انا بهواك

الجزء 3

#انا_بهواك
بقلمي همسات الليل(ام آيه)

وميض:هلو ماما شلونج هاج الاكل ملكيت بس كباب دجاج جبت كيلوين ...
مادام الاكل حار صبوا بسرعة لان جوعان واريد اسبح وانام متفلش تفلش جسمي من الطريق ...
صدك وين كونيه الشكر ؟؟
مينا:لك ياكونيه
وميض:بنت عمنا الدعوشه
مينا:خطيه عابتلك ،راحت تسبح وهسه اروح اصيحها تاكل...
ابو وميض:ها ميونه وين سمر...
مينا:بابا شفتها نايمه وانقهرت عليها عفتها،هسه راح اشيللها اكل واغطي واحطه يمها وشوكت متكعد هي تاكل..
ابو وميض:عفيه باباتي ،خطيه هاي يتيمه وامانه واريدكم تحطوها بعيونكم...
وميض:تعشيت وطبيت لغرفتي...
المشتمل الي بنيته مطبيته من يوم الي ماتت شيماء حبيبتي...
عدنه غرفه جوه صغيره اخذتها وانام بيها..
سمر:فزيت على صوت الاذان وكعدت ميته من الجوع وشفت مينا نايمه بصفي لان جربايتها ام نفرين وكاتبتلي ورقه(الاكل على الكومدي وملفوف بخاولي) .
جنت جوعانه كلش واكلت وكملت  والحمدلله...
سمر:هسه شلون ياربي اريد اروح اتوضه وادخل الحمام واستحيي شيكولون افرفر بالبيت تالي الليل .
كمت طلعت بسرعه ورجعت لان الحمام بصف الغرفه ،صليت ورجعت نمت.
سمر:حسيت الصبح على مينا تبدل وتريدتروح للدوام ، و جانت تتحرك على كيفها تخاف لا اكعد.
مينا:ها سمر اسفه كعدتي من الطكطكه مالتي
سمر:لا والله اني الي اسفه مقيدتج بغرفتج
مينا:لتكولين هيج هاي هم غرفتج
سمر:تسلمين حبيبتي ،بس اني من اليوم راح اكول لخاله وانام على القنفه بالمطبخ
حتى تقرين وتاخذين راحتج،وهيه شغله وقت وبلكت يجي بابا وارجع ويا
مينا:جان استحيتي مو عيب عليج شنو تنامين بالمطبخ قحط مكانات لو منعرف بالاصول
والله ازعل اذا مره ثانيه هيج تحجين
هو اليوم نامي يمي وبعد كم يوم وميض يسافر بخير وسلامه وعود اخذي غرفته
ولو اني افرح تبقين ويايه بالغرفه مونستني،بس خاف انتي تريدين تاخذين راحتج
سمر:بالعكس والله مرتاحه بس ماريد وجودي  يآثر على دراستج

سمر:ليش وميض وين راح يسافر
مينا:راح يسافر لتركيا ومناك يقدم لجوء لاوربا
سمر:الله يوفقه(وبكلبي اكول همزين راح اخلص من المغرور).

(وميض ابن عمي وسيم واي وحده تتمنى لان كامل المواصفات ،
بس كلنا نعرف بقصته،شلون جان يحب شيماء وتأذه وره موتها،قليل يضحك ويضل منعزل يعني احسه معقد)
عفيه مينا ماعندج شي طويل غير هذا التراكسوت الي انطيتيني البسه
تدرين اجيت بطرك الرداء واستحي اطلع بي كدام عمي وابن عمي
مينا :والله سموره تدرين اني ما البس دشاديش واذا البس فكلها دشاديشي قصيره.
بس هسه اشوفلج عندي زي هندي جابه بابا قبل سنتين من العمره ..
سمر:اي والله ياريت..
سمر:اني هم البس تراكسوتات وبجايم بيتنا بس مستوره شويه ومتطبع على جسمي.
مينا:هاج البسي هاي وبلكت تاخذج ماما للسوك
من تكعد .
ولو ماما متكعد منا لساعه 10 لو 11 لان معتمده على منقذها(جدر الضغط) شوكت متكعد تسلك اللحم وتطبخ بسرعه ميهمها التاخير.
سمر:خطيه خليها مرتاحه
مينا:يله سمر اني اروح لان صارت 6ونص والخط على وصول..
و لتستغربين طالعه بوكت لان بغداد غير يمكم. الازدحامات يمنا تكتل ويادوب الحك على اول محاظره ومرات مالحك اوصل الى ثاني محاضره..
وانتي اخذي راحتج بالبيت لان نايمين وحتى وميض ميكعد لساعه2 الظهر...
سمر :الله وياج
سمر:طلعت مينا وبقيت كاعده لان شبعانه نوم واتكلب بفراشي والعب بتلفوني وشكد حاولت احصل بابا واخويه بس كله مغلق والخوف كتلني
ضجت من الكعده كمت ارتب غرفه مينا
اثاث غرفتها كلش حلو بس لان عدها دوام غراضها كلها مخربطه وفوضى

رتبتلها الكنتور والمكياج والعطور وطلعت الغرفه حلوه ومرتبه
صارت ساعه 9وسمعت بالمطبخ صوت حركه..
وكلت هاي يمكن خاله نجاح ..
خل اروح عليها عيب ابقى بالغرفه..
جنت لابسه الزي الي نطتنيا مينا ولونه تركواز كلش حلو واني يلوكلي هاللون ومشطه شعري ورافعته عالي (ذيل)...
رحت للمطبخ واتفاجئت بوميض واكف بالثلاجه يدور شي ولابس شورت قصير وفانيله سوده وجسمه كله مبين وارتبكت واستحيت بعد ارجع...
سويت نفسي داشرب مي وسلمت..
سمر:صباح الخير

وميض:البارحه تعبان من الطريق اتعشيت كبل ونمت
كعدت متضايق وحموضه كاتلتني ،
رحت ادورلي شي مال معده ، واني بنص الثلاجه وسمعت صوت ناعم يكلي صباح الخير،
لمن رفعت راسي اتفاجئت
وميض:صباح النور (بداخلي هاي معقوله هيج متغيره وصايره حلوه، طول وجسم)
سمر:عطشانه داشرب مي وارجع للغرفه...
وميض:براحتج هذا بيتج...

سمر: شكرااا....شنو هالاخلاق مداعرفه!!!
دارجع للغرفه وجتي خاله نجاح..
ام وميض:ها سموره حبيبتي صباح الخير ،شلون نمتي ان شاءالله مرتاحه...
هاي شنو معقوله وميض كاعد!!!
وميض:هلو ماما معدتي كاتلتني ودورت علاج وهسه راجع انام ...
سمر:صباح النور خاله الحمدلله،اسفه خاف سويت صوت وكعدتج...
ام وميض:لا حبيبتي بس اني ناويه اليوم اكعد بوكت حتى اخذج للسوك اجيبلج شويه غراض وملابس
سمر:خاف اتعبج ويايه ...
ام وميض:لا حبيبتي انتي وحده من بناتي وحالج حالهم،هسه نتريك ونطلع...
ام وميض:ابقى وميض تريك وتعال ودينه للسوك
وميض:لا يوم انتوا روحوا وحدكم بتكسي اني اضوج من التفرفر وبعدني نعسان...

سمر:عابتله شكد شايف روحه ومتكبر...
سمر:سوت خاله الريوك وكملنه ...
وغسلت المواعين ورحت بدلت ردائي مجايبه غيره ولبست حجاب بدون خمار (وبالاصل مالبسه بس من وره الغربان السود انجبرت ولبسته)
يتبع

#الكاتبه
همسات الليل(ام آيه)