يمه ماناوي تزوج واشوفلك بنيه بت اوادم
يمه منو تقبل بيه الله يخليج سدي الموضوع خليني هيج مرتاح
يمه الرجال ميعيبه بس اخلاقه وجيبه وانت ماشاء الله خلقه واخلاق ومال الله موفقك بشغلك
وبنات الاصول هوايه انت بس انوي واني اشوفلك مره
الله كريم يمه هسه مو وكتها اني ما متهيئ نفسيا للزواج اني يادوب بروحي متحمل نفسي والحاله الي اني بيها انتوا اهلي اتحسس منكم ومرات اخذ على نفسي بمواقف انتوا متقصدوها
شلون اتحمل نظره العطف او اي موقف مقصود او مو مقصود من وحده غريبه اتزوجها بين ليله ويوم
دخيلج يمه سدي هذا الموضوع بعد لتفتحي ويايه الخير والبركه بأخوتي اتزوجوا وجابولج احفاد
يله يمه براحتك بس لتضوج اني فتحت هالموضوع علمودك مو قصدي اجيبلك ضيجة خلك
ادري بيج يمه تفكرين بيه وبكبرتي بس اني هيج مرتاح ما اريد اجيب لنفسي هم
ليضل بالج يمي الله ينطيج الصحه وطول العمر وما احتاج لاحد
يله اروح لغرفتي تصبحين على خير
وانت من اهله وليدي الله يرضا عنك ويرضيك مثل ما بار بيه وبأبوك
علاء خليني اعرفكم عن نفسي عمري ٣٣سنه اول ما ولدتني امي جنت سليم وبعمر السنتين صار عندي مضاعفات مرض شلل الاطفال ومصارتلي جاره اهلي ما بقوا دكتور ولا مستشفى
بقيت طفولتي گلها مخليلي برجلي مساند واستعين بعكازات
ومرات استعين بكرسي متحرك اذا اتعب
الله سبحانه وتعالى اخذ مني شي وعوضني بأشياء
اولها جان دماغي كلش يشتغل والكل يضربون بيه المثل بالذكاء
وبقيت طول فترة المدرسه متفوق
كملت صف سادس علمي وطلعت معدل ٩٤ كل اهلي فرحوا الااني جنت قافل ما اداوم جامعه لان مختلطه وشفت وضعي بالاعداديه والبتدائيه والمتوسطه بس ولد مجنت اخجل
لكن بالجامعه اكو بنات وراح اكون ملفت للانتباه راح احس بنقص
وايضا لان مااحب اشوف نظرات التعاطف بعيون الناس
وكعدت تقريبا سنتين ما اقبل اداوم كليه
عندي ٦اخوه ٤اكبر مني ومتخرجين واحد منهم مسافر اسمه زيدون و٢اصغر ماعندي خوات
واحد من اخوتي مهندس كهرباء اسمه عبد الله
فتره ورا من اتخرج اشتغل واتعلم من صديق والدي بتصليح كهربائيات السياره
ورا سنتين ٣اتوفى الرجال وولده عرضوا الورشه للبيع اخذها اخويه عبد الله يشتغل بيها والحمد لله جانت اموره ماشيه
من ما قبلت اكمل كليه گتله اريد اشتغل وياك كلت احسن من كعدت البيت
خلال فتره شغلي اتعلمت واخذت خبره بتصليح كهربائيات السيارات والمحركات
ورا سنتين دخل بعقلي اكمل هندسه ميكانيك وصدك قدمت وداومت طبعا اول فتره جانت كلش صعبه عليه من ادخل للقاعه واشوف الكل تنتبه عليه ومتعاطفين ويايه لكن جنت اتحمل لان براسي هدف مشت الايام وثبتت تفوقي صرت من ٣الاوائل بقسمي صف ثالث حبيت بنيه يمكن مو حب الاكثر اعجاب جانت كلش مؤدبه وجمالها متوسط بس مثقفه ورزنه فاتحتها
حاولت ترفض بصوره متأذيني لكن بالحقيقه هي ذبحتني وخلتني بعد ما اتجرأ انعجب بوحده او احاول ارتبط سوت عندي عقده من گلتلي متأسفه انت الف وحده تتمناك لكن اني قبل اسبوع تقدملي ابن عمتي وقبلت بي
بالاول صدگت بيها لكن البنيه ماشفتها لابسه حلقه بيوم وبصف رابع شفتها ارتبطت بعلاقه ويا ولد ويانا بالجامعه لكن بغير قسم
عرفت رفضتني بسبب رجلي بوقتها كلش انقهرت
ومن رجعت للبيت من عصبيتي بچيت وبقيت اضرب العكازه اريد اكسرها انهاريت لحد ما دخلوا عليه اخوتي اكبر مني احمد وشهاب لزموني وبقوا يحجون ويايه لحد ما هدأت وقررت ما اكمل
لكن ثاني يوم كعدت الفجر صليت واستهديت فكرت صح مو مال اضيع تعب ٣سنوات علمود وحده
واخسر نفسي وما بقالي كم شهر واكمل
رجعت اداوم والحمد لله اتخرجت من العشره الاوائل بالقسم كله
وطبعا بهالفتره بقيت اشتغل ويا اخويه عبد الله بوقت فراغي ما قطعت لان الحمد لله الله فاتحها بوجهي من ناحية الرزق الزم التراب يصير بيدي ذهب حتى اخويه عبد الله يحجي لاهلي يگلهم بالايام الي علاء يشتغل بيها ماشاء الله الوارد اضعاف
من خلصت الجامعه رجعت اشتغل وياه يوميا الى ان الحمد لله صار عدنا خير من الله ورا ٦سنوات من تخرجي گتله خلي نفتح ورشه چبيره تصليح وقطع غيار وغسيل سيارات كلها بمكان واحد
وهاي صارلي سنه اشتغل بالورشه الجديده ويا عبدالله وبعد اخوتي ال٢ الصغار عيسى وداوود /بقيت يا شغله اشوف بيها ربح ادخل بيها اشتريت سيارتين شغلتها تكسي وحتى بالعقارات اشتغلت حباتي كلها شغل جنت مخلي هدف اني ما اتزوج ومراح يصير عندي ضنى يشيلني بكبرتي خلي اجمع فلوس هي تشيلني بكبرتي والكل يداريني لان فايدهم وبالفعل
خلال هالسنوات اشتريت بيت وعندي غير السيارتين التكسي سياره خاصه الي مال معوقين
وكدرت ازوج اخوتي الصغار
وبقت امي يوميه اتزن براسي تريدني اتزوج واني قافل
ورا تقريبا ٤اشهر عندي صديق من ابام الطفوله اسمه نمير اجاني گلي علاء رايد منك خدمه گتله گول محتاج شي
گلي عمي ابو مرتي صارت عنده جلطه وكعد بالبيت وخطيه برگبته بنات و ماعنده غير ولدين واحد ٩ والثاني عمره ١٧سنه اريدك اتشغله وياك اني تدري بيه موظف وحالي على كدي لو اكدر اساعدهم ما اقصر بس يادوب الراتب مكفي بيتي واهلي
ودا اشوف امورهم ادهورت وعمي الرجال ادمي ويخاف الله وعزيز نفس
مكدرت اشوفه بهيج وضع ردت اساعده واتذكرتك قبل فتره گلت تريد عمال امينين
وهذا ياسر نسيبي كلش خوش ولد وفقير بس المشكله عنده مدرسه الصبح ادري دا اثقل عليك بس شغله دوام مسائي لخاطر الخوه
علاء:لك نمير انت لو تريد عيوني انطيكياها والولد شوكت ميكدر يجي يشتغل خلي يشتغل ولخاطرك ايام الامتحانات ليجي ويوميته محسوبه
نمير :ادري بيك نفسك طيبه الله ينطيك على كد نيتك ويرزقك من واسعه
علاء:ثاني يوم داوم ياسر انقهرت عليه لان مو ضخم ناعم وضعيف ومبين شاطر لان جايب كتبه وياه
صحته گتله تعال انت شغلتك تساعدني بالمكتب انت دتشوف رجلي اتعب من الوگفه والمشي بالعكازات
جاوبني بس اني اريد اتعلم صنعه گتله اعلمك بس مو هسه انت باي صف گلي رابع اعدادي جاوبته خلص سادس وابدي اعلمك واذا بيك خير وطلع هندسه مثلي تتعلم وتصير احسن من عندي
الولد شفته فرح وارتاحلي
بقيت اسولف ويا عن اهله عرفت عدهم ٤بنات وحده متزوجه الي هي مرت نمير ووحده ارمله عدها بنيه ووحده صف ثالث كليه والرابعه بالمتوسطه اصغر من ياسر بسنتين
مرت الايام وبقى ياسر يشتغل ويايه واني مداري ما احمله فوگ طاقته واغلب الوقت هو كاعد بالمكتب يدرس من احتاجه يجيبلي شغله اصيحه
وفد يوم خلصنا شغل دنسد الورشه
طبك نمير وياه مرته اني اعرفها بيناتنا سلام البنيه بت اوادم كلش ووحده ثانيه ورا بالسياره جاي ياخذ ياسر بدربه لبيت اهل مرته
سلمت وبقيت شويه احجي وياه صارت عيني على بنيه ورا شكد جميله الله يستر عليها بحظنها طفله
من گلي نمير اجيت اخذ ياسر اذا متحتاجه لان دا اوصل اخت المره لبيت عمي وكلت اوصله بدربي
جاوبته لا ما محتاجه صحت على ياسر يروح ويا نمير وبدماغي هاي الارمله الي گلي عليها ياسر
من رجعت بقيت افكر من ورا زن امي ليش ما اخذ هاي البنيه هم اكسب اجر واربي بتها اليتيمه وهم البنيه راح تقبل بوضعي لان ارمله وتحتاج معيل والي فتهمته الاب مريض وكاعد بالبيت
بقيت كم يوم امخمخ الشغله براسي قبل لا اگلها لامي
الصدك حنيت ارجع للبيت الگى مره حلوه تنتظرني ا تشوف طلباتي وتريحني بعد تعب الشغل
وحنيت يصير عندي طفل البنيه عجبتني ومن شفت اخلاق مرت نمير وياسر اخوها گلت اكيد اهلهم تعبانين بتربيتهم
قررت افاتح نمير. ورا ايام گتله اذا افكر اتقدم لاخت مرتك الارمله
تقبل بيه
گلي ليش انت شبيك ومتقبل بيك عمي الناس بهالوكت ادور الستر لبناته ويا رجال شريف ويعيشها مرتاحه وانت الشغلتين عندك
گلي لتضوج مني بس انت عندك عقده من ورا رجلك اذا اكو شخص سببلك هالعقده مو معناها ماكو ناس تعرف الله وتعرف هذا قدر ونصيب من الله مو من ايدك
گتله لعد اريدك ترتبلي طريقه اشوف البنيه وامي هم اتشوفها بس ما اريدها تدري لان اريد اشوفها واقتنع بيها راح ترضى بوضعي واردلك خبر يله تفاتحها لان الصدك اني لحد هسه متخوف وما ادري شلون فاتحتك بالموضوع واني بعدني ما مقرر ولا ناوي مية بالميه على موضوع الزواج بس گلت بلكت من اشوفها ارتاحلها للبنيه اتوكل وانت لو مو اخويه وتدري بيه غرضي شريف ماجان فاتحتك بالسالفه لان ادري بيها صعبه
نمير :لعد راح اخليها تجي يمنا واعزمكم انت والحجيه على غدا
تلتقون وتشوفها والله حتى امي ذاك اليوم سألتني على الوالده صار فتره مجايتنا
علاء:الحجيه هالايام ملتهيه تركض ورايه اتريد اتزوجني
والصدك مراح اگلها حتى من نجي نتغدا يمكم الى ان اني اقرر ميه بالميه يله احجيلها لان معناها راح تبقى اتزن براسي بس تعرف
منير :ضحك هم حقها خطيه يله لعد اخابرك ونرتب الموعد
علاء :انتظرك
ام مريم
اماسي الليل
أنت تقرأ
يا احلى نوبات جنوني
Romanceعلاء شاب يمتلك اعاقه تسبب له العزله والاصرار على النجاح بعيدا عن عالم الحب والنساء الى ان يلتقي برفل من ايقضت فيه مشاعر القلب الحي