وصلت للبيت بسلام واخيرا بعد مادعيت وبس بجي مبجيت.. دخلت لغرفتي غيرت ملابسي والف فكره اجت براسي واله شويه نزلت أكول لامي آني بطلت.. بس بليل فكرت بهدوء اكثر وگلت مستحيل يتجرء ويايه بشي لان ابو صديق بابا وعلاقته زينه بي بس هم ملگيت تفسير لنظراته الي شعلت باب گلبي من الخوف..
ثاني يوم رحت وحاولت اكون طبيعيه ولحسن حظي هو اخذ اوراق وطلع عنده مرافعه واجه عمو صبيح وحسيت بأمان اكثر وقتها.. عمو هم جان ساكت وظل يگلب باوراق بيده لحد مااجه سامر هو طلع..
آني محجيت ولاشي بس هو كال هاي الدعوى شلعت گلبي ومدتخلص..
اهاا..خير ان شاء الله..
ظل هو ملتهي باللاب واتصالاته الي متخلص.. وصار وقت طلعتي هم عرض عليه يوصلني بس كلتله اخويه منتظرني براس الشارع وطبعا هو جذب ايمن يجوز بعده بلدوام..
وصلت للبيت وحسيت بتعب بالرغم اني ممسويه شي لابلبيت ولابلدوام بس هذا التفكير يمكن هيج تعبني.. غسلت واكلت شويه وصعدت لغرفتي خليت راسي وبقيت اتذكر ايام الجامعه وصديقاتي الي أنگطعت اخبارهن وولا وحدة حاولت توصلي واني ياما حاولت والي عرفته وحده منهن تزوجت والثانيه منتقلين لغير مكان معرفته المهم نسيتهن مثل ماهنه نسني بس اليوم حنيت لأيامي وياهن.. ظليت افكر وافكر الى ان غفيت ..
گعدت المغربيه وهم نفس الروتين.. واليوم اتصل بينا علي وحجيت ويا ووي زوجته واطفاله وگال اذا صارتلهم فرصه يجون.. علاقتي بعلي جديه كلش يعني ماكو مجال نضحك او نشاقه مثل الاخوه وهو تقريبا مثل ابويه بطبعه وحتى شكله ...
بعدها كلمن راح لغرفته يدرس وابويه راح يشوف الاخبار واني وامي كعدنا ندردش وهم جابتلي سالفه الزواج.. حسستني انه عمري 50 سنه بوقتها ومن هل حجي فلانه تزوجت وفلانه عدها طفلين اني مجنت رافضه بس مجان اكو احد ملائم يتقدملي.. والاغلبيه جانو ابناء صديقات امي وا جاراتهه لو مامكمل لو اصلا معنده شغل لو گاعد وي اهله وهم خمسين نفر.. من بعد مكملت امي كلتلها ماما اذا اجه احد بي حظ مراح اكول لا.. هي هم سكتت وغيرت الموضوع...
صعدت لغرفتي وزينب جانت تقره محجيت وياهه ومن خليت راسي ع المخده اجه ابالي سامر واني اتذكر كل لحظه وهو گدامي شگله عيونه الواسعه ضحكته من يضحك صفح اصابعه وهو يكتب وساعته طوله ومن يدخل للغرفه وادي بجيابه مال بنطرون وكل شي بي تذكرته..بعدين حسيت ع نفسي وقطعت هل التفكير والذكريات...
مرت ايام واني اتحاشه سامر ومااباوع بوجه من يحجي اخاف اشوف نفس النظرات مال يوم العزيمه.. وهمينا استلمت دعوى ثانيه وثالثه وبكل مره افرح يفرح هو اكثر مني .. طبعا عروضه مستمره مال يوصلني او يجي ياخذني بس جنت ارفض لحد ما قلت هاي العروض..
وبيوم من الايام جانت عنده دعوى كلش صعبه ومعقده وهو اصر انه يستلمهه بدال والده .. حسيت بي متضايق حيل واليوم هو وقت المرافعه اجه للمكتب فتح اللاب وسجل كم شغله عنده بالورقه ولملم كل الاوراق الخاصه.. وقبل ليطلع التفت عليه وگال..
لمى! ادعيلي!..
گلبي مادري شنو صار بي من گال هيج خفت علي خفت منه مااعرف شنو.. كلتله ان شاء الله كل الخير كدامك..
هو ابتسم وطلع.. بقيت وحدي ويمكن هاي اول مره ابقى وحدي خلال اشهر من شغلي هنا.. جان گلبي ع نار وماعرف شنو اسوي بس افتر...
ورا ساعات سمعت صوت ع الدرج عبالك واحد ديركض.. فتحت الباب وجان سامر والابتسامه تارسه وجه آني بدون مااعرف ضحكت.. وصل يمي وصار كلش قريب وجان عيونه متتحرك وبعيني اني هم بوقتهه مشلت عيني ولو انه موطبعي وماعندي هاي الجرأه بس ظليت تقريبا دقيقه صافنه بعيونه وهو همين.. جنت انتظره يحجي ويگول شنو صار ويا.. بس لاهو طلعت منه الحجايه ولااني كدرت اسأله.. ماحسيت اله اثنين ادي ع وجهي وكأن الدنيا صارت ظلام وشفته ع شفتي.. حسيت نفسي راد ينگطع ماجنت اريده يوخر بس اديه هي الي دفعته ..
هو خله ايده ع حلگه وضحك وگال كسبتها واخيرا..
اني مگدرت اجاوب واحس نار بخدودي صارت..
رجع يگلي ماكو مبروك؟
مدري شلون طلعت المبروك مني شون جان صوتي مااتذكر..
هو بقه فرحان ويتصرف وكأنه نسه الي سواه قيل شويه.. اتصل بوالده وگله شنو صار ويا اني جنت اباوع علي من جوه لي جوه.
هو هم جان يلمحني بنظرات..
مر الوقت بسرعه ومحجه ولاعلق ع شي ولاكال عن الي سواه.. واني همين طلعت وهم راد يوصلني ومقبلت..
رجعت للبيت واني كل فكري يمه ويم ذيج اللحظه.. وكل ماسمعت صوت ابويه احس عبالك هو يعرف بالي صار واموت بداخلي الف موته..
بقيت بذاك اليوم الليل كله منمت واني اتگلب وزينب تگلي شبيج واني مادري بياعالم جنت.. المهم مانممت اله الخمسه الصبح وگعدت ورا ساعه وعيوني مورمه من السهر.. سويت جاي وماكلت شي بس شربت كوب جاي وطلعت.. من وصلت لگيت ابو موجود وهو ماكو مااجذب واكول ماضجت ..لاضحت وتمنيت هو موجود ويحجي ع الي صار البارحه..
سألت ابو گال اليوم ميجي اني خفت گلت خاف يدري ! بس آني مغلطت هو ابنه الي اتعده حدوده! بس كل هذا جان وسواس وجنت اشوف عبالك الناس كلها تدري..
مادري شلون خلص ذاك اليوم جان كلش ثگيل بدونه.. اتمنيت اگدر اخابره او ادزله مسج واسأله ليش مااجه بَس مكدرت ...
بس وصلت للبيت نمت حتى بدون غدا لان البارحه اصلا منمت
