أم البنات

اول المفاجأت

#أم_البنات

بقلمي السيدة العلوية

الجزء 5

جهاد: مااعرف ليش مستغربة علاقة مصطفى بجنات .. يجوز لان احنه ماعدنا اختلاط بالرجال هناك عند اهلي يعني صح اني عندي ولد عمام .. لكن مااذكر انه تمازحت وياهم هيج او جلست بمقربة من عدهم مثل ماجاي اشوف جنات والغريب مصطفى عمرة ماعلق وعنده الوضع عادي .. وهذا اللي اكتشفته بعد ثلاثة ايام من زواجنا ..

ثالث يوم .. كنا في وقت المغرب وكنت .. ارتدي ملابس بيت جميلة .. اشتريناهن اني وسناء من رحنا نجهز ملابس العرس وفرحانه بزوجي وبيتي الجديد .. صح هو دائما احسه مويمي بس كلت اكيد جاي اتخيل لان تونا تزوجنا ويجوز بعده خجلان من عندي او مامتعود علية

وفجأة اندك الباب .. 🙄

واسمع مصطفى يكول : تفضلو .. كل الهلا بيكم

اني فرفحت كلت اكيد اهلنا وكيفت . .. طلعو لا اصدقاء مصطفى واحد اسمه كريم وواحد اسمه علي وية زوجاتهم ..

مصطفى : يلة جهاد تعالي .. تعرفي بيهم

جهاد : دخلت واني خجلانه كلش (السلام عليكم .. زارتنا البركة ) وطلعت

رحت للمطبخ جهزت الضيافة ودكيت الباب حتى يطلعلي مصطفى

مصطفى: مادخلتي قدمتيها الهم ..

جهاد : مااكدر مصطفى استحي منهم ..زلم غرب مااكدر ادخل بعد ..

مصطفى: بابا عيب .. هذول جايين يباركون النا .. اكعدي وية زوجاتهم

جهاد : مااكدر ارجع ادخل .. اترجاك عفية انته ادخل ..

مصطفى :راح اصيح خالة تجي تكعد ..

وفعلا كانما ماصدكن خالته وبنتها وابنها اجو وكعدو يم اصدقاء مصطفى

قبل ان يخرجو بدقائق

زوجة كريم وزوجة علي قمن لتوديع جهاد..التي كانت واقفة في المطبخ

زوجة كريم :حبيبتي هذا شي بسيط بمناسبة زواجكم .. واعذرونا من التقصير

جهاد : يا خيتي انه اعتذر بس والله انه استحي اكعد وية زلم مااعرفهم .. لاتاخذن على خاطرجن من عندي

زوجة علي : بالعكس اصلا احنا مثل طبعج وهم ازواجنا مايقبلون بس اليوم حالة استثنائية ههههه .. نزورج بالافراح وانتي هم من تحبين تعالي زورينا .. احنه بيتنا قريب عليكم بعد المولد بالشارع اللي بي فرن الصمون ..

جهاد : بعيوني بس اتعلم ع المنطقة واكوم اندل اوصي مصطفى ياخذني اشوفجن

(كريم يحدث زوجته )

كريم : تدرين خوش بنية مبينه مرت مصطفى

الزوجة : اي كلش هادئة وخلوقة ..

كريم : والله اني من يمي فشلت لان مااحب النسوان يكعدن وهمزين مااجت يمنة

الزوجة : اي خطية اعتذرت من عدنا .. بس مو تكررها وتخلينا هيج اني كاعدة وماجنت مرتاحة

(بيت مصطفى)

مصطفى كدام خالته وعائلتها: انتي عود ليش ماكعدتي يم الناس .. ليش هيج فشلتيني

جهاد : كلتلك مااكدر .. استحي

جنات: اوي جهاد .. صيري فرش .. بلا عقد .. ناس اجو يباركولكم غير تكعدين يمهم

جهاد : خيتي هذا طبعي انه .. مشيت وعفتهم ودخلت لغرفتي

جنت متوقعة الموضوع عادي .. لكن ماادري بمصطفى راح يزعل او ياخذها سبب حتى يكلب وجهة علية ..

بالليل رجع متأخر من يم بيت خالته ,,

جهاد: حبيبي .. جوعان

مصطفى بصوت غاضب: لااا ... تعشيت يم خالتي

جهاد: تعشيت ؟؟ ليش مومنتضرتك انه ع الاكل

مصطفى: ناس وكالولي ابقى شنو .. اردهم علمود حضرتج لو افشلهم مثلما فشلتيني كدام اصدقائي اليوم

نقطة ضوء

هنالك كلمة دقيقة في الحب يحسن التأمل فيها!.. يقال: بأن العمل فيه رياء، والشيء الذي لا رياء فيه هو الحب، فالحب إما موجود أو معدوم ولا ثالث لهما.. نعم، الإنسان من الممكن أن يرائي بالحب الواقعي الذي في قلبه، الرياء في الإظهار، في إبراز هذا الحب، وإلا أصل الحب لا رياء فيه.. إما هنالك مسانخة مع المحبوب، أو ليست هنالك مسانخة.. الإنسان الذي أحب حقيقة،الانسان الذي عرف الله حقا هذا الإنسان يكون صادقاً في حبه..❤️