يا صاحبة الخمار

١

#ياصاحبة_الخمار
الجزء الاول
بقلمي ام مريم اماسي الليل
كان يا مكان حكايه من  حكايات الزمن الجميل  زمن النقاء والشرف والطيبه
نبدتي قصتنا ويا بطلتنا  زبيده ( اسم البطله حقيقي)

زبيده: مثل متعرفون اهل قبل عدهم شغلة تعدد الزوجات واولهم ابويه متزوج ٣ وحده منهن عدها ولد من عمي المرحوم تسلسلها الصغيره   وابن عمي اسمه محمود ومن ابويه عدها محمد الي هو اخويه من الاب
اما امي  الوسطانيه عدها زينب .. حوراء... زبيده لكن انفصلت عن ابويه واتزوجت واحنه بقينا عد ابويه ...خواتي متزوجات بس اني بقيت
ومرة ابويه الثانيه الي تصير بت عمه لابويه وزوجته الاولى عدها سلمان وكامل وخليل أخوتي الكبار والخوات فاطمه خوله نجله
كلهم كبار متزوجين الا اني ونجله ومحمد  الصغار .... محمود بحكم ابن عمنا واخو اخونا محمد اعتبروا من العائله وهو الوحيد الي منكشف علينا وشايف وجهنا قبل  البنيه بس اخوتها يشوفوها مكشوفه بس احنه بحالتنا لان ابن عمنا ويانا بس الوجه وچف الايد والقدم مكشوفه / اما الرجال من ينوي يتزوج  يدز امه او اخته اتشوفله عروس  ومرات يمشون على المواصفات الي يطلبها  ابنهم يختاروله العروس  و طبعا ميشوفها الا بيوم العرس
محمود ابن عمي كلش حريص علينا حتى من يدخل للبيت يگح لو بصوت عالي يگول يا الله ..... لكن اكثر من مره من نلتم بمكان
انتبه عليه صافن عليه ... جنت اخاف لا اخوتي ينتبهون عليه
ويمنعوني اكعد ويا هم .... هو بالنسبه الي جان مجرد اخ ....
ما حسيته بيوم ابن عمي او انعجبت بي ... هو شكله حلو كرجال
وشخصيته حلوه سبع وابو غيره ... اتذكره مره طالعه مني خصلة صغيره ..... دخل للمطبخ  جايب غراض   جنت انظف شافني انطاني ظهره
محمود: زبيده دخلي شعرج
زبيده : دخلت شعري ولفيت حجابي صحيح ... جاوبته شكرا
دخل المسواگ وطلع بدون كلمه
نجله : ياربي كون يصير من نصيبي
زبيده : ان شاء الله بس انت شويه گصري لسانج وياه
نجله : مو بيدي لان احبه واشوفه ممعبرني اضوج منه
زبيده : اعرف نجله اختي اتحبه وهو باله مو وياها بالعكس يتجاهلها ويتحاشاها لان لسانها طويل وياه .... يعني لو هي الي طالع شعرها ومنبها ... ترده وانت شكو تباوع ... او تگله قابل مطلعته علمودك ... لسانها متبري منها بس قلبها طيب هي الي بقتلي من خواتي .... امها متحبني لان اني وياها نفس العمر ولان احلى منها .... دائما من يجون علينا نسوان بالبيت .... متخليني اطلع .... اطلعلي اي شغله التهي بيها
وتصيح نجله أ تضيفهم من كبرت گمت اعرف السبب حتى يشوفون نجله ويخطبوها لان اذا شافوني يطلبوني الي وهي اكبر مني ب٤ سنوات فلازم تزوج قبلي
فد يوم دخل ابويه علينا للمطبخ گلها لامي ( مرت ابويه ) هالايام يمرن نسوان بيت ابو ناظم يمكم
اني ونجله مفتهمنا بالاول بعدين فهمت
( الحجي ناظم رجال تعرف على ابويه بموقف .... ابويه تاجر قماش جان يسافر قبل يجيب قماش من الهند والكويت .... فد يوم بالهند بنفس المكان الي ابويه يشتري منه القماش .... شايف رجال هم عراقي .... ماخذ بضاعه بكل الي عنده ورايد ياخذ بعد بضاعه عاجبته .... فديريد من صاحب البضاعه  يبقيها
بين ما يرجع للعراق يجيب الفلوس ويجي ياخذها ....
ابويه .... متبرع گايله اني انطيك ... ابو ناظم مقابل گايله هاي دنيا اذا اموت بالطريق تبقى بذمتي .... ابويه گايله فدوه الك محالل وموهوب .... ابو ناظم  گايله اختملك على وصل  البيع  اذا صار بيه شي تروح لابني حسن من يشوف الختم ينطيك فلوسك
ابويه يگول كلش عجبني هالرجال بأخلاقه وأمانته.... من يومها صاروا اصدقاء .... قبل فتره ابو ناظم گايل لابويه اريد علاقتنا تبقى اريد اناسبك اذا عندك بنيه لحسن  اتشرف اخذها لابني
ابويه گايله عندي بنيه وجان يقصدني لان يعتبرني يتيمه ... ويعرفني ابيض وجهه .... اعرف بالاصول وام بيت
ورا كم يوم .... مرت ابويه گلتلنا سوو كليجه راح يجونا خطار هاليومين  .... كعدنا اني ونجله مرت اخويه  سويناها