أم البنات

وهنا أبتدأت

بقلمي السيدة العلوية

الجزء1

بية من ملوحة الكاع شمرة وبية من حيل النخل طبع..انه هيج ..صلابة كاعي وصلابتي ثنينهن سوى..تلاويت وية الموزمات وماخضعتلها تالي ماتالي ..اوف اوف....لو يكوللكم احد انه شنهي اكره كلة تكره طبع الحياية ..اوف ياطبعهن شكد اسود مثل الدغل ينبت بكاع اصيلة ..

انه بت الاربعين هسة..وتعالو وياية وكلمن يجيب الجاي المهيل ويكعد وياي ع الساجية وخاف ااخركم ..كولن لاهلجن ..لان خاف الكعدة تطول..باعن عيوني ..جاي تشوفن هذيج الكاع..هاي كاعنا..مااعرف انه بالمساحة بس كلش جبيرة الكاع..باعن هناك ورى هاي الساجية جان عدنا احواض سمج..وبعدها ذيج الكاع جنا نزرع بيهة بتيتة(بطاطا)اي بعد اختج علوية انتي ترجميلهن خاف مايفهمون حجيي(كلامي)نكعد من الخمسة الفجر نشتل ونحرث ونرجع للبيت نلكة الجنايين(زوجات الاخوة)محضرات الاكل والغدة..وبالمسية نسير ونتعلل ..الزلم يرحون يلتمون بمضيف عمي جاسم والنسوان يلتمن يم حجرة (غرفة)جدتي غنيمة ونسولف..امي والنسوان اللي بكصتها (بعمرها)سوالفهن ماتفيدنة كال فلان وحجة فلان..

انه صديجاتي(صديقاتي)

♥ملاحضة انا الكاتبة لانني احب هذه الانسانة مضطرة اتحمل لاجلكم واحاول قدر الامكان ان اترجم مفرداتها الجنوبية العزيزة على قلبي'تحملوها وتحملوني♥

الصديقة الاولى{سناء_بنت عمي}: ولجن اليوم شلون شفت شوفة

الصديقة الثانية{فليحة_اختي}:شفتي ياحسرة..اشو مبركعة من الصبح تركضين ورى الهوايش{فليحة رحمة لوالديج اني اترجم بس لاختج ..هالمرة سماح -فليحة تقصد أجلكم الله'الابقار'}

ليش عودن محد سألني عن اسمي..جا انة موش البطلة مالتكم..اسمي جهاد واي بالعباس اسم على مسمى..ههههه يلة خل اكمللجن ..

جهاد:صدك شفتي ..

سناء:شفت بدوية واكفة وية امج ؟

فليحة:خير ياساتر هذن من يلتمن اكو مصيبة عليمن

عليمن السرة هسة

سناء:على الشفية الكدامج

جهاد:شتقصدين سنوة ؟

فليحة:لااا ماتقصد شي كومي جيبيلنه شي نتعلل قبل لايجي ستار (ابن عمي وزوج اختي)ياخذني

كمت رحت للمطبخ واني اهز بايدي ..سوالفجن سوالف بس بالحزورات..

رحت ورجعت بسكوت(بهدوء)حتى اتصنت

سناء:سمعت امي تريد جهاد لمصطفى..

فليحة:صدك تحجين..ياسعدها ياهناها هذا المثغف وكل بنات عمي ناصبات عليه ويطيح من حظ اختي..

سناء:جا هو يلكة احسن من جهاد ..هو صح اخوي بس جهاد مرة معدلة وحوك..

فليحة:تفزعيلها لان صاحبتج..ههههه

سناء:لا والله بس جهاد ماعدها دغش (كذب وادعاء وتلون وتصنع)صح بنات عمي ثجيل يتمنن بس انه اتمناها هي لاخوي..

فليحة:واخوج يعلم؟؟

اتوقع الان فهمتم جزء من القصة..بيت ريفي جميل وارض واسعة وعوائل مترابطة ومتداخلة ..وقلوب صافية..هنا سكنت وتربت وترعرعت بطلتي هذه المرة..انها جهاد ..البنت العراقية ذات العيون السوداء والجمال الريفي .واللهجة الجميلة....ساتركها قليلا وابقى معكم اتابع حكايتها ..لانها سترويها لنا..

اني اسمي جهاد..جان عمري 15سنة ..

عائلتي..

امي وابوية حجي خلف وثلاث بنات ..فليحة الكبرى متزوجة من ابن عمي ..وبشرى اختي ماخذة ابن عمي الثاني موش اخو ستار لا هم ابن عمنه..واني..ولد ثنين دلف وجبار..متزوجين ..

↑نعود بالاحداث↑

سمعت فليحة وسناء يسولفن ودخلت..

جهاد:هاي التعلولة (بعض الطعام للتسامر)شنهي شبيجن تبسبسن

سناء:جهاد ادري بيج من تخزرين تزعلين وانه سمعت امي وامج يسولفن بيج..رايدينج لاخوي مصطفى ..شنهي رايج..

فليحة:خية هاي بيهة راي..وين تلكة ابن مدارس وساكن بغداد لو يعجبها تكرب الكراب مالتي ومالتج..

جهاد:بس مصطفى مثل اخوي..

وفجأة ونسمع صوت ستار اخو مصطفى وسناء وزوج فليحة اخت جهاد..

فليحة:يلة جدة تصبحون على خير..