لؤي وهمسه

3

انطاهم ابويه مجال 10ايام ويجيبون البنية ويوم العرس نعقد سيد وورى العرس بيوم نروح نعقد محكمة ونتنازل عن ابنهم ومرت ال10ايام هم على كلبي وابويه وامي قررو يسوون عرس كامل خطية اشترو غرفه اخشاب وفراش وذهب وملابس للبنية وحضرو مصاريف العرس والعشه بالمناسبة نسيت اكلكم احنه عايشين ببستان مو بالولاية وبستانه عامر بالخيرات تمر اكثر من نوع وتين ونبك ومخضر وبيه حقل دواجن وحقل عجول وابويه مسوية بحيرة صغيرة مال سمج يعني مو بيع النه نربي للبيت سمج لان ابوي دومه عنده خطار وبيتنه واسع وجبير وابويه باني لكل واحد سويت خاص يعني غرفه وهول وحمام
اجه اليوم العاشر وانه هاي الفترة كلها بس افكر بالبنية خطية شلون تقبلت الموضوع انه
ولد ومدا اتقبل الوضع هي شلون وشلون شكلها وشكد عمرها وشنو دراستها شنو تفكيرها وتعبت من كل هاي الأسئلة الظهر تقريبا اجو اهلها جابوها وطلعنه بالباب نستقبلهم اني وابوية وعمي واخوتي نزلها ابوها وعمها من السيارة طبعا بس همه جايبيها ومزينين السيارة مال زفة نزلت لابسة بدلت عرس ومبركعة من فوك لجوه مامبين منها شي ولزمها ابوها وكادها ووصلها لكبال ابوي سلمو علينا ابوية مخوزر عليهم بس بضحك -هاي شنو شو بدلة وسيارة عرس موكلنه ماكو عرس ابوها-حجي ابو لؤي اعذرني ترى هاي البنية وحدة على 5ولد وكظيت العمر وانه احلم باليوم اللي تكبر واشوفها ببدلة العرس واسلمها لرجلها
لؤي-اني انصدمت وانعصر كلبي عليها واسمعها تبجي يمكن خطية من يوم الفصل تبجي استخطيتها كلش الله يكون بعونها
ابوية -حجي لايظل بالك طلعت من بيت ابوها وطبت لبيتها ولعلمك انه اتشاقى وياك ردت اكسر الزعل شويه واطيب خاطر العروس لعلمك انه اشتريتلها غرفة اخشاب وفراش وذهب وملابس والعصر عازمين العالم على حفلة وعشة يعني عرس حالها حال كل البنات موبس لخاطرها بس ابني واريد افرح بيه ابوها -انه اشكرك حجي ابو لؤي والله انت ابن طيب واصل طيب ابوية -شوف صح انه شيخ عشيرة بس الله شاهد اكثر من مرة اكعد بفصل ويصير فصلية واطيحه لأن ماكو ضرر صايب الطرف الثاني بس بحالتنه ابني اتضرر خطية ولازم نداوي جرحه ومايضل زعل بين العشيرتين
ابوها -اي والله صح كلامك هسه تطمن كلبي على بنيتي انداريت على بنتي بست راسها ودنكت باست ايدي وحسيت بدموعها نزلت على جفي كتلها بوية الناس تربات شيوخ لاتخافين منهم صارو اهلج بعد رفعي راسي كدامهم وهذا عمج سلمي عليه
لؤي-اندارت على ابوية ودنكت باست ايده وابوية باس راسها ويكلها هلا ببنيتي بيتج هذا واحنه اهلج وان شاء الله تشوفين كل الخير عدنه وسلمو اهلها علينه ومشو وابوية كادها من ايدها يريد يطببها للبيت صحت عليه حجي وين هاي مرتي لاتشوفك امي وتنجلط واضحك
ابوية -انداريت عليه انجب لك بعدك ماعاقد عليها باليل تشوفها وامك بمية عروس ماابدلها وهي تدري انداريت على اخوية وصحت مرتضى جيب الطلي وذبحه جوه رجليها اجه مرتضى وجاب الطلي وذبحه جوه العروس وطببها ابوية وامي ومرت عمي وعماتي يهلهن ويطشن جكليت طببها ابويه لغرفتها وصاح على امي ممنوع احد يطب يمها خلوها ترتاح وتتالف عالمكان واندار عليه وانت ياله اطلع بره اكعد يم اخوتك وعمامك...