لؤي وهمسه

2

بقيت ليلتها بالمستشفى واني بس افكر بمستقبلي اللي راح وشلون راح اكمل حياتي وكليتي ومنو ترضى تتزوجني وانه اعمى حياتي بلحظه انقلبت 180درجة تخربطت كل موازيني انهدمت كل طموحاتي وتبددت كل احلامي ونمت واني بس اتفكر بحياتي الجاية وشلون اتعود عالوضع الجديد وبالاخير سلمت امري لربي ونمت
ثاني يوم الصبح طلعت من المستشفى للبيت طبيت البيت ونظران الحزن بعيون اهلي تذبحني طبيت لغرفتي اول مااجت عيني على كتبي ومراجعي ودفاتري تنهدت وكمت جمعتهن بصندوك كلهن وناوي احركهن اجت امي سالتني شسوي بيهن كتلها احركهن اني راح اترك الكلية بعد مالي واهس اكمل امي -اذكر الله ابني انت متوفق بدراستك ذيج السنين كلها انت تطلع الاول على ربعك لاتضوج الاما نلكالها حل
لؤي -يمه ياحل هذا شتتوقعين يعني ادرس واتعب واصير دكتور واني اعور شلون اطيب الناس واني مالاكي دوه لعلتي ومنو اليقبل يحط ثقته بطبيب اعور شلون اسوي عمليات يمه فدوة كلش تعبت ومابيه حيل احجي اتركيني بهمي
امي -ماشي يمه نام انت وارتاح وانطيني الصندوك احركه وخليها على الله
طلعت امي وبيدها الصندوك واني تمددت بفراشي حسبة تجيبني وحسبة توديني ونار شاعلة بصدري وعبرة خانكتني وبقيت بغرفتي مااريد اطلع واشوف الحزن بعين اهلي
العصر اجو اهل الولد ابوه واخوته وعمامه وشيخهم وجان لازم احظر وبدو يحجون ويتناقشون ويتجادلون واني ساكت وصافن بالي شارد مو يمهم بس سمعت ابو الولد يتعذر ويتاسف ويحجي على ابنه ابو مشاكل وشلون شالع كلبه وكال ينطي بنته فصلية اني هنا انصدمت وردت اصيح عليه بس عمي لزمني وكعدني شوفو شكد صعبة عالبنية من تنطي فصلية بس صدكو هي اصعب على الولد لان يحس بنقص او عيبة تلازمه طول عمره ابوها كال فصلية ومبلغ مالي توقعت ابويه راح يرفض بس فاجأني قبل الفصلية والمبلغ المالي كاللهم جوه الفراش اني ضليت صافن ابويه ليش هيج كال وبنفس الوكت جرحني كلامه حسيت نفسي بيه فد عاهه اوشي جان شعور غضب على زعل على جرح على حزن ماادري شلون اوصفه من طلعو الناس كتله بوية انت طيحت الفلوس ليش ماطيحت الفصلية اني مااريد اتزوج ابوية -مايصير ابني تريد الناس تاكل وجهي شلون تضل بدون زواج واذا نويت تزوج شكد نضل نتخطب ببنات الناس وذيج من ذيج الترضى بواحد اعور ابني اخذها وتوكل على الله ولاتشلع كلبي ماكافي كليتك العفتها وانه كاسر ظهري عليك ومااعول يمته تتخرج وافرح بيك وهالفرحة كسرتها بداخلي..