يا صاحبة الخمار

٢

#ياصاحبة_الخمار
بقلمي مريم يوسف اماسي الليل
الجزء الثاني
حقوق النشر محفوظه
حسن : بقيت بالبيت انتظر زهره حتى افهمها ما تركتها وراح اتزوج  مجبور ... وراها اشوف طريقه اتزوجها حتى لو انزلها.. ضره .... للمغرب سمع صوت الحجار يضرب شباك غرفتي عرفت زهره  تنتظرني
طلعتلها ....
زهره: يا هلا بهالطول الحلو
حسن : مبتسم ... هلا بالغلا.... زهره راح اگلج شغله بس مو اضوجين
زهره : ما ازعل منك يا غالي
حسن : خطبولي
زهره: لطمت على وجهي شلون
حسن: راح تفضحينا شبيج افهمي ....
زهره : شفهم .... من تگلي خطبولي
حسن: ابويه قافل ميقبل يخطبج .... كلت اسايسه واقبل بالبنيه
لان بت صديقه .... وراها بفتره اگلهم ماريدها من حسن حظي هي محلوه يعني عندي حجه محبيتها وماريدها ... اگلهم اطلگها لو تاخذولي زهره فوگاها .... ابويه مراح يقبل يتفشل ويا صاحبه واطلگ راح يقبل .... يجي يخطبج وتصيرين الي
زهره : حسن لتخبلني ... تريد اقبل اشوف وحده بحضنك واتحمل
حسن : مابيدي شي ... وما اريد اظلمج ويايه .... لان الصدگ امي وابويه رضاهم عندي حتى لو على حساب روحي
زهره : خلص كل واحد يروح من طريقه الله يوفقك .... كمت ابچي گدامه ... بس براسي راح اخبلك واشغل كل تفكيرك
حسن :يا طريق زهره دا اكلج ماعندي حل ثاني تگليلي الله يوفقك
بسرعه اتبيعيني
زهره : انت اختاريت من وافقت
حسن : گتلج مجبور
زهره : نزلت حتى بدون ما اگله مع السلامه دخلت للبيت
حسن : وين رايحه... بصوت ناصي اهمس زهره زهره ..... يا الله هاي زعلت ،..... نزلت وروحي طافره .... شفت فاطمه ....
تتمضحك ..... شكو ولج ....
فاطمه: لا هيج.... بس شفتك عصبي گلت اسويلك جاي
حسن : سويلي زقنبوت .... وروحي من وجهي ...... تعالي
فاطمه: نعم
حسن:هاي فد مره متنجرع
فاطمه: ابتسمت
حسن : وجع شكو تضحكين شنو هالسفاهه
فاطمه: عيونها كبار  وحاجبها مشمور وبيضه بس حلگها وسنونها محلوات لثتها عاليه وسنونها كبار ومفارگه وشويه طالعه من كدام .... فتشوفها مو كلش حلوه بس مبينه دمها خفيف وحبابه
حسن : روحي سويلي جاي ... استغفرك ربي اصوم اصوم وتالي اتزوج وحده قبيحه  الله يسامحك يابه راح تجني عليه
صحت ..يمه...يمه
الام: تعال يمه .... اني بحجرتي
حسن:  دخلت عليها عصبي ....يمه انتِ مقتنعه اني اتزوج خطرانيه .... شبيها زهره متريدوها
الام: يمه مو من ثوبنا انت تقبل تاخذ وحده مكشوفه على الرياجيل وتطلع للسوگ وتصعد اسطوح
حسن: اني اضبها من اخذها اخليها متعتب باب البيت
الام: وشنو الي يجبرنا ناخذها الي خلقها ما خلق غيرها
حسن :احبها وعاجبتني .....اني الي راح اتزوجها مو انتوا
الام : راح تعيش بيناتنا ويا اختك ... ومراح ترتاح وياها طول ما احنه ما نحبها
حسن: يعني لان رايد رضاكم تجنون عليه وتزوجوني وحده انتوا رايديها وزواج .... علاقات واني شنو ذنبي عسى ابويه وابو سلمان يتخاربون يعني أتجاملوا وتاخذون بنته الي محد منفگها .... تنفگوها براسي
الام: يمه خوش بنيه والمره من تزوج تحلى هي ضعيفه بس تسمن
وجهه يسمن تصير حلو ه
حسن : يمه لتخبليني ..... اذا اخذها افشلكم ويا اهلها لان لا اريدها ولا اتقربلها ... ولو يبقى اخر يوم بعمري اخذ زهره فوكاها .... من هسه اگلج حتى يصير عندج علم
الام: خنف الله عليك يمه هاي تالي التعب والربايه  اتبيعنا وتفشلنا علمود حرمه متسوى
حسن : يمه ( بوست راسها ) حجي طلع بساعة عصبيه ... ماعاش الي يفشلكم الي تشوفوا مناسب سوو
الام: الله يرضا عليك وليدي الزواج عشره مو شكل حلو ....ترى الجمال يضيع بعيونك اذا المره لسانها طويل او خفيفه لو متلزم ظهرك وتصونك .... يمه المظهر غير عن الجوهر المظهر والشكل يتغير وكل ما نكبر يروح الجمال لكن الجوهر يبقى للممات
حسن: بقيت اجاري امي وما مقتنع بكلامها
زبيده :ورا يومين اجى ابويه كدام الكل گلي بابا .... الناس رايديج لابنهم اني بقيت صافنه يا ناس .... مرت ابويه گلتله معناها رايدين نجله .... لان نجله الي قدمتلهم الضيافه مو زبيده
شفت ابويه صار عصبي .... گلها ليش اني مو گتلج جايين على زبيده ..... مرت ابويه خافت ونكرت گلتله مقبلت اتفوت تستحي
دزيت نجله بدل منها
نجله كرصتني فرحانه .... كلهم شفتهم متفاجئين على الالتباس الي صاير الا محمود حسيته من سمع الخبر مات .... انقهرت عليه لان ورا دقايق گام من الكعده دخل غرفته ... صح ما عندي مشاعر تجاهه واختي اتحبه بس احبه  گأخ لان رجال من صدك واي بنيه تتمنى يصير من قسمتها
ابويه وجهلي الحجي گلي بابا هالايام يجون مشايه وعقد وزواج بنفس اليوم لان الحجي گلي ثاني يوم العرس الولد عنده سفر للهند كم يوم
ويرجع
مرت ابويه اتخبلت گلتله ميصير مو شافوا نجله ميصير تبدلها بزبيده گلها انت حسابج بعدين .... لان فهمتج شي وسويتي العكس ....
مو انتِ الي اتفهميني بالاصول ... اثنينهم بناتي واعرف مصلحتهم وماعندي فرق بينهم  مرة ابويه الثانيه ... ام محمود
گلتله حجي لتصير عصبي .... كلشي قسمه انطيهم نجله ... وزبيده تجي قسمتها
گام بدون ميحجي من وصل للدرج ديصعد صاح .... زبيده ونجله تعالوا بابا
صعدنا ورا كعد يحجي ويانا على اطباعنا .... وطبع الولد عصبي وشخصيته قويه نجله ترد ومتتحمله .... وهو هم ميتحملها
لذلك اختارني لان اني طويلة بال ولساني ما يزل  واتحمل هيج رجال .... وبقى يحجي على معزتنا عنده وماكو فرق بيناتنا نجله طايره لان تحب محمود واني الصدگ خفت من گلي عصبي وشخصيته قويه بس الي مكبر حسن  بعين ابويه حبه لاهله وبره بيهم يگول لو يگلوله ذب روحك بالشط يذبها
ثاني يوم اجوي خواتي المتزوجات( من امي) من سمعوا الخبر دزوا على ام علي الدلاله هاي تبيع حنه وديرم وملابس نوم وثياب وكحل مكي وعطور أتجيب بضاعتها من السعوديه والكويت والهند  اخذولي منها غراض وجهزوني وحتى وصوها على غراض بعد وابويه لليل رجع جايبلي عينات قماش گلي شوفي الي تريدي حتى اخلي عبود الخياط يخيطلج ثياب جديده .....
اختاريت اني وخواتي ونجله الالوان ...بس خواتي گلولي صعبه نفهم ابويه الثياب لازم تكون بدون ردن وبيها فتحات ودلعه ... احسن حل نشوفلنا خياطه
ثاني يوم .... الصبح دزوا على ام علي يسألوها على خياطه تجي تاخذ قياساتي  للبيت ....للظهر اجتي  جايبه خياطه تاخذ قياساتي ....
استحي كدام خواتي انزع ملابسي وتاخذلي  القياسات  .... اخذتها وصعدت للغرفه اخذتلي القياسات ... گلتلي يا زبيده على هالجمال والجسم الحلو لا اسويلج ملابس تخبل الرجال .... استحيت منها ..... گللتلي اني حبيتج .... راح انصحج نصيحه تعلمتها تالي عمري
من اطلگت جان ابويه موجود ما حسيت بالفرق لكن من اتوفى وبقيت يم نسوان اخوتي .... تبهذلت ....الرجال.... يحتاج صبر حتى تفهمي وتعرفين طبعه وشنو الي يحبه ويخلي يتعلگ بيج .... ورايدله عقل وحيله .... وخليها ترجيه بأذنج الرجال سند للمره بعد الام والاب لان الاخوه من يتزوجون يصيرون لنسوانهم
جاوبتها خاله.... لتخافين اني اعرف الاصول ان شاء الله يطلع نصيبي زين