انا بهواك

الجزء 4

#انا_بهواك
بقلمي همسات الليل(ام آيه)

سمر:رحت ويا خاله ام وميض للسوك واخذنه شغلات البسها بالبيت وكم قطعه للطلعه
واني شايله فلوسي بس خاله مقبلت وزعلت مني وكالت انتي حالج حال مينا وهيه الي دفعت
سمر:رجعت كلش تعبانه بقينه 4 ساعات نشتري
بالشغلات الي محتاجتها،
طبينه بوكت الغده وجانت رؤى كاعده خطيه ومكمله كلشي ومسويه الغده
ام وميض:السلام عليكم
الله شنو هالروائح الطيبه ،عاشت ايدج رءاوي
الله شوكت الله يهديلي وميض وازوجه والجنه تشيل عني وتداريني وتدللني
سمر:خاله تحجي وتباوع عليه وتضحك،واني محاطه حجيها بالي لان ابنها خشم وراح يسافر اصلا
سمر:بين ماغسلنا وبدلنا واجتي مينا من الكليه وكعد العينتين وانجمعنه بالمطبخ حتى نتغده
سمر:لبست تراكسوت لونه شرابي حلو ولميت شعري
كبايه واني ماحط مكياج وطلعت كعدت وياهم وانجمعنه على الاكل ،همه ياكلون على الميز بالمطبخ
صار وميض مقابيلي واني عيني بالاكل بس احس عيونه عليه ،
مهتميتله لان اني مشوشه وفكري كله يم خالد وبابا
وميض:اكل وعيوني على سمر ماعرف ليش
لان مستغرب وين شكلها البارحه وين اليوم
يعني قصدي بالنظرات الها متفاجئ بمنظرها لا اكثر ولا اقل
ابو وميض:سموره باباتي ان شاءالله خالتج نجاح مقصرت وياج واشترتلج كلشي محتاجته

سمر:عاشت ايدها وايدك عموو مابيكم قصور الله يحفظكم ولايحرمني منكم
سمر:عمو الله يخليك محصلت احد من اهلي،اشو ادك عليهم اجهزتهم مغلقه وظل بالي فد مره
ابو وميض:ليضل بالج عمو ماكو شي ان شاءالله
بس اكيد ماكو شبكه يمهم،ان شاءالله نسمع كل خير عنهم
ابو ميض:(والله بداخلي القلق والخوف كاتلني وحاسس اخويه الشيخ وابنه بيهم شي)
سمر:امين ياربي الله يسمع منك
سمر:كملنا الغدا وساعدتهم للبنات وعزلنا المطبخ وخاله التهت ويه وميض دتحظر جنطته لان باجر يسافر
سمر:اني الخوف دمرني،
اباوع على عمي مو على بعضه حاسته مرتبك وقلق ولازم تلفونه ويخابر،يجوز لان ابنه راح يسافر باجر
سمر:طول النهار وحاسه صدري مقبوض
صار المغرب وكلنا مجموعين بالهول وخاله تبجي لان راح تفارك وميض وبجتنه وحتى وميض كام يبجي
وميض:يوم فدوه اروحلج اني فتره وانجمع بيكم ،دموعج سجاجين بكلبي بس تدرين بحركتي ،خليني اطلع واغير جو وان شاء الله ننجمع عن قريب
سمر:اني العبره خانكتني واعصابي تلفانه على ابويه وخالد ومصدكت على الله صار بجي بالموضوع وبجيت وياهم
سمر:واحنه كاعدين دك تلفون عمي واشرلنه بايده يعني نسكت
ابو وميض:الو تفضل اغاتي
سمر:التلفون خله عمي يرتبك ويحجي وعيونه حيرانه واخر شي صاح يا الله
الله واكبر واتخربط
سمر :ركضنا عليه وجبناله مي و وميض اخذ التلفون وافتهم من الرجال
وميض يحجي وعينه منزلت من عليه وغوركت عيونه وافتهمت التلفون اله صله باابويه وخالد
والخايفه منه صار
من سمعت الخبر بعد ماادري بالدنيا اغمى عليه ومحسيت الا اني بالمستشفى
سمر:فتحت عيوني وشفت خاله ومينا فوك راسي
اسمعهم يحجون بس اني مااكدر اجاوبهم صوتي خاني ولساني معكود
نرجع شويه للوراء
وميض:من تخربط ابويه ركضت على التلفون وافتهمت السالفه
،وبهالاثناء والدي حس علينه  ويبجي وسمر افتهمت التلفون والسالفه تخص ابوها وخالد
ابو وميض:ياسواد وجهي عليك ياخويه يابطل،مات شهيد هو وابنه ضحه بحياته علمود عرضه وارضه
ابو وميض:سمر بنيتي ابوج واخوج اوف ياكلبي بقوا يقاومون الدواعش ومسلموا مضيفهم ومكدرولهم واخر شي الجبناء فجروا عليهم البيت والمضيف..

وهسه همه شهداء،اووف ياخويه كسرتني ياحزام ظهري
سمر:اسمع بالحجي ومصدومه وفجأة صار عندي دوار وبعد مادري بالدنيا
بالمستشفى
ام وميض:حبيبتي سموره الحمدلله على سلامتج ،شلون صرتي احجي ياامي،
والله محروك كلبي عليج حبيبتي
ام وميض:دكتور دكتور الله يخليك البنيه شو ساكته وبس تكلب بعيونها
الدكتور:اختي الخبر مفجع الها والميتين جانوا غالين عليها ،
عقلها مديستوعب الي صار فالخبر سببلها انهيار عصبي ومن الصدمه انعكد لسانها
ام وميض:استغفرك ربي وشلون يادكتور راح تبقى على طول خرسه
الدكتور:خلوا ايمانكم بالله جبير وان شاءالله فتره وتتجاوز هاي المحنه
ميرجع الها صوتها الا لازم تمر بموقف محزن ينكسر كلبها ،ولازم ينكسر على شخص تحبه
مينا:شنو هالقهر يا مسكينه ياسمر
همه ابوها واخوها اغلى شي بحياتها وراحوا،
بعد ماعدها غالي
سمر:بتنه ليله بالمستشفى والصبح اخذوني خالتي نجاح ومينا للبيت كوه امشي

واني دامشي جسد بلاروح احساسي مينوصف
ضايعه بهالدنيا يتيمه ومالي سند ،كلبي محترك وداحس بي يبجي من حزني والله
سمر: وصلنا للبيت وبالكوه نزلت من السياره فتت شفت الدنيا مكلوبه والجادر (الخيمه) منصوبه
فتت للمطبخ تلكاني عمي حضني ويبجي
ابو وميض:بنيتي حبيبتي انتي بركبتي و اني سندج وابقى صاينج ومحافظ عليج لااخر يوم بعمري ،
انتي امانه المرحوم معلكه بركبتي،وبحيل الله ماقصر وياج وماخلي دمعتج تنزل طول ماخشمي يشم الهوى
سمر:من حضني عمي وحسيت بحنانه متحملت وبجيت بحركه، و وكعت بالكاع وحسيت احد لزمني من ظهري...

يتبع

#الكاتبه
همسات الليل(ام آيه)