Sa Hardin

241 4 0

ni YellowLock

ni YellowLock

Sa Hardin

Nang panaho'y lumamig, tila may umaaligid

Na Bubuyog na may pagnanasang hatid.

Ang kanyang pagbulong ay tila pagdidilig

Upang mamasa ang lupa't magkaroon ng banlik.

Itong si Bulaklak na mayuming umiindayog

Nanghahalina gamit ang makulay na talulot

Sa hangi'y isinaboy ang samyong nakakabilog.

Ang sinumang lumapit sa kanya'y mahuhulog.

Ang hardi'y lunduyan ng mga napapagal,

Lalo na ang mga taong sa init ay uhaw.

Nagtatagpo ang mga kaluluwang ligaw

Sa pagnanasang makakuha ng bulaklak na alay.

Ang pagdapo ng bubuyog sa talulot ng bulaklak

Ay naghatid ng kuryenteng dumantay sa balat

Ng bulaklak na maharot kung bumukadkad.

At natukso sa damdaming lalong umalab.

Sinipsip ng bubuyog ang inaasam na dagta

Pamahid-uhaw ang sa bulaklak ay nagmula.

Kakaibang kiliti naman ang sa bulaklak ay nagpasaya

Kaya kapwa nagalak sa panandaliang ligaya.

Ang talulot ay hinipo nang marahang-marahan

Nagpaubaya sa pagbuka ang bulaklak nang tuluyan

Kapwa sumabay sa indayog na mainam

Ang pansariling pakinabang ay ninanamnam.

Ngunit sa anumang halama'y may bahaging maselan

Kahit anong pag-iingat, mayroon paring hawan.

Pinsalang hatid ng bugsong tampalasan

Ang saglit na pagtatagpo, ay dadalhin ng maraming buwan.