أم البنات

كم هو قاسي

#أم البنات

بقلمي السيدة العلوية

الجزء8

مرة من المرات ..رحنا لبيت اهلي..الله ياريحة اهلنه..وذيج البيوت..الله ياخبز التنور ومنظر امي وهي واكفة تخبز..الله يالمتنة وكت الغدة..وامي فرحانه..والاكل مصبوب والسفرة ممدودة..وسوالفها العزيزة..اه ياذكرياتي الماتعود..بعدت ومشينا وطشينا..وكبرتي ياجهاد..كبرتي وانتي طفلة وصرتي ام..مااعرف احس بلوعة بقلبي ليش ومن شنو..وليش اسأل عن سببها..بقينا يومين يم اهلنا..ماخليت بيت يعتب علية..اريد اشتم هواهم..اريد قلوب تحجي الصح ماتتلون..اريد الي يكول اللسان هو بالقلب..تعبت من اللي املس طبعهم وهم اكثر من الحية من يغدرون..

كالعادة نتعلل وية النسوان..

فريال:اكلج خية شنهي بنتج مافطمتيها

فليحة:اي صدك جهاد افطميها حتى تلحكين

سناء:هههه جا هي مغالب(سباق)

العمة:اي عمة معليج بحجي هاي الغبرة ..فطميها حتى تجيبين الولد

◆جهاد◆

الولد..اه يالماتجي وماريدك تجي..شنهي اذا بقت البنت يكولون عنست..واذا تزوجت..يكولون ليش ماخلفت..واذا خلفت ..كالو وين الولد..وماتجيب الولد ..مكرودة ..اه يالولد..شنهي فرقك يالولد..جاهية مو عطية ربي ..انه شبدر مني هو مو ربي اليخلق ويصور اللي بالرحم .ليش يعتبون علية..اهووو ياجهاد شنهي تريدين تغيرينهم..رجعي ونفذي ..

رجعت وبنتي تكبر يوم بعد يوم..رحمه وهي رحمه من ربي..

ومصطفى يوم عن يوم يبعد..الى ان مرة سمعته بأذني يشتكي مني لجنات..

بالليل اجة وكان لازم افتح الموضوع

جهاد:مصطفى شمالك وياي

مصطفى:شبيج تولولين

جهاد:شنهي البينك وبين جنات

مصطفى:وانتي شنو تدخلين..اني حر

جهاد:لا مو حر..انه مرتك والي حق عليك

مصطفى:مالج حق تدخلين واذا ماعاجبج الباب يفوت جمل..

تمر الايام واكتشف مااكدر حتى انطقها واعيب على رجلي..يبيعني علمود بنت خالته..ليش لان تطلع وتطب ..لان مثله ونفس افكاره..تعبت وهم حامل..وياليتني ماحملت..اهووو جهاد استغفري ربج..

تمر الايام بين بيتي وبنتي ومصطفى الي البيت عنده كانما فندق..لاحقوق ولاشي..عمر الدين ماكل الحق بس الحق الشرعي..لااا

♥نقطة ضوء♥

يجب ان ننتبه الى نقطة يجب ان لايهملها ولايغفل عنها الازواج وهي ان الزواج تزاوج بين النفوس والارواح وليس فقط الابدان..ان كنتي لاتعرفينه..اسعي الى التقرب منه ..فهمه..ادخلي الى افكاره وكوني قريبة منه فكريا روحياوليس فقط جسديا..وانت ان كنت لاترغب بها حاول لاتقف وتقول هي ليست غايتي..هي امراءة مثلها مثل باقي النساء..شكلها كما تحب..علمها ماتحب وتريد ان تاخذه منها ..لماذا تنضر بعيد او خارج حياتك الزوجية لتكن بذلك خائن..انت لاترغب بهن بل ماترغب به فقط الشهوه..نعم تقول انها لاتفهمني ولاتفهم مستواي الفكري..ارفعها لك..علمها درسها..اختبروا سويا..كل شيء..

ان الله عندما ذكر في محكم كتابة قال {مودة ورحمة} نعم هي سكن لك وانت سكن لها صحيح وهذا ماقصدته الاية الكريمة المطلوب هو السكون..ولم تذكر العلاقة الجسدية بشكل مباشر..نعم هي من مسببات السكون لكن الاهم هو الوصول للنضج والرشد والتكامل النفسي عند الزواج♥

◀الكاتبة:جهاد ليش ماتروحين لاهلج وتزعلين..

بعيون مملوءة بالدمع:مااكدر ابتعد عن ابو بنتي..واخاف

الكاتبة:عن منو تخافين

جهاد:على مصطفى..

الكاتبة:من شنو تخافين وهو مامهتم الج وتشوفين تعامله وياج

جهاد:انتي لو مكاني شتسوين..

الكاتبة:اسفة اني خاف تدخلت

جهاد:لااا عليج الله..سوالف بنات كولي لو بمكاني شتسوين..

الكاتبة:احرق الاخضر واليابس غير

جهاد:شتسوين ..مثلا

الكاتبة:جهاد لاحظي احنه بمشكلتج مو علية..وحتى ترتاحين ..مستحيل اترك غريب يدخل بيتي وياخذ رجلي..اني اتحمل حتى احافظ على بيتي لنقطة معينه..والفرج من الله

جهاد:الف رحمه على روح موتاج اي كلتي المفيد..مااعوف بيتي..

الكاتبة:ادري بيج وجنت اختبرج..يلة نرجع..كمليلنا..

▼مصطفى▼

فديوم صار عيد ميلاد جنات وطلعنا تونسنا وية سرمد اللي خطب وكلت للمغثة اللي بالبيت ومارضت تجي..

جنات:شعجب جهاد مااجت؟

مصطفى:ماادري ..تكول مااحب اطلع؟

جنات:اي فعلا الاحظها من نطلع تضل ساكته وماتسولف..بصراحة وماتزعل..انته هواي مظلوم وياها

بس هههه يجوز تغار

مصطفى:من شنو تغار؟

سرمد:من جنو..

جنات:مني ؟؟

سرمد:حسبالها انتي ومصطفى عدكم علاقة..

مصطفى:لااااا متوهمين هاي ماتفكر هيج..

سرمد:اممم مااعرف بعد..