انا بهواك

الجزء1

#انا_بهواك
بقلمي همسات الليل( ام آيه)

ياوميض والله خلصت كلبي..
يعني بعدك مصر على السفر!!!
وميض:والله ياامي انسب حل هذا اليه ،خليني اشوف حياتي ترى الراح من عمري مو قليل..
ام وميض:شلون يهون عليك تفاركنه..اني اذا تبات ليله يم جماعتك احس ضايع مني شي هالنوبه تهاجر
والله عيشتك احسن من هوايه ولد، عايش بارقى بيت وسياره عندك وابوك ممقصر وياك..
وميض:علمود هذا الشي اريد اطلع ،لخاطر الله شنو شفت من حياتي ولشوكت ابقى عايش على تعب ابويه واني من راحت شيماء انتهت حياتي..
ترى الشفته من وره العراق بس ضيم وقهر .

وميض هو اسمي وعمري 26 سنه ،خريج اداره واقتصاد مرتب جسمي وشكلي وطولي كلش حلو
من عائله متمكنه ،والدي تاجر جمله بالشورجه واله اسمه ..اني الوحيد على 3 بنات
شهد مزوجه وعايشه بالسويد هاجرت وره السقوط
ورؤى مزوجه حيدر ابن خالتي ضابط وعايشه بالحله
ومينا الدلوعه اخر العنقود طالبة مرحله أولى كليه اهليه
حبيت بنيه من جنت مرحله اولى بقسمي اسمها شيماء وعشقتها حد الجنون واتفقنا نكمل حياتنه سووا..
عشت احلى 4 سنين بحياتي وياها بالكليه..
ومن اتخرجنا خطبتها...
ورتبنا امورنا وسويتلها سويت يجنن بالطابق الثاني بيت اهلي تحلم بي كل بنيه ..
كل ركن بي لمساتها والاثاث وكل التفاصيل على ذوقهااا
وشاء القدر وفرحتي مكملت..

نرجع قبل العرس بااسبوع..
شيماء:هلو حبيبي وميض راح اروح الصبح ويه امي ازور الكاظم نذرت من تصير من قسمتي اروح للامام حافيه
وميض: داتخيلج كاشخه من فوك وتمشين حافيه ورجلج كلها تراب وماسحه الكاظم بتنورتج.
شيماء:عابتلك شكد دمك ثكيل،خو مو راح افتر الكاظم حافيه شنو قابل اتخبلت ،من ادخل من باب الامام راح انزع وابقى بالجواريب ..هم صوجي
وميض:ولج انتي تضحكيني هو اكو واحد ينذر يمشي حافي قحط نذوره عفتيها كلها ونذرتي تروحين حافيه
هسه عوفينه ،ترى ماله داعي روحتج للزياره..
شيماء:ها وميض هاي شنو افسرها غيره لو تفرقه لان انته سني متخليني اروح

وميض:شيماء اني من اخذتج مجنت حاط بالي انتي شيعيه واني سني لان احنه بعائلتنه منفرق وتعرفين زين ..
وانتي تعرفين امي من الحله وابويه من الانبار...بس اني اكره المكانات المزدحمه،وكلش اخاف من التجمعات لان وكتنا طايح حظه ويلعب الف النفس.
شيماء :لخاطري خل اروح، وامي هم تريد تشتريلي هديه العرس من الصايغ على ذوقي حتى تجيبلياها بالسبعه، وقبل الظهر نرجع..
وميض:روحي امري لله ..بس لتقفلين جهازج تره كل شويه اخابرج
شيماء:ان شاءالله حبيبي ،يله روح نام ورايه كعده من الصبح..
شيماء:اني حبيبه وميض وهو عشقي وكل حياتي حبينا بعضنا حب جنوني ،من تخرجنا خطبني ووالدي رفض بالبدايه وصارت مشاكل لان اني شيعيه وهو سني ..ابويه ميفرق بس كال الزمن يغدر وهو الي يفرق بينكم..
المهم والدي وبعد عناء طويل اقتنع وبالذات من التقى بخوال وميض وهمه من الحله.
3 اشهر طولت خطوبتنا وحبيبي مقصر ويايه باي شي سوالي سويت يجنن وكل ركن رتبته بايدي. وقبل العرس رحت للكاظم حتى أوفي نذر عليه..
نذرته لمن يصير وميض من نصيبي ،وهسه صار الوكت لازم اوفي النذر العليه..
شيماء:طلعنه اني وامي من الصبح ووصلنا الكاظميه ورحنا للصايغ واخذتلي امي عقد كارتير كلش حلو هديه عرسي وجان عندي نواقص داكملها..
كملنا مشترا ورحنا زرنا و وفيت النذر ..
واجرنا تكسي دنرجع للبيت..

وميض:ها حبي وين صرتي
شيماء: كملنا شغلنا من ابو الذهب وهسه رايحه للسوك دجيب كم شغله ناقصتني
وميض:لخاطر الله استعجلي لتضلين تفرفرين بهالازدحام ...
شيماء:ان شاءالله حبيبي ..بيباي
مرت ساعه...
وميض:هلو شيومه كملتو لو بعد
شيماء:اي حبيبي هسه راح ازور واوفي النذر وارجع
وميض:بشرفج خلي خاله تاخذلج صوره وانتي حافيه ..
شيماء:شكد مكروه ..ميخالف بس خلصني
مررت مده من الوقت
وميض:ها حبي
شيماء:هلو حبيبي والله اني بالتكسي راح نطلع هسه من الكاظميه..
وميض:شيماء الو الو الو شيماء لخاطر الله جاوووووبيني
ام وميض:اسم الله الرحمن شبيك يمه تصيح
وميض:ولج يوم لحكيني اوف ياربي داحجي ويه شيماء وصار صوت انفجار وهسه جهازها كله مغلق
وميض:كمت اكلب بالتلفون على الاخبار بالفيس ونزلوا منشور
[انفجار سياره مفخخه قرب الكاظميه وسقوط شهداء وجرحى]

وصلني الخبر شيماء ماتت...وماتت احلامي وياها وانتهت حياتي ،وبدت معاناتي،خسرت اغلى انسانه من بعد امي ..حب حياتي والانسانه الي تربعت بكلبي صارت جوه التراب
اسبوع محاط الاكل بحلكي وصار عندي ضعف عام واتمنيت الحكها واخلص من هالحياه الظالمه..
دخلت بحاله كآبه وابتعدت عن كل اصدقاءي وكرايبي..لان الاحساس المريت بي صعب
من الصعب تتعلق بشخص وتفقده للابد
كلشي انتهى وراها حياتي واحلامي وروحي ماتت فراكها كسر ظهري وما كو شي ينسينياها
مرت كم سنه وعشتها بقهر وتعب وقررت اهاجر واعوف كلشي ورايه
اختي الي بالسويد واصدقاءي هم الي قنعوني بالسفر والهجره..وشفت هذا الحل المناسب حتى انسه حزني وآلمي...
اتفقت ويه جماعتي نهايه الاسبوع نسافر
حجزنا لتركيا ومناك نطلع بالبحر لاوربا..

يتبع..
#الكاتبه
همسات الليل(ام آيه)