فصيلتي المدللة

ج1

فصليتي_مدللة
الجزء الاول

Ganat Alomr
اعرفكم عن نفسي اني وعد عمري 26 سنه متزوج وعندي بنوته اسمها لارين عمرها سنه روحي من الدنيا هي; اني تزوجت زواج تقليدي وزوجتي هي بنت عمي اسمها اماني ووهي طبعها كلش حلو نازكه وهادئه ومتطلع منها العيبه يعني مرتاح بحياتي وياها الحمد لله .... شكلي طويل بشرتي حنطيه شعري اسود طويل شويه وعيوني كبار عسلي طبعا دائما البس دشداشه وعكَال مع العلم اني خريج كليه اداب قسم الفلسفه بس بعد الكليه صار هذا الزي الرسمي اليه لان اني ابن الشيخ الجبير يعني ازيد المسؤؤليه عليه اني طبعي قليل الكلام يعني امشي ع المثل الي يكول اذا الكلام من فضه ف السكوت من ذهب وحسب مايوصفوني جمارة ال محمد وثكيل اخوتي ... طبعا عندي اخوان اثنين امجد واسلام ..امجد اطباعه شويه قريبه من اطباعي يعني كلش قريب عليه دائما احنا سويه واسرارنا وحده واغلب وقتنا نكضي سويه امجد اصغر مني يعني عمره23 سنه يحب بنيه من القريه ويموت عليها والنهار كله يسولف بيها خبلنا بيها هو مرحله رابعه بس يخرج انشاالله يتقدملها ونزوجه نخلص منه .. اما اسلام فهو عمره 20 سنه فد واحد مطكط وميستحي لسانه اطول منه يحب البنات يموت عليهن يداوم كليه الهندسه ابغداد ويوميه حابله وحده وكايل هاي اموت عليها واريد ازوجها ويومين ويعوفها وهو حلو جسم وغضلات ولسان يخبل بعني بين قوسين محطم قلوب العذارى ....احنا ال3 الحمد لله بينا محبه موطبيعيه وعلاقتنا حميمه ومستحيل واحد منا يكسر باخوه اسلام شويه بعيد علينا بحكم دوامه قليل ينزل يكضي اغلب وقته بغداد بس من ينزل ويجي للسماوة نكضي احلى وقت واحلى ايام دوم ضحك وشقى وونسه كل يوم نطلع لمكان جديد وطبعا براري وصيد واني هوايتي الصيد مرات اكضي ايام بالصيد بعيد عن البيت وطبعا مذكرتلكم والدي والدتي هم زينه البيت وعندي خوات 4 وحده اكبر مني متزوجه والباقيات اصغر... وكءالك الشي الحلو بحياتنا احنا ال 3 هم اصدقائنا علي وحسين هم اخوان واحنا اصدقاء من قبل 4 سنين تقريبا هم غربه عن ولايتنا بس جوي سكنو بيها وتعرفنا عليهم هم سبع شباب اخوان بس الي هم اصدقاءنا اثنين منهم وعلاقتنا كلش قويه بيهم ودائما نطلع للصيد سويه اما الباقين علاقه سطيه او على كد السلام .. هسه احجيلكم عن حياتنا وشلون ماشيه احنا طبعا عدنا بساتين ومزارع كلش جبيرة وعدنا اكثر من بيت ناس معروفين على مستوى لان احنا شيوخ اباً عن جد والناس كلها تحترمنا وتقدرنا ماعدنا اذيه على احد والدي انسان بسيط وخدوم واي احد يقصده ميتردد ابد ويفشل شخص .. حياتنا كلش هاديه وطبيعيه شغل وصيد ونرجع للبيت لمه حلوة وكعده وضحك .. مبقى شي ويتخرج امجد ونمشيله ع البنيه الي يحبها ونفرح بي

امجد : ولكم شوكت اخلص بقى اسبوع واخذ النتيجه وازوج اويلي ولكم رح اطك
علي : هههههههه هانت مبقى شي وازفك على ايدي اويلي واخلص منك يوم عيد
امجد : ابو حسين ولك ليش هو يصير عرس لو مو انته حاضر وك حالك حال وعد واسلام يعني ثالث اخوتي معزتك من معزتهم ويوم الي زفتنا تصير سويه
علي : وك والله احلى فكرة نزوج بنفس اليوم

وعد : (كنا كاعدين وندردش احنا الاربعه ونضحك على سوالف امجد ) اهوووووو هنوب يزوجون سويه خل نزوج واحد وبعدين انته عود ندورلك على وحده ترضى بيك
علي : عمي شني ادورلي على وحده ترضى بيه ولك ليش هيج اني مابيه زود وتكول ننطيك مرة
وعد : ابو حسين انته علم وهذا حجيك مردود عليك .. انته كول شاري ومن باجر اكول هذا نسيبي

علي : والله كفو منك ياخويه ليش اني الكه احسن منكم واناسبه هاي الساعه المباركه
فضت كعدتنا ورجعنا كلمن للبيت حسين طول الكعده هو مشارك بالحديث بالطريق سألني
حسين : علي انته صدك تريد تناسب الولد
علي : ليش يعني شناقصني
حسين : لا ياخويه مو قصدي بس قصدت شلون تحجي بدون شور ابويه
علي : اني هيج كلت الحجايه اني ممفكر بالموضوع بس طلعت مني كلمه ومااتوقع ابويه رح يرفض زواجي
حسين : امشي هسه امشي الله يقدملك الي بي الخير
وعد : مرت الايام وتخرج امجد وخطبناله البنت الي يريدها واهلها فرحو بي ونطو المره وزواجه عن قريب نسيت سالفه علي .. وبيوم كاعدين اني وياه .......
علي : بعد ماطرحت موضوع زواجي على ابويه وشفته موافق كلت افاتح وعد بالموضوع اني صح مشايف بناتهم بس المهم الاصل والاخلاق ) ... خويه اني رايدك بموضوع ولو شنو ماجان ردكم اني ابقى خويك وشاريكم
وعد : كول ياخويه يخسى على شنو ترد
علي : اني كتلك قبل فترة اني شاريكم ورايد نسبكم فشاور اهلك وصاحبه الشأن ورجعلي خبر حتى اذا اهلك مالهم نيه موافقه ليش احرج اهلي وادزهم
وعد : اااافه ياخويه انته طيب ومعوزك واحنا مريته طوع اهلها ولو الشيخ كال اني ناطيتك مستحيل تنرد اليوم افاتح الوالد بالموضوع ونتشرف بيك احنا

بعد مارجعت للبيت اول شي سويته رحت حجيت ويا والدي بموضوع علي .. وجان ردك كلش مفرح كالي مادام علي صاحبك ومشيته على مشيته ماالكه احسن منه لبنتي ..

رجعت خبر ل علي وهو طار من الفرحه ومطول

بنفس اليوم دز اهله لبيتنا شافو البنيه ووصلني خبر منه هو طاير من الفرح .... ونجمعنا ثاني يوم واتفقو الولد يسوو عرسهم بنفس اليوم .. ومرت علينا الايام واحنا نحضر بتجهيزات والوقت يركض بينا ومنحس بينا وقرب يوم عرسهم حيل والتحضيرات كامله وكلشي من احسنه ....
اليوم هو يوم حنه امجد اخويه وحزام ضهري وعلي اعز صديق عندي وضلعي كعدت الصبح واني طاير من الفرحه ومحضر لهوايه شغلات حتى اسويها بس لاسف الي صار دمر خرب الي جنت ناويله كله وكتل فرحتي بداخلي وغير حياتي وهنا بدت قصتي من هءا اليوم
وللقصه بقيه
Ganat Alomr