Saan nga ba patutungo 'tong buhay ko?Kung minsa'y ito'y nasa gilid na ng bangin
At kung minsan nama'y ito'y parang dinadala ng mga ibon patungo sa langit
Ngunit kadalasa'y ito'y walang buhay na naglalakbay patungo sa hindi malaman na destinasyon
Saan nga ba hahantong 'tong buhay na mayroon ako?
Isang tanong ngunit kung ito'y tumakbo sa aking isipan ay parang ito'y 'di napapagod
Isang tanong na nag-iiwan pa ng maraming mga katanungan
Isang tanong na nagnanakaw sa aking katinuan
Ngunit sa 'di inaasahang pagkakataon
Ika'y aking nakilala
Nang dahil Sa'yo, ako'y naliwanagan
Sa Iyong pagdating, tila ako'y nabuhay muli
Sa Iyong pagdating, ang buhay ko'y nagbago
Sa isang iglap, ako'y nagkaroon ng direksiyon
Hindi ko lubos maisip kung Ika'y hindi ko nakilala
Kaya't ako'y nagpapasalamat
Hindi lamang sa pagbibigay Mo ng direksiyon sa aking buhay
Ngunit pati na rin sa pagbibigay Mo sa akin ng buhay
Ako'y nagpapasalamat din sa pagbibigay Mo ng kulay sa aking buhay
Sa paglalagay Mo ng mga ngiti sa aking mga labi
Sa pagpapaindak Mo sa aking puso't mga paa sa musika ng buhay
Sa pag-iilaw Mo sa aking daan
Sa pagtatagpi-tagpi sa aking katauhan
Sa pagdadala ng pag-asa sa aking munting buhay
Sa pagtatanggol Mo sa akin mula sa kasamaan
Sa pagiging aking Kaibigan at higit sa lahat
Sa pagmamahal na Iyong ibinibigay
Salamat, O Panginoon
