اني عصبيه وعاطفيه وكلش متأثره بحب الافلام والمسلسلات لكن عاطفتي ما ابينها يتخيلوني ما اتأثر او انقهر على شي لكن بالحقيقه غير
اليوم من شفت علاء بالطريق ويا امه انتبهت عليه حلو بس حاولت اتجاهله لان حسيته لح وهو الي ديحرك امه تحجي ويايه
ومن شفته باب بيت ريا اتفاجئت بي واكثر بعكازاته ما اعرف كلش اتأثرت ومن دخل للبيت بقيت اغلب الوقت من هو يحجي ويا نمير اباوع عليه عجبتني ثقته بنفسه وشفته اكثر من مره يضحك يعني روحه مرحه حلو الانسان عنده معاناه بحياته وبعده يضحك ومن عرفته هو الي مشغل ياسر اخويه زاد اعجابي بي اكثر
لان سامعه من خلال الكلام بالبيت من ياسر وابويه هو انسان محترم وبسيط ومقدر عمر ووضع ياسر الي جبره يشتغل وهو بعده بالمدرسه ودائما يحثه ايكمل دراسه
بقيت متعاطفه وياه الى ان انتبهت عليه كل ميشوفهم ملتهين ينظرلي نظرات بيها مغزى من فوگ ليجوه على اساس معجب
اني بالاول جنت مستحيه بعدين شفته صلف اتجاهلته
بس من شفته وگف ومسيطر رجع وكع على القنفه انقهرت عليه
لان نمير شايل الطفله رحت گتله اساعدك
جاوبني مو هسه من تجين يمي جاوبته جواب على صلافته وثقته الزايده بنفسه
من فاتحتني ريا كعدت بغرفتي ورا ما رجعت للبيت فكرت مواصفاته كرجال حلوه مابي عيب
وشغلت رجله هاي مو بأيده بس اني بداخلي ما مقتنعه شلون راح اكدر اتعامل وياه وشلون اتحمل انتقاد الناس
اول ما اجى بالي الرومانسيات
اريد رجال يركص ويايه سلوا بالعرس ومن نروح للفندق يشيلني ويدخلني للغرفه
الشغله صعبه مدا اتخيل اكدر اتكيف ويا وضعه احسن حل اردلهم خبر اريد اكمل دراسه مدا افكر بالزواج
بس اخاف ينقهر ويتأذى ويبطل ياسر اوف هاي شلون راح احلها
طلعت حجيت الموضوع لابويه گلي بابا اذا مامقتنعه براحتج محد يجبرج واذا على ياسر يدورله غير شغله اذا بطله
رحت دكيت التلفون على ريا
الو هلو ريو اگلج اني ما افكر بالزواج ردوله خبر للولد باجر
ريا :ادري شبسرعه فكرتي مصارلج ساعتين من رجعتي من عدنا
رفل :ريا مابيه حيل افكر بموضوع اني مامقتنعه بي عفيه خليني براحتي ما كو دا عي استعجل مدخلت بالعمرين حتى انجبر اخذه للولد
ريا :بكيفج حبيبتي /مع السلامه /مع السلامه
منير: ها ريا شبيها رفل
ريا :متقبل بعلاء تگول اريد اخلص دراسه
منير :براحتها احنه الي علينا سوينا سبحان الله يعني هو من فكر يتزوج طلعت بوجهه رفل الي متقبل بي وهو گلي لو هي لو ابطل واشيل فكره الزواج من راسي
واني بالاصل جايبه يشوف رشا
وتريدين الصدك انقهرت عليه هسه .....من رفل مقبلت ....هسه ينقهر لان شفته مستقتل عليها وعنده أمل تقبل بي
ريا :اوي منير لتحسيني بتأنيب الظمير يعني مابيدي شي
هاي قافله گله على رشا وطلع رفل من عينه گله انت رايدلك وحده فاهمه وتسندك وعقلها مقارب لعقلك وتفكيرك هاي رفل بعدها صغيره وفارق العمر بيناتكم اكثر من عشر سنوات يعني راح تتعب وياها ومتتفاهمون
منير :ان شاء الله باجر اروحله ارجعله خبر يله امشي انام اني هلكان من التعب
علاء:من صعدت امي بالسياره گلتلي عجبتك البنيه مو حبيبي
گتلها يمه اذا مصارت من قسمتي بعد ما افكر بموضوع الزواج
من هسه دا اكلج مو تبقين اتزنين براسي اذا ما وافقت عليه
نسد الموضوع بعد ومنفتحه
الام :لا ان شاء الله توافق زين انت ليش ما ردت اختهم رشا والله يتشابهون والبنيه جميله بس طولها يسوى عشر نسوان
گتلها يمه هاي دخلت قلبي مو بيدي ادري رشا حلوه وحتى ترهملي اكثر لان ماره بتجربه زواج سابقة واكيد تعرف المسؤوليه
بس الي جذبتني ودخلت قلبي رفل
وصلنا للبيت رحت لغرفتي كعدت اتفرج تلفزيون بقيت اريد اعرف نمير ومرته فاتحوها بالموضوع اليوم لو بعدهم للمغرب رحت للورشه اشتغلت كم شغله وراها غلقنا الورشه ورجعنا للبيت اني واخوتي عيسى وداوود من فتنا للبيت وتلكتهم نسوانهم عيسى مرته حامل وداوود عنده ولد صغير وانخبصن برياجيلهن وبالعشا
حسيت اني ماعندي حياة ولا عايش مثل الناس ولا مرتاح مو غيره من اخوتي بالعكس اني ما اقصر وياهم .......حتى اشوفهم مرتاحين واعوض النقص الي بحياتي اكمله بيهم وبجهالهم
من دخلت لغرفتي اتخيلت لو رفل تصير مرتي ومن ادخل للبيت تتلگاني اخذني الواهس وكمت اتخيل غير امور حتى من صاحوني على العشا گتلهم ما اريد.... مردت اطلع من خلوتي وهي ويايه وبخيالي الى ان نمت
ثاني يوم الجمعه
فتت غسلت ورحت للجامع اصلي صلاة الجمعه اتلاگيت بنمير بالجامع ورا ما خلصنا الصلاه سألته
ها نمير فاتحتوا البنيه بطلبي
نمير :والله علاء البنيه صغيره وما بالها سالفة الزواج تگول اريد اكمل دراسه واتعين
وكعدت حجيتله كل الي فهمتني عليه ريا بالحرف وگتله ترى رشا ام بيت وسباعيه وتعينك وحاولت اطلع رفل من عينه بس
جاوبني ادري رشا تفيدني اكثر بس رشا مشفتها غير اخت الي شفتها تصيرلي مره هي رفل بس ماطول ما الي نصيب هاهيه الحمد لله اني راضي بقسمتي وبلي الله كاتبه رحم الله والديك سويت الي عليك
بعدها طلعنا كل واحد لمكانه
علاء: من طلعت ركبت سيارتي جنت كلش مقهور وبقيت احجي ويا نفسي انت ليش مقهور والرد متوقعه ..... ليش بنيه حلوه وطالبه كليه بعدها صغيره تقبل بواحد عنده مشكله وهي اكيد
كدامها العمر ومواصفاتها اكيد تجيبلها احسن الخطاطيب
هاهي اني هم جربت وحاولت ارتبط ومصارت اشيل الفكره من بالي لان مابيه حيل اتحمل بعد رفض مره ٣
والبنيه رشا حتى لو اريد افكر بيها بعد متنفع السالفه ورا ما شفت رفل وعجبتني راح تبقى بعيني بنيه ردتها وعجبتني .....ومستحيل راح تصير اخت مرتي يعني اختي.... هاهيه قفلت عن الزواج ابقى عازب احسن الي التهي بشغلي
وصلت للورشه شفت ياسر سلم عليه كعدت بالمكتب سألته والدك شلون صحته
گلي والله بعده هسه ديحاول يحرك ايده وبدا يحجي اسهل من ذيج الفتره
سألته بس انت تشتغل بالبيت جاوبني اي گتله والبقيه
گلي خواتي ميشتغلون وسكت ما حجى عن خواته شي سألته عن مدرسته ودروسه گلي راح تبدي الامتحانات ودا اقرى لتالي وكت حتى اسيطر
گتله لتجي بعد الا من تخلص الامتحانات وراتبك مينقص منه شي واي شي تحتاجه خابرني عندك تلفون الورشه وكتبتله رقم البيت وانطيتهياه
بداخلي اعرف دا اسوي هالشي لخاطرها اني حبيتها لهالبنيه
ودا اسوي اي شي يقربني منها ويخليها تحبني
خلصت شغلي سألته ياسر انت شلون تروح للبيت گلي بالنفرات سألته ليش وين بيتكم گلي بالاعظميه نسيت ....گتله يعني بمنطقتي...... اني اتوقعت بالعطيفيه يم بيت نمير بس اتذكرت هو نمير من جانوا ساكنين بمنطقتنا حب ريا هم من نفس منطقتنا وتذكرت رحت قبل ٧ سنوات ويا نمير بالمشايه لبيت ريا قريب على ثانويه كلية بغداد
گتله انت بثانويه بغداد جاوبني اي
گتله من اليوم متجي الى ان تخلص امتحانات واذا تحتاج شي بالرياضيات والمواد العلميه تعال ادرسك
هسه امشي ويايه دا اوصلك بطريقي الولد مقبل گلي لا اني متعود ارجع لحيت عليه گتله امشي انت بدربي
وصلته لباب بيتهم وطلعت لبيتنا
أنت تقرأ
يا احلى نوبات جنوني
Romansعلاء شاب يمتلك اعاقه تسبب له العزله والاصرار على النجاح بعيدا عن عالم الحب والنساء الى ان يلتقي برفل من ايقضت فيه مشاعر القلب الحي