اليوم بالبنك .. عم أودع فلوس وفي أمان الله .. موظف جديد .. اهلا وسهلا .. شوي ولا هو .. بيتطلع في الشاشه وبيبحلق! انا طبعا مش شايفه شو في عالشاشه اللي قدامه!!..ست غاده ، متأكده من رقم الحساب؟؟ .. نعم متأكده .. رجع يفنجر عيونه ويتطلع بالشاشه 😳.. بعدين يزم حواجبه .. يقطّب جبينه!! .. شو في يا زلمه ؟؟ خضيتني! شو صاير بحسابي؟؟ ..😖.. رجع يقرّب عالشاشه ! بعدين قام نادى مديره ! .. خير اللهم اجعله خير !!.. مديره بيعرفني.. اهلا دكتوره .. بس شاف الشاشه فهم .. قال لي : انت شكلك قدمتِ أوراق تحديث معلومات الحساب وجماعه الكمبيوتر في هذه اللحظه موقفين الحساب عشان عم بيحدثوه! .. طيب مش مشكله بس هيك قلقني الموظف ! قلت حسابي انلطشت الفلوس اللي فيه ! أينعم هم كلهم كم ملطوش بس كاتبه فيهم شيكات !!😂.. بعدين شو قلت للموظف : بتعرف شو عملت انت فيي هلق ؟؟ زي لما صيدلي لسه جديد عالشغل وأجته وصفه ادويه قلب ولا ادويه اكتئاب .. وصار يتطلع بالمريض ويرجع يتطلع بالوصفه ! ويفتح عيونه 😳.. بتكمل لو سأل المريض : قديش عمرك عمي ؟؟ له له له ! والله سلامتك الف سلامه ! وراح نادى الصيدلي المسؤول عشان يشوف الوصفه !!😂.. ممكن هيك مريض يروح فيها !! 😂.. مشي الحال بالبنك وطلعت .. بس عن جد مش موقف سهل .. لازم الواحد يتعلم انه يخفي ردود فعله ويكون تصرفه محايد ..في لمسات فنيه في كل مهنه.. بكل هدوء ومن غير ما يحس المريض او العميل او او .. انه في اشي!! يعني انا الله سترني اني في منتصف العمر ! لو صغيره ممكن جلطه تموتني!! ولو كبيره يمكن قلبي ما يستحمل الخضه ! 😂😂😂.. #يوميات_صيدلانيه
