انا بهواك

15

#انا_بهواك
الجزء الخامس عشر
بقلمي همسات الليل( ام آيه)

سمر:البنيه بيوم خطوبتها الدنيا متوسعها من فرحتها
واني دموعي منشفت دقيقه على فراك وميض
نمت ودمعتي بعيوني ومحاسه بنفسي
وميض:وصلت تركيا الحمدلله ونزلت بفندق وخابرت مينا وكتلها السفره مريحه جانت والحمدلله
وميض:اول شغله سويتها سبحت و غلقت جهازي ونمت من الفجر ومحسيت الى ثاني يوم المغرب
سمر:كعدت الصبح جانت مينا بالدوام وخاله كالتنه
وميض واصل بالسلامه
فرحت حيل لان اخاف من الطياره وبالي مشغول عليه
وميض:كعدت من النوم شبعان ومكتفي سبحت ونزلت اكلت بمطعم الفندق
وخابرت فاروق واتواعدنا ساعه 9 نتشاوف
وميض:جنت مختنك وحبيت اتمشى واتنفس هوا نقي ،وطول الوقت سمر مفاركتني وشاغله بالي وتفكيري..
اكو حديقه عامه تواعدنا بيها اني وفاروق.
بقيت كاعد انتظر لان وصلت بوقت.
وشفت اثنين عشاق التقوا الظاهر من بعد غياب وجان منظرهم يقهر وبقوا واحد حاضن الثاني وبقوه
نزلت دمعتي واتذكرت شلون سمر لمن ارتمت بحضني وتلاكت عيونه..

اخ ياقلبي هذا المنظر هيج مواجع كلبي ومااضن جرحي راح يبرد بشي يوم..
واني سارح باافكاري واجه فاروق وتعارفنه..
فاروق: اكو كروب راح يطلع بعد 12 يوم على وجبتين احطك وياهم
وميض:على بختك حبيب والله اريد اطلع اليوم كبل باجر ،دبرلياها وانطيك ضعف
فاروق:اكو كروب راح يطلع عكب باجر بس والله مااعرف شلون راح ارتبها وياهم
فاروق :اكلك لحظه بس اتصل بشخص ثواني
فاروق:شلونك عزيزي راح نضيف شخص ويانا ويشيل وياك الاجره..(ووووووو............. ) مع السلامه
وميض:ها بشر شلون صفت
فاروق:هاهيه باجر تطلع ،حطيتك بكروب وياهم كم طفل حتى ميصير حمل على اللانش( القارب )ويتوازن
فاروق:يله عيني نتلاقى ساعه 3 الفجر على العنوان هسه اكتبه الك
وخفف من جنطتك حاول تاخذ الظروري بس وتلفونك اشحنه واخذ ستره نجاة(نجاده)
وميض:ان شاءالله ،اودعناك اغاتي
وميض:رجعت للفندق وخابرت اهلي وحجينه ،بس مكتلهم على موعد سفرتي حتى ليضل بالهم..
وميض:خابرت مينا بالليل وادري الكل نايمين،بس حبيت احجي وياها بدون ميدرون..

سمر:نايمين ودك تلفون مينا وجانت حاطته بوضع الهزاز وسمعته وسويت نفسي نايمه
محبيت ادخل بخصوصياتها
مينا:هلو وميض شلونك حبيبي،خير شعندك هسه داك
سمر:سمعت كالت وميض وكلبي تسارعت دكاته على البعد..
مينا:هاي شنو معقوله باجر بالليل تسافر
وميض:ان شاءالله بس لتكولين لاهلي
كلت اكلج انتي بس
وراح ادزلج رقم الولد الي راح يطلعنه خاف متحصليني واسمه فاروق
مينا:حبيبي الله يحفظك ان شاءالله
وميض:يله حبيبتي ام لسان نحجي باجر
والزمي السانج زين
سمر:مينا سدت التلفون واني بقيت اتكلب بفراشي والخوف والقلق كتلني

سمر:كعدنا الصبح واني مااشتهي كلشي ومينا بالدوام،ساعدت خاله بالبيت كالعاده
واني عفت المدرسه لان حتى لو اكمل سادس مراح اكدر اداوم كليه واني بهذا وضعي
سمر:وميض مراح من بالي وبقيت خايفه وادعي ربي يحفظه ويسرله سفرته
لان اني سامعه بالسفر بالبحر(التهريب) شكد تصير حوادث غرق لان القوارب صغار ومزدحمه
وميض:كعدت حضرت جنطتي واني اصلا مجايب بس شي قليل يعني جنطتي خفيفه
وطلعت اشتريت ستره النجاة
وحظرت كلشي
وميض:حجيت ويه مينا وكتلها تدعيلي
سمر:مكدرت انام بليلتها كمت صليت طلب حاجه ودعيت وقريت قرآن
وميض:وصلت المكان على الوقت وشفت فاروق والجماعه الي راح اسافر وياها
وجنا كروبين مقسمين على زورقين
اني حطوني قارب بي كم طفل حتى يتوازن الحمل..
صار الوقت وطلعنا،وكعدت يمه عائله عدهم بنوته تجنن اسمها لانا ويدلعوها لولو عمرها 5 سنوات و ولد عمره سنه تقريبا بحظن امه
لولو:عمو صحيح احنه راح نموت
وميض:اسم الله عليج حبيبتي..ليش هيج تحجين
لولو:مو بيبي من سافرنه كامت تبجي وتصيح على بابا..تكوله راح تموتلي احفادي بالبحر وتبجي
ام لولو:حبيبتي لولو اسكتي ميصير هيج تحجين
وميض:عوفيها مكالت شي
لولو:عمو انت ليش مسافر هم لان ماعندك بيت وكاعد يم اهلك
لان بابا كال نسافر ويصير عدنه بيت وحدنه واشتغل واوديكم للالعاب
وميض:فدوه لله شلون بنوته ام لسان..حبيبتي اني مسافر لان مريض واريد ارتاح
لولو:عمو جان رحت يم عمو ابو الصيدليه يجكك ابره وتروح الواوا
وميض:صدقه للة راح اكرطج ام لسان
وميض:مرات ساعه تقريبا واحنه بالبحر ،ولولو ساعه تنام على ايدي وساعه تسولف سوالفها تجنن
وميض:طلعت جهازي وداتفرج على صور اهلي ولولو دتشرب عصير
لولو:عمو اشوف بيتكم وامك
وميض:داشوفها بالصور ووكع شويه عصير على جهازي
ام لولو:عزه بعينج لولو شسويتي،اسفين اخويه اخذ جهازي حط شريحتك بي
وميض:لا ميحتاج هسه انشفه واغلقه ويشتغل ان شاءالله
وميض:فجأة شفنا القارب لاف ورجع
وميض:حجيت ويا ابو القارب بالانكليزي
والي افتهمته راح تصير عاصفه ولازم نرجع للساحل
يعني راح تتأجل السفره
فاروق:صارت عاصفه قويه وهاج البحر و وصلني خبر الزوارق انكلبت وكل الي بيها غركوا وماتوا
مينا:كل شويه اخابر على وميض وماكو اتصال
وصار الصبح والقلق كتلني وحتى اجه الخط ومداومت من الخوف
اخر شي قررت اتصل بفاروق
فاروق:جانت ليله مآساويه راحو بيها هوايه ناس
ولو احنه متعودين لان التهريب بالبحر مو مضمون
فاروق:دك تلفوني رقم من العراق
مينا:السلام عليكم شلونك عيني اني اخت وميض الي سفرته انته ،عفيه شنو أخباره
مدااحصله وظل بالنا كلش
فاروق:والله يااختي مااعرف شنو اكلج
مينا:الله يخليك احجي ليش ساكت
سمر:فزيت على مينا تحجي بالتلفون وقلقله
فاروق:البقيه بحياتكم اختي القارب انكلب بيهم وغركوا.
مينا:لالالالالا ووووو ميض بصياح وبجي
سمر:وكفت على طولي وخاله وعمو كلهم اجوي على صياح مينا

ام وميض:صخام وعزا احجي
مينا :لج يوم وميض غرك ومات
ام وميض:يبوووو يبوووو يمه ابني جيبولي ابني
سوده بوجهج نجاح راح الغالي وبعد محد الي
يبوووو كسرت ظهري ياغالي
سمر:البيت انكلب صياح وبجي واني واكفه مصدومه
وصحت بدون وعي ووووووميض ،ابجي بحركه
وميض تعال
حيدر: البيت صار بي كارثه وانكلب
عمي اتخربط وكعدته على الجربايه وصحيته بالعطر
وخالتي تبجي الكافر وتلطم وشككت خدودها من الضرب والتخرمش
والبنات يصيحن ويبجون
وسمر تبجي ورجع صوتها بس محد منتبه الها لان همهم يكسر الظهر

#الكاتبه
همسات الليل(ام آيه)