الأرمل

جزء بلا عنوان 2

رجعت للغرفة..وشفت هيام كاعدة

عبدالخالق:صباح الخير هيوم..

هيام بخجل:صباح الورد..شوكت كعدت

عبدالخالق :قبل شوية واجيت اكعدج حتى نروح نتريك..

وفعلا والاقارب اغلبهم راحو..وضلينا اني وامي وانتصار وهيام..حياتي سعيدة كلش وهيام مامقصرة وياي ولو تدلل بس ماشية الامور..

ورى فترة عرفت هيام حامل وحياتي فعلا صارت عالم ثاني سعيد ..الصبح اروح وية والدي للمحل والعصر نطلع ..نزور اقاربنا..وماشية الامور اثنيناتنه شباب وبعدنا عرسان..

بيوم من الايام ..اجتي امها للبيت يمنه..وبقت وبالليل واحس هيام تنكر براسي..

عبدالخالق:شبيج ..شكو..احس عندج حجاية وتخافين..

هيام:الخاطري..وافق

عبدالخالق :اي على شنو

هيام:امي راح تروح لبيت خالي بالناصرية عدهم عرس ..

عبدالخالق بعيون متسائلة وحاجب مرفوع:والمطلوب

هيام:خلي اروح وياهم

عبدالخالق :ممنوع..

هيام وهي تكثر من ألحاح:حباب 'حباب

عبدالخالق:كلت ماكو روحة يعني ماكو ..كافي خلص كومي حضري العشة..

حضرت هيام الطعام وهي نوعا ما حزينة..

اثناء الاكل..

عبدالخالق:صدك تحجين من كل عقلج علمود العرس تضوجين..

هيام:مو كل البنات راحو ولهذا تمنيت اروح..

عبدالخالق:ياعيوني مو انتي حامل وخاف مو زين عليج السفر وطريق بعيد..

نمنا وهيام الصبح نفس الوجه ..اهووو..خل اوافق تروح..ووديتها يم اهلها..وكالو راح يطلعون الصبح ياخذهم ابوها وامها ..اني مااعرف قلبي مامرتاح..تعوذت من الشيطان ..ووصلتهم للكراج..ورجعت لشغلي....

بالليل وقبل اذان المغرب واسمع تلفون البيت..قبل ماكو بس ارضي...واسمع ابوية يكول لااله الا الله..اريد اكوم مااكدر..حسيت شي صار بس اي جلد عندي او قوة كلها راحن..

الام:هااا حجي خير شصاير..

الاب:حادث صاير لابو باسم ومكلوبة بيهم السيارة وكلهم متوفين..

الام:لطمت على وجهها..

من سمعت صراخ امي..عرفت لكن تمنيت بداخلي اكون مخطيء..

ابني ومرتي او الادق عروستي..بليلة ويوم صرت عجوز..ملامحي مدهوشة والبس السواد واقف بالسرادق للعزاء ..وانا مستغرب تماما..واللي يجي يعزي يعاين بوجهي ومايكدر ينطق لان جاي يشوف وضعي وألمي..انتضر بس الناس تخف وارجع اقفل غرفتي وابكي مثل الطفل واني تماما..مو بحالة طبيعية

ليش ياهيام..لحيتي ورحتي وهالروحة روحة..اوف ياهيام..

ثلاث ايام العزاء وبعدها الناس تبقى وتروح والسابع ومااعرف ايش واني قلبي ينعصر وبعالم غير العالم..هذا الي يصبر وهذا اللي يحجي واني نار من جوة تحرقني كلما المح اغراض عروستي..