#قصه_بعد_الصبر#
للكاتبه فردوس عبد اللطيف
جزء12
صارت حرب 2003 كان ابنى امين عمرة اشهر بقيت يم اهلى فترة الحرب وراها رجعنا لبغداد شفنا هوايه مصايب
زوجى سلبو سيارته موديل حديث انى وكعت واكسرت رجل عشنا ذيج الايام والكل تعرف شصار ببغداد بهالسنين
لغايه 2007
حماى يوسف كان اسمه مطلوب ومهدد بالقتل لان كان ضابط شرطه على طول محضر سلاحه خاف يهجمون عالبيت صرنه نشوف القتل بالشوارع والجثث المجهوله ابنى امين صار عمرة 5 سنوات بس كانه 8 سنه طويل ابيض حلو ويصلى وميخاف ودايما يحضنى واسولفله قصص كان يحب القصص هادىء وما اذانى بطفولته وتربيته حتى بالليل من اصحو انى ارضعه ميكعدنى
كنت عند اهلى اجا اخوى كال ابن عمى انكتل لان كان بالشرطه بقينا 3 يوم بالفاتحه
من ردنا نرجع راح امين يبوس امى وانهزم امى كالت يمه اشبي ابنج شجا يبوسنى كتلهه والله يحبكم بس يستحى بعدين راح بوس ابوى وراها اجه لاختى وبوسهه وحظنهه وباس ايديهه
رجعنا لبغداد كان حماى يوسف ضايج كال راح اشترى بيت يم اهل زوجتى لكيت بيت لان هنا مطلوب وعنوانى معروف واريد ارجع اداوم بالشرطه
زوجى راد يقنعه يلغى الفكرة بس هو مقتنع سلاحه دايما محظر والاطفال يلعبون بالحديقه ويضحكون وابنى امين ضحكته تارسه الدنيا
ما اعرف اشلون حماى انثول وطلعت طلقه من سلاحه براس ابنى امين وراسه تطشر من ورة طلعت هى عيطه هى ركضه وما اشوف دربي لكيت يوسف شايل ابنى ويصيح على الجهال لا تباوعون ركضت اخذته من ايده وخليته بحظنى وكعدت بالبيت بالارض ما ابجى ولا اصيح نيمته بحظنة تمنيته كابوس واصحى منه جنت بس اريد اشبع منه احس براسه من ورة فارغ حفرة من طخ بايدي بوسته من ركبته وريحته مسك وعنبر كل هذا انا عقلى متوقف عن التفكير
الا اسمع نسوان الجوارين برة يصيحون اثارى زوجى ضارب راسه بالحايط وينزف وابنى عمار اغمى عليه جيرانه اخذته لبيتهم وطاشه عليه ماى
وانى بغير عالم من الصدمه
كان عندى احساس ابنى راح يموت من بوس اهلى وعمتى قبل وفاته هم بوسهه
قبل وفاته بربع ساعه اجه حظنى قوى وبوستى ويكلى ابوسج بوسه قويه اكله انى هم ابوسك ايحط ايده على حلكى وميخلينى بس من نايم ابوسه واكوا خلى انيمه على ايدي اخاف يموت وانحرم منه جريته نيمته على ايدى بليله قبل وفاته دفعنى استغربت وراح حظن ابوة
ومن طلعنه من بيت اهلى كان يباوع عالحيطان عالسكف خفت من نظراته وصحت اشبيك ليش هيج تباوع حسيت بكلبي
كلى ادور على كيس ملاعيبي
من الصبح كان كلبي مقبوض ومخنوكه احس راح يصير شي ..صحيح قلب والده
اجوى اخذو منى الجوارين وراحو دفنوه ودفنو روحى وياه احس الدنيا ضاكت على تمنيت اندفن وياه واحظنه لو يكلولى رجع كعد
حماى بقى بشقته ماينزل منهار 3 ايام الفاتحه والاكل يصعدونه اله وما ياكل بس يبجى
دزيت عليه كتله هذا قضاء وقدر وامر الله وانى مؤمنه بالله وصابرة
وبشر الصابرين وانا لله وانا اليه راجعون
للحكايه بقيه f
