......شوفي اكلج يكفي يزي عد ترة خلصتي كلبي
شنويعني ابوج شيخ تظلين تهوبزين على راسي
ترة اشمرج بالشارع واشوف ابوج الشيخ شيطلع بيدة
....اي انا بنت شيخ ومااسمحلك تحجي هيج حفظي لسانكوياي
موكل شويه وامك واختك يندكون بيه وانت ماتدافعلي
....اي اكيد ماادافعلج لاانج لسانج طويل وتراددين
وحتى بويه الشيخ ماسلم منج كاعدة وتكثرين
بالكلام كم مرة كتلج يابا مايصير انتي حرمه
حفظي لسانج بس انتي شايشه وشايفه
نفسج فوك الكل وخلي بالج ترة أنا هوايه
طولت بالي عليج لاتخليني اشوفج العين الحمره
....اني لاخاف منك ولامن الاكبر منك انت شنو
حتى اهتملك اني بس اسم ابويه كافي اني
بنت الشيخ جاسم على سن ورمح تكعد انت
هيج تعاملني لويش ما شايفه اني لواني جنت
بنت فكر لا اني هيج وضعيه ماتناسبني
اروح لبيت ابوي احسلي وانت سير وطير براحتك
...اقسم بالله يوم الي اطلعين من البيت تحرمين عليه
مثل ماتحرم اختي وماصيرين مرتي لوتنكلب الدنيا
واطلكج بالثلاثه سمعتيني
....انت متتحداني اني رايحه من هذا البيت
وعود سوي مابدالك شيخ
....الله ومحمد وعلي وياج روحي ودربج ورد
وبس مثل ماكلتلج اذا عتبتي باب العتبه ماتردين
لوعلى جثتي واعتبري نفسج طالك
سمعتي يابنت الاوادم هذاك الوكت انتي بدرب
وانابدرب وخلي بالج شي أنا حترام لعكول الزينين
ماربيتج من اول وجديد وسكتتلج وتحملتج
بس كافي لاطلعيني من طوري وتخليني امد يدي عليج
روحي بكرامتج احسلج
وخلصت كلامي وخليت وطلعت من الغرفه هاي المراة
دمرتني من يوم الي جتي لحد هاي االلحظه
ماشفت الراحه وماضكت طعم الفرح ياساتر منها
ومن لسانها.
بس انا لخاطر الطيبين ولخاطر لااكسر حجايت ابويه
الشيخ وخذاتها ولاهي ماتنطاق
نزلت الدرج تلاكاني ابويه رفعت ايدي
وكتله صباح الخير شيخ اشرلي تعال
رحت يمه وبسته من راسه وبست يده لان هذا هوبركتنه
وجبيرنه
....صبحك الله بالخير شيخنه
.....صبحك الله بالخير غياث ابني تعال اكعد تريك
....والله ياشيخ ماااشتهي
،،،،،هز براسه ،،،
....هالمرة ليش تعاركت انت ومرتك مايصير هيج ياابني
كل يوم على هالموال
...والله ياشيخ اني تعرفني مااحب المشاكل بس بالله
توازيني وكل يوم ومسويه سالفه جديدة
وكل شويه وكايلتلي اني بنت الشيخ جاسم وهو ابوها
محد بحاله
والله ياشيخ طكت مرارتي ومرمرت كلبي من زوجتها وانا
ماشفت الراحه وهسه تريد تطلع من البيت حلفت
وكتلها اذا طلعتي من البيت
تحرمين عليه مثل ماتحرم اختي عليه
.....ميصير ياابني هسه انا احجي وياها
....لاالله يخليك عوفها خلي تروح اريد ارتاح فدوة لعمرك
شيخ اني تعبت كلش وضجت
....والله ياابني اني تندمت على الي سويته وياك
من قبل ولان جبرتك تزوج هاي وهسه داشوف حالك
شلون متعذب وشلون مامرتاح وكلبي دينمرد عليك
واذكر الي سويته وشلون منعتك تزوج الي حبيتها
....لاياشيخ هاي قسمه والبنيه راحت الله يسترعليها
ويوفقها بحياتها راحت لنصيبها وصار عدها اطفال
والله شاهد بنت اوادم واني ماشفت منها الشين
بس هي بعد راحت الله يفتح البوب المسدودة
بوجهه
لان تستاهل
.....يعني ياابني مابقت بنفسك
.....لابويه على بختك الحرمه زوجت ومتهنايه والله يسعدها
كيف افكر بوحدة راحت لنصيبها
....الله يبارك بيك ابني
.....بس شيخنا الله يخليك عوفها خلي تطلع لتمنعها
لان ترة زهكت روحي ومليت اريد ارتاح بعد
صار سنتين على هالسالفه ويوميه تهددني
واني لخاطرك ساكت بس ترة فاض بيه
ومامتحمل بعد
.....على راحتك ابني
.....يله شيخ انا رايح محتاج شي امانه
....لابويه روح الله وياك سلامتك
....مع السلامه
وتمشيت من يمً شيخنا وصلت للممر مال البيت وكفت كدام المرايه وعدلت عكالي واخذت سبحتي وسويج سيارتي وطلعت اتمشه والهوى كان عليل ويرد الروح
وريحته الزرع تخبل والمنظر جان ينعش
وتمشيت وركبت سيارتي وبديت اكضي اموري
وكان عندي مشوار بمنطقه شبه معزوله كان لازم امر بهذا الطريق يله اوصل
وانا كنت داسوق وبهذا الاثناء سحبت التلفون
داتصل وتلفون وكع من يدي دنكت اخذة سمعت
صوت ولمن شلت التلفون ورفعت راسي شفت سيارة واكفه فتحو الباب
وشمرو منها واحد مااعرف امراة رجال والسيارة
طارت طير بعد ماشفتها بس التراب وراها
باوعت من بعيد شفت جثه ومددة على التراب
اتقربت بالسيارة جان موواضح هذا الانسان اذا عايش
لولا جريت سلاحي وسحبته ونزلت من السيارة
وباوعت مجان اكو احد المكان مابي صريخ ابن يومين
اتقربت على كيفي شفت هاي الجثه ملفلفه مامبين منها شي وردت اشوف حركه شي ماكو
صراحه كلت خاف هذا واحد مقتول وتنذب براسي
احسن شي اخابر الشرطه بس وراها كلت يجوز
هذا بي نفس وعلما يجون الشرطه يموت والله
اتقربت وانا كنت قوي كلبي ميت مااهتم ومااخاف من شي
بديت افتح هذا القماش الي ملفوف بيها الشخص
واتفاجأت من الي شفته الله لايوفقهم الي مسوين هيج
ماعدهم لاذمه ولاضمير حسبي الله عليهم
وينكم من عذاب الله
يتبع....
#الكاتبه #روجمان
