة و ما بقدر اخليها براها
علي : من عيوني يا فاطمة
فاطمة : تشكر كتير على وقفتك معانا
علي : بضحكة خبث دا الواجب يا فاطمة
علي ماشي في الشارع و يقول في نفسو : انا البعملو دا صح و لا لا ، لكن كمان ليه احن عليها لان اخوانها هم الخلوني اعمل كدة ، يعني حاكون احن عليها من اخوانها ، يا زول ضميير شنو ، شيل عمولتك و اسكت
و علي لمن وصل لي سوسن و طلب منها الشيك ، سوسن قالت ليهو
سوسن : اتفضل الشيك و سلم على فاطمة
علي : شكرا ليكي
و شال الشيك و مشى بيتهم و اتصل على عبد الله
علي : سلامات عبد الله
عبد الله : و عليكم السلام علي
علي : الامانة معاي يا مان
عبد الله : جادي ،، قصدك الشيك الفيهو امضاء فاطمة
علي : ياهو ذاتو
عبد الله : عفارم عليك ، طيب انا حاجي امر عليك بعد شوية
علي : في انتظارك و ما تنسى تجييب لي عمولتي
عبد الله : اكييد يا فردة ، حقك موجود
عبد الله يصل لي علي و يستلم منو الشيك و يديهو 6 مليون عمولة
عبد الله يتصل بي اخوانو و يقابلهم
عبد الله : اخيرا يا جماعة ، عرفت حاشيل نصيب فاطمة و امي كيف و طبعا انتو الشهود حتكونوا
عثمان : حتعمل شنو !!
عبد الله : .....
يتبع...
