يا صاحبة الخمار

٣

#ياصاحبة_الخمار
بقلمي ام مريم اماسي الليل
الجزء الثالث
حقوق النشر محفوظه
زبيده : للعصر اجوي المشايه الزلم ........ قروا الفاتحه
بأربع ايام كملت كل اموري وجهازي  والخياطه سوتلي ملابس بالغرفه اللبسها كلش حلوه .... واهل الولد ما قصروا دزوا النيشان كامل ويا الذهب وحتى ملابس من الهند جايبيلي   .... مراسم الزواج  الحفله للبنيه بس الحنه ....والولد يسوي حفلة حنه وثاني يوم يسوي زفة زلم لبيت العروس ياخذ مرته ويرجع للبيت  ..... حسن مثل ما عرفت اسمه .... مقابل گايللهم بس اني واخوتي وابويه انروح انجيبها /// أبويه  عنده عاده ميقبل نعقد الا بيوم الحنه  الصبح وثاني يوم الرجال يجي ياخذ مرته مبوشه لبيته
بيوم الحنه  الصبح .... عقدولي ....ولا اني شايفته ولا هو شايفني
حفلة الحنه شي مختصر بين الخوات والعمات والخالات وبناتهم والكرايب .... بوقتنا مجان اكو... صالونات اكو حفافه تحفلنا تغير شكلنا لان البنيه متحف الا بيوم حنتها شكلي تغير للاحلى لان حاجبي ثخين ومشمور  رتبته طلع كلش حلو وبرز كبر عيني ولونها الجوزي الفاتح ويا الكحل  .... اما الي  تريد تغير شعرها تخلي حنه اني مجنت احب الحنه لا بأيدي ولا برجلي ولا بشعري لان لونه بني  فاتح وخواتي ينصحوني ما اغير لونه بالحنه لان راهم لبشرتي الحنطيه الفاتحه .... شعري سرح من فوگ وبي لفه عريضه من جوه مثل وحده مسويته برولات وطويل  اني طويله ومو ضعيفه مبرومه وعندي بتك من رجلي الاصبع الصغير ملزوگ بي اصبع سادس صغير مو كلش واضح أتحسوا اصبع واحد مقسوم نصين .... بس اني متعقده منه ....  حفلة الحنه عباره عن ملايه ودفوف والبنات يرگصون .... ... ومن تخلص الحفله .... بليل اتصير اللمه بين العروسه وخواتها يكعدون يفهموها الي يصير بيوم العرس والعلاقه بين المره والرجال كعدت استمع وميته خجل وشايله هم شلون باجر انكشف على شخص لا اعرفه ولا يعرفني بين ليله ويوم يصير ولي امري ويشاركني نفس الفراش واله حقوق عليه
نامو الكل بقيت وحدي صليت ودعيت ياربي زيل هالخوف والهم من قلبي مجنت فرحانه كعروس قلبي مقبوض ... يمكن من الحجي الي سمعته ...ما هانت عليه نفسي انكشف على رجال  واسلمه شرفي وبداخلي هو غريب عليه ماعندي مشاعر تجاهه

يوم الزفه
لبست ثوب ابيض وبرگع وخواتي يغنولي ويصفگون الى ان سمعنا صوت .... الدفوف عرفوا الولد وصل
جابولي العبايه والخمار لبستهن  دخل ابويه گلي يله بابا وصل رجلج اني بهاللحظه طگيت بچي بدون صوت حسيت راح تطلع روحي لان افارك  ابويه وبيتنا وحياتي واخوتي واروح يم ناس غرب غير حياة وغير اهل..... ورجال غريب ما اعرف اطباعه ولا اخلاقه ....
باللحظه  الي اجتي نجله حضنتني وتبچي .... هنا بديت ابچي بصوت مسموع .... بعدها طلعت ويا ابويه لگيت حسن كاعد بالهول ينتظر اول شغله ارتاحيتلها شكله حلو واطول مني  .... بس مبين عصبي نار من عيونه صار عندي خوف منه ...حسيت مثل الوحده الي باعوها اهلها وهالرجال اشتراها ....
ابويه بقى يوصي حسن عليه گله اني منطيك قطعه من قلبي دائما خليني كدامك ....ابو حسن واخوته ٢ طمنوا ابويه ..يخلوني بعينهم وهم اهلي واني بتهم من اليوم .....
طلعنا ساعدني من دا اصعد للعربانه الي يجرها خيل  لزم عباتي خاف لا تطلع رجلي  كعدت صعد كعد بصفي ...من مشت العربانه بدون ما يلتفت...گلي
حسن: الكلمه الي احجيها متثنيها.... وممنوع تعترضين على اي تصرف يبدر مني .... فاهمه
زبيده : قلبي گام يدگ سريع من الخوف .... جاوبته ان شاء الله
وصلنا للبيت تلگوا بالهلاهل... موجودين اخوته ونسوانهم ماكو وحده مكشوفه على حماها كلهن مخمرات بس العيون طالعه .... حمدت الله هاي اول شغله مثل عاداتنا بيت اهلي ...
حسن گلي ادخلي بوسي ايد ابويه وامي ....نزلت بوست ايد عمي وخالتي صعدت للغرفه .... ميته من الخوف والخجل ... فتح الباب مجرد خلى ايده على چتفي  حتى يدخلني للغرفه فزيت متحملت لمسته ... حسيتها شي غلط متقبلته بالاول  بس ....اتذكرت هالشي حلال لازم اتعلم عليه .... زاد خوفي لان  النسوان صعدوا ورانا عمته وامه يهلهلون .... ونزلوا معناها ينتظرون النيشان ...ورا شويه  بديت اسمع صوت ضرب على الشباك ... حسيت بي شي   بالاخص من زاد الضرب ..اجى تقرب  عليه ديرفع الخمار عن وجهي
بدون وعي لزمته مقبلت يشيله مستحيه منه  عصب بسرعه
حسن : شوفي يا بت الناس من البدايه خلي هالحجي بأذنج اني اخذتج لخاطر ابويه وصداقته بأبوج وما الي اي نفس بيج ويكون افضل أتخلين الخمار لان ميعجبني حتى اشوف وجهج
ومجبور اتقرب عليج حتى انطي النيشان .....
زبيده : من سمعت كلامه فوگ خوفي وارتباكي حسيته ذبحني من عرفته مغصوب عليه كامت ادموعي تنزل سريع مثل الي دخلوا بسجن مؤبد   ..... طلع من الغرفه .... صاح امه ... صعدت  خالتي دخلت يمنا گلها كدامي
بصوت ناصي ... ما اكدر اتقربلها ... ( معذوره )...  اني انصدمت لان كذب( بالنسائيه) خالتي جاوبته يا ...ميخالف ابني لان صغيره تصير عدها خربطه ....
اجتي خالتي ... وگفت كدامي تحجي ويايه بصوت ناصي ..
يمه لتخافين شوكت ما تخلصين .... گليلي ولتستحين من حسن صار رجلج ... يله بدلي ملابسج .... نزلت خالتي (عمتي) ... بقينا وحدنا كل واحد بصفحه ... هو طلع من الغرفه واني بقيت ما الي واهس حتى انزع العبايه والخمار ... لو بيدي ارجع لاهلي ..... بدلت دشداشه وشيله لفيته على وجهي مثل الخمار
ماطول هو مرايدني اني هم ما اريده واحسبه حساب الغريب ... اختنگت وضاگت بيه الدنيا ...متت عطش ردت انزل اطلب مي ... لگيت باب السطح مفتوح ... گلت اكيد اكو حنفيه اشرب منه لان مستحيه انزل .... يمكن رب العالمين راد يشوفني السبب الي هالرجال رافضني بسببه ....  بس مديت راسي  واشوف راس وحده من السياج تسولف ويا حسن .... بلحظتها هو جان ديجاوبها على سؤال يخصني وگفت اسمع
حسن : زهره بداعتي لتضوجيني وتزعلين ميصير احجي عليها هي مرتي
زهره : ريح قلبي الله يخليك
حسن : البنيه محلوه  انت احلى وحتى تطمئنين ما الي نفس بيها...  يله روحي بس بعد لذبين حجار مالي خلگ المشاكل ويا ابويه بس يعرف يگطع اخر امل الي وياج
زبيده: دخلت بسرعه لغرفتي ماعندي اي مشاعر غيره او هذا رجلي وشفته ويا وحده لازم انقهر ... الي قهرني نصيبي اعيش ويا رجال مطايق يشوف وجهي ويحب وحده ثانيه  طالعه بالسطوح تالي الليل من ورا اهلها ووجها مكشوف  وشعرها نصه طالع كدام رجال غريب ...واني الي محد شايف اظفر رجلي أنهان بأول يوم زواج