دار نقاش مع زملاء صيادله ... انا ممكن أتقبل فكره انه الأهل بدهم أولادهم يطلعوا أطباء او صيادله او مهندسين.. إحنا شعب عُقد ألقاب.. صح .. وممكن كمان أتقبل انه الشاب او الصبيه يدخلوا كليه مش اللي نفسهم فيها وإنما عشان رغبه الأهل ... طبعا استوعب انه ممكن هيك طلاب يعانوا اكتر من غيرهم ويطولوا حتى يتخرجوا.(وفي منهم بينجحوا ويبدعوا). في منهم يفشلوا فشل ذريع ويتحمل الأهل النتيجه.. ممكن يغيروا التخصص.. انما هذول اللي تخرجوا وانطلقوا في المجتمع بمهنه ما بيحبوها.. شو وضعهم؟؟ بدنا نضل نلوم الأهل .؟؟ بدهم يضلوا يفكروا إنهم في مهنه ما بيحبوها وبالتالي لا يبدعوا فيها ؟ بدهم يضلوا حاسيين انه تخرجوا بالعافيه؟؟ انا برأيي انه الحق هالاهل أولا .. اللي مش مقدرين القدرات المختلفة لاولادهم.. مش (لازم تطلع زي أخوك) ولا (شوف ابن خالتك كيف؟) ولا (ابن الجيران شو صار؟).. ثانيا الحق عالمدارس اللي ما بتعرف توجه طلابها شو يدرسوا حسب رغباتهم وقدراتهم .. تذكرت هلق كيف لما كان ابني بالتوجيهي كانوا يستضيفوا كل أسبوع اب او ام يحكي عن مهنته.. وانا رحت حكيت عن الصيدله ..الحقيقه ما منقدر نلوم الاولاد في هذيك المراحل .. اللوم بيقع عالخريج .. اللي طالع عالمجتمع ولقي حاله عمره ٢٤ او ٢٥ وهو مش سعيد بمهنته اللي فُرضت عليه..!! بطّل صغير .. مستقبله قدامه.. نجاحه بإيده.. ما في فايده من لوم الأهل او لوم الظروف.. وقع الفأس بالرأس.. يحط عقله برأسه ويشتغل على حاله.. يطور مهنته ..يشوف شو ميوله بالزبط ويستغلها في شغله.. يتطلع للأمام.. للأمام وبس .. يتوكل على الله .. والله يوفق الجميع..#من يوميات_صيدلانيه.
