مثل كل يوم گعدت حضرت ريوك لبابا بس هذا اليوم مميز بالنسبه الي .. هو اول يوم الي بالشغل بعد ما تخرجت..
خلوني أعرفكم ع نفسي..
آني لمى عمري 24 سنه تخرجت من كليه الحقوق قبل اكثر من سنه بَـس تعرفون ماكو تعيينات فبقيت كاعده بلبيت الى ان ابويه حجه وي احد اصدقائه وهو محامي معروف ببغداد وعنده مكتب فگله تدلل انت وبنتك خل تلزم المكتب الصبح...
عندي اثنين اخوان واحد متزوج وعايش بالنروج( علي)والثاني اصغر مني طالب كليه محاسبه(أيمن)واختي الصغيره زينب بعدها بلمتوسطه.. وبابا الله يحفظه محاسب بالتربيه وهو شوي عصبي بطبعه ونادرا مايشاركنه آني واخواني بسالفه اوضحكه..
أمي ربة بيت بس مخلصه اعدادي هي.. أمي اقرب النا من ابويه وهي الي تهتم بكل امورنا وطبعهه هادئه وتحب يكون بيتنا همات هادئ وسعيد..
من فتره التخرج ولحد الان آني ام البيت.. امي عليها بَـس تجي تشوف الاكل قبل منصبه.. طبعا كلش مليت من گعدة البيت وطگت روحي وامي من شافتني هيج حجت وي ابويه وبعد الحاح ومعاناة طويله قبل ابويه ورحنا آني ويا طلعت هويه المحامين حتى أكدر اشتغل.. بيومها ماانسه شكله شلون جان متنگ عليه هههه آني ادري بي كلبه طيب ويحبنا هوايه بَس طبعه جااامد..
المهم طلعت الهويه ورجعنا للبيت وجنت مثل المخبله كل شوي اطلعها من الكنتور اباوع عليها اضحك وارجعها وكل مااتذكر هم ارجع عليها ونفس الحاله هههههه ..
نرجع ع يومنا هذا.. حضرت الريوك واجه بابا طبعا هو اول واحد يطلع لدوامه .. اني جنت متخذه وضعيه الملاك ههه..
بعد ماتصابحنه واكل شويه بدت محاضره بابا الارشاديه والتربويه😂 (ديري بالج تضحكين! لتستقبلين الزلم اخذي بَـس دعاوي النسوان! لتقللين احترام من ابو سامر(هو ابو المكتب) وبالج واياج احد يكلج صار شي برا او محتاجيج واطلعين!!)
اي بابا اكيد .. طبعا.. بابا اني مو صغيره.
هيج جنت اكول.. وهو گلي ادري مو صغيره بَس ولد الحرام هوايه واخاف عليج..
اني جنت متفهمه حرصه عليه وابد مازعجني من حجه ويايه بلعكس حسيت بخوفه واهتمامه من عيونه من جان يحجي..
كمل البابا وطلع رحت ع غرفتي لبست ملابسي الرسميه الي اشتريتهم قبل فتره للشغل وخليت مكياج خفيف مثل الي جنت اخلي بالجامعه وحجابي واخذت جنطتي وكعدت بالصاله انتظر ايمن يخلص ريوك حتى يوصلني للمكتب طبعا جانت نهايه العطله الصيفيه ولوما ابويه مأكد ع ايمن لو ينقصف البيت هم ميگعد بس امر القياده العليا جبره..هههه
-ايمن يله سيدي القاضي! امري لله..
هو بَس اليوم توصلني وبعدها ادبر حالي😒
يعني ماجيج بعد!
اي بابا كال هو يمرلي ..
الحمد لله خلصت منج بومه!
ديله يله صارت ثمانيه ونص هسه شيكول اول يوم وهيج!
وصلت لهناك بحدود التسعه كان المكتب بلطابق الثاني بعماره جديده ومرتبه ومن الداخل هم نظيفه وكلش حلوه.. وصلت لغرفه وعليها اسم صديق بابا.. ايمن لباب العماره ورجع.. آني عبالي مسدود الباب وعمو نسه انو آني جايه اليوم..
رحت اصيح ايمن ايمن! اوكف ماكو احد هنا!! طبعا حنت اصيح من الشباك مال عماره وايمن شغل السياره وراح!!
شويه وانفتح الباب..
سامر:اكو شي! ليش هل عياط؟
انربط لساني ومعرفت شگول لان مجان اكو بشر بلعماره وهذا مدري منين طلع..
منو حضرتج؟
هاا اني لمى.. اجيت ع استاذ صبيح..
تفضلي وگولي شنو عندج..
لالا آني .. اني اجيت اشتغل وي الاستاذ.. هو موجود؟
شنو؟ شنو تشتغلين؟ ومن وين تعرفي؟
هو صديق بابا وكله عادي خل تجي
شنو تشتغلين او شنو مخلصه انتي؟
خريجه حقوق من جامعه النهرين..
اهاا يعني محاميه جديده بل مكتب.. ماشي.. تفضلي..
ليش اكو غيري هنا.؟
لابس آني والوالد استاذ صبيح يعني..
اهااا حضرتك ابنه؟
اي اتفضلي..
طبعا انگطع نفسي من حجيت ويا وهو سواهه تحقيق ونظراته تخوف مال واحد معاجبه بشر.. دخلت للمكتب وجان مرتب وعلي اسم عمو صبيح ومكتبه صغيره بيها كومه كتب.. هو طلع مااعرف وين ورا دقايق اجه وبيده صينيه بيها استكانين جاي وماعون صغير بي كعكات..
ماله داعي استاذ..
ميصير انتي بمكتب صبيح.. اتفضلي
شكرا..
يعني هذا كل عقله يريد اشـرب جاي هسه! مادري شلون جنت اشيل الاستكان واخلي بحلگي.. هو مجان داير بال مخلي فونه بأيده وگاعد ورا الميز مال مكتب..
ورا شويه دگ تلفونه وطلع..اني كيفت من طلع وحسيت بوقتها اتنفست من صدك.. ماعرف ليش هيج جنت مرتبكه يمكن لان هيج طلع فجأه بوجهي وسألته الي متخلص..
رجع دخل باوع عليه وابتسم.. وبعدين گال..
انتي هم لازمه دعوى قبل؟
لا..
هههه... يله ماشي تتعلمين ويانه..
حضرتك همين محامي؟
اي ليش مو مبين؟
وقابل المحامي يكتبون ع گصته محامي!
هههههه والله ضحكتيني..
فتح اللابتوب وداره كدامي..
هاج شوفي هاي نماذج مال دعاوي مختلفه.. اكيد انتي حتلزمين قضايا احوال طلاق نفقه وهيج امور..
اني اخذت اللاب وبديت اطلع ع الدعاوي وحده ورا الثانيه حنت اسجل ملاحظات بدفتر صغير بجنطتي..ومحسيت اله وصارت بالوحده.. طبعا سامر هم جان ساكت وبس يلعب بفونه..
سامر:مجعتي؟ نطلع نتغدا؟
اني ارتبكت وجان واضح هل شي
اكو مطعم جوا تحبين تنزلين لو اجيبلج لهنا؟
ها لالا بعد ساعه يجي بابا ياخذني.. ومو جوعانه..
براحتج..
وصدك ورا ساعه اتصل بابا وگلي هو بلطريق.. من ردت انزل سامر اصر ينزل يسلم ع بابا آني خفت لا بابا ينزعج من يشوف سامر لان جان شاب مرتب وحلو.. بس صار العكس من عرف بي ابن صديقه وبقو يتسالمون وبابا يگله جنت اسمع ابوك يحجي بيك بس مصارتلي فرصه اشوفك ولامره.. هو جان لطيف كلش بتصرفاته وطريقه كلامه ولبق ويعرف شلون يرد ردود تخلي الواحد يرتاحله. ف بابا ظل طول الطريق يمدح بي واني ساكته محجيت ..
دخلنا وجانت امي منتضرتنا ومسويه باميه وتمن واني فارطه من الجوع مادري شلون كلت لسامر لا اكل بلبيت😂..
كملت غدا وبعد ماحجينا اني وماما وزينب هم حطت خشمها ويانه عن شغلي صعدت لغرفتنا الي هي مشتركه آني وزينب كلتلها اذا طلع منج صوت اشمرج من الشباك.. عاد آني خليت راسي ورحت بسابع نومه.. ماگعدت الا المغربيه بعد ما وگفوا يم راسي ايمن وزينب ويصنفون.. هذا الي يكول سياده القاضي وهذا الي يرد بصوت يسوي نفسه يبجي سيدي والله اني معليه هم رادوني اصير محاميه.. هههههه
عطت بيهم وشمرت المخاد عليهم وطلعو وبعد ماطلعو ضحكت گلت بَس لاصدك هيج ينخرط بوشي من ادخل مرافعات😂
بعدها نزلت وحضرنا العشا اني وماما وگعدنا ناكل وطبعا اذا ابويه كاعد محد يتجرأ يحجي ع الاكل.. بس من يگوم تشتغل الوكالات الاخباريه...
عاد هم رجعو لنفس السالفه ويصنفون عليه.. اني انطيتهم هاي النظره😒 وصعدت للغرفه وعفت المواعين ع زينب عقوبه الها اجت تتوسل اغسلهم بس مقبلت وراحت هي غسلتهن غصبا ما ع خشمهه😁
بقيت سهرانه ادور قوانين واراجع الي درسته لحد مانمت .. گعدت ع صوت المنبه وكالعاده حضرت الريوك بس بابا جان مبين مرتاح اليوم ومحجه شي حتى كمل ريوكه وسلم وطلع..
اني همينا كملت وصعدت باصات ومشيت مسافه لحد موصلت للمكتب بس هلمره باوعت ع كيفي وشفت المنطقه زين والمحلات واهم شي المطعم..هههه
فتت وجان سامر موجود ومبين مخبوص بشي وكومه اوراق يمه واللاب مفتوح..
صباح الخير
صباح النور..
هو بقه ساكت فتره طويله واني طلعت فوني وبقيت العب كاندي كراش.. ومجنت منتبهه للصوت لان آني متعوده العبها هيج..
سامر:ممكن تنصي او اطفي لان داشتغل..
متت خجل يالله شكد عوبه اني حتى مكدرت اكمل طفيت الفون وخليته بلجنطه..اسفه
تعالي شوفي شنو رأيج؟
قريت الدعوى وجانت عن المقاولات وبيها كومه حجي الي فهمته واحد منهم مخرب العقد الي بينهم والثاني يريد تعويض ومو أي تعويض لا 200 مليون..!
طبعا شغل عمو صبيح جان بلملايين لانه معروف وميستلم أي قضيه لذلك خله سامر وبعدين اني نلزم القضايا العاديه والسهله
وااو هاي منو لازمهه؟
هاي لبابا بس گلي احضر الكليشه مالته والادله..
اني لحد الان مشفته لعمو..
بعد نص ساعه يجي ..
اهااا أي لازم اتشكره لان قبل يشغلني ويا..
ماشي..اليوم مضيفناج لان بعد مو ضيفه انتي خدمي نفسج بنفسج ههه..
هههه اكيد..
بعد ربع ساعه اجه عمو صبيح وسلمت علي وجان شخصيه قويه ومبين هيبه هو جان مشغول اخذ اوارقه وطلع...
وتقريبا بعد ساعه ورا مطلع اجت مريه وياهه بنتها صغيره..
استقبلناهه وقدمنالهه مي.. گالت تريد تطلب الطلاق لان زوجها يشرب ومن يشرب حته يضرب بناته الاربعه.. احنه سجلنا الي حجته وگالت باجر ترجع ..
سامر:هاي فرصتج..شوفينا شطارتج..
هاا؟يعني مو انت تلزمها؟
لا لان نريد عزيمه هههه.. لتخافين اني حساعدج بيها..
اني صدگ خفت وحسيت الشغله صارت صدك وهاي مو شغله هينه بيها مصير ناس.. گعدت احضر لهاي الدعوى ايام وليالي وصدگ سامر ساعدني هوايه واخذت رقمه وكل مااحتاج شي جان يوضحلياه حسيت نفسي قطره ابحر كدامه وكدام خبرته..
المهم صار موعد المرافعه وجنت حيل مرتبكه.. امي تدعيلي وابويه منتظر النتيجه صح هي شغله هاي المريه سهله بَـس لان آني ممتعوده هيج خفت وارتبكت... خطيه بيومها سامر من شافني اجيت للمكتب واخذت الاوراق الي احتاجهه وجان وجهي يتلاطم ظل يشجعني ويكول هو هم بأول مرافعه هيج جان.. وبدون مااحس ع نفسي كلتله تعال ويايه للمحكمه ختى اذا خربت السالفه انت ادخل مكاني..
هو ظل يضحك بس بعدين هو اخذني بسيارته الي جانت من افخم الموديلات بوقتهه.. موكلتي اجت والقاضي اجه باوعت لسامر وانطاني نظره اطمئنان ودخلت.. من دخلت ماعرف منين اجت كل هل جرأه والكلام مادري شلون طلع بَـس باخر لحظات خفت من القاضي نزل نظاراته وسكت شويه وبعدين صدر الحكم واني اله شويه يوكف گلبي.. وبالفعل كسبت الدعوى ومن طلعت من القاعه بجيت عني وعن موكلتي😂
سامر:هههه كافي فضحتينا.. يله خل نرجع خاف تجي دعوى حتى اخليها براسج هههه..
طبعا اجت موكلتي وهي مره فقيره من اهل الله بوستني وشكرتني والاتعاب اندفعت ووصلت حصتي منها😍
من رجعت شكد خجلت بسبب غبائي خليت سامر يعوف المكتب لا وجايه بسيارته الخاصه.. من صعدنا شغل اغنيه اجنبيه بَس تخلي الواحد اله شوي يرگص هو گلي هاي بمناسبة انجازي اليوم😂
ماعرف شلون اشكر حضرتك..لوما انت مگدرت احرك ساكن..
سامر:اني مسويت شي..بجهدج انتي.. هسه تتعودين وتصير مثل هاي القضايا سهله عليج..
ان شاء الله..
من فرحتي نسيت اخابر ماما ولا بابا.. خابرتهم من وصلت للمكتب وجنت عبالك محرره المسجد الاقصى😂
رجعت للبيت والكل فرحان بيه بَـس الزعران بعدهم يصنفون عليه هههه .. وتقريبا بعد اقل من اسبوع وفيت بلعزيمه وسويت كل الاكل بليبت واخذته (دولمه ودجاج ع برياني ومقبلات وبورك) ويايه سامر ضحك وگلي هو جان يتشاقه .. المهم صارت فتره الغدا وسامر اخذ الاكل حماه ورجع ويا ولد شايل الجداري😂
طبعا صارنا مثل الاصدقاء عادي ناكل سوا ونضحك ونسولف..
ومجان بالي يم غير شي ابد مااعتبرته اكثر من صديق.. بس من جنا ناكل كل ما ارفع راسي الكه عينه عليه.. وجان ياكل ع البطيء واني حرت شفتح من موضوع حتى يحجي وميظل هيج بَس يباوع... عزه من صدك خفت..
احم.. سويت نفسي اشــرب مي من البراد..
رجعت گعدت هو ابتسم وبقه عينه منزلهه.. بذيج اللحظات فكرت ابطل واگعد بلبيت..
بس الحمد لله اتصل علي ابو وحجه وياه شويه وبعدين طلب يحجي ويايه ويباركلي..طبعا جنت احجي وي ابوه وانربط لساني من طريقته شلون يباوع حسيت نفسي اختنك بلحجي.. واخر شي خلصت المكالمه ورجعتله فونه واني لازمته بطرف اصابعي هو يمكن حس بخوفي وشاف ايدي شلون جانت ترجف فگال اني شبعت عاشت ايدج الحلوه ع هل الاكل الطيب.. هو نزل واني تنفست الصعداء.. باوعت علي من الشباك شفته يدخن ويروح ويرجع..يمه هذا شبي..احسن شي اطلع هي بقت ع نص ساعه شكو باقيه.. لملمت الحافظات وخليتهن بالثلاجه لان بقه بيهن اكل.. غسلت ونزلت..
سامر:ها وين؟رايحه؟
اي مااعتقد احد يجي هسه..
انتظري اجيب السويج واجي اوصلج..
يمه عزه العزاني اطلع من موقف اطب بالاتعس. رفضت واصريت بس هو اصر اكثر وصدك جانت ظهريه وتقريبا الشارع الي احنه بي لوما المطعم ميفوت بي احد هيج وقت.. وخفت لامن ارفض يگول خافت مني ويروح يستغل الوضع..
المهم استسلمت وصعدت ويا واحس راسي عبالك مخيطي بس ع جهه الشباك مگدرت احرك ولاشويه..
هو كعادته مشغل اغاني وساكت.. بعدين سألني يگلي شبيج.؟
هاا..مابيه شي بس تعبانه شويه..
اوكي هسه توصلين وروحي نامي وارتاحي..
اي..
كملوها ترا حلوه واريد تفاعل ومشاركات😒
