حدثتني والدمعه بعينها.. :
لو كنت أعرف
لو كنت بس أفهم عالطاير
كان يمكن ما طلبت الطلاق ..
١٤ سنه زواج إكتشفت الان اني ما كنت أفهم على زوجي..
كنت أفكر انه بيغار من اولاده .. شايف اهتمامي فيهم وبقصصهم الكتيره .. اربعه مش مزحه.. ما كنت ملحقه عليهم وعالبيت وعلى تدريسهم والطبيخ وأهلي وأهله.. لما كان ييجي من شغله أحس انه بيخترع المشاكل اختراع..
رشفت من قهوتها وتابعت تحكي لي:
أنا كنت أتجاوب معه .. يعصّب أعصّب فيه .. ينكّد أكمل نكد.. مش عاجبه اشي.. دايما عصبي ومنرفز.. لا بده يروح ولا يجي.. ولما اطلع أغيّر جو أنا والاولاد عند اهلي او واحده من صاحباتي أرجع آلاقيه مستني فيّ ينكد عليّ ويطلّع المشوار على راسي!!!!
مسحت دمعه نزلت وكملت تقول :
مش إني أفهم !! مش إني أستوعب!!
كان كل الموضوع انه بده يوصل رساله بطريقه خطأ طبعا انه (أنا هنا)..!!! كنت متأكده انه ما بيحبني.. هو بده اياني أبقى بالبيت شغاله وطباخه ومدرّسه وشوفير وووو.. أصلاً احنا تزوجنا زواج تقليدي.. زواج صالونات مثل ما بيقولوا.. أعجبته .. متعلمه ومن عيله وجمال متوسط .. ومع اني بأشتغل كنت .. بس هو بده زوجته تقعد بالبيت تهتم فيه وفي الاولاد.. أعجبني هالحكي لإني انا كنت تعبت من الشغل وطالما مش مضطره ووضعه المادي مريح .. أتفرغ للبيت أحسن..
تنهدت مع شريط الذكريات وتابعت:
آخر كم سنه قبل الطلاق تأزمت كتير .. غيّر شُغله .. مديره كان متعب .. يجي يتفشش فيّ بالبيت.. مش اني استوعبه !!.. أتقبّل تعصيبه!!.. أفهم انه هو مش قادر يعبّر عن ضيقه!!.. خصوصاً مع الالتزامات اللي زادت عليه بالبيت مع مدارس الاولاد الخاصه وطلباتهم الكتيره.. حاولت جهدي نعيش بمستوى متوسط.. ما كنت متطلبه أبدا.. بس هو كان يتضايق لو حد من الاولاد طلب اشي وما قدر يحقق له اياه..
كل اللي بأعرفه انه عيشتي صارت صعبه .. وكلها نكد وصياح وتعصيب ومشاكل على أتفه الاسباب.. انتهت بالطلاق .. أصر يطلع هو من البيت وأبقى انا والاولاد... ما حرمتهم من بعض.. وهو متكفّل بكل المصاريف..
أحست اني متعاطفه معها وما حبيت أقاطعها..كملت تقول:
ندمانه انا.. كان لازم فهمت .. ما كان لازم فرّطت بزواجي.. ما حدا كان راضي عني .. أهلي كانوا شايفين زوجي كويس.. مش شايفين نكده بالبيت ..
الولدين الكبار صاروا مراهقين والتعامل معهم صعب.. بدهم أب يكون صارم معهم.. انا تعبت الصراحه.. البنات صغار ويادوبني عليهم..كل اشي عليّ.. والحمل ثقيل.. لو كان معي بنفس البيت .. كان أكيد أهون.. هو ما تزوج بهالسنتين .. ومش عارفه كيف ممكن أوصّل له إني مستعده نرجع لبعض.. ومش عشان الاولاد.. وإنما عشان انا اكتشفت انه احنا ممكن نستمر مع بعض لو قدرنا نعبر أكتر عن مشاعرنا.. لو قال لي انه في اشي مضايقه بالشغل بدل ما يقلب علي البيت فوقاني تحتاني وهو يتفشش.. مواقف كتيره صارت .. الان بأشوفها بمنظور آخر .. قدرت افهمها صح ..
لو حطينا الكرامه على جنب.. ممكن نرجع لبعض..
انا مستعده .. مش عارفه اذا هو ...مستعد؟؟؟
#من_قصص_الحياة
#فضفضه_مع_فنجان_القهوه
#زوجك_من_اولوياتك
