# مو-كلمن-نحبه-يستاهل-نضحيله
بقلم فردوس عبد اللطيف
الجزء 4
في سنه 2005 انخطبت اختي الكبيره فاديه وتركت الدراسه وبقت وياي بالبيت اني اشوفهه سعيده ويه خطيبهه وتحبه ويحبهه وتلفونات وسعاده اشتاقيت لابن خالتي احمد شوكت يتقدملي ويخطبني مرت 3سنين من زيارتنه الهم واحمد شاغل عقلي وفكري خصوصا من تركت المدرسه بعد ماعندي شي افكر بي
زارتنا خالتي ام احمد ومن شافتني ...هاي اشلون صايره شهد وتلزم بايديهه تتلمس جسمي عبالك تفحص لعابه واني بيني وبين نفسي اكول هاي اشبيهه تكمشني سلمت عليهه وكعدت يمهه ورحت للمطبخ اسوي شاي وسمعتهه تكلم امي
عيني ام محمد رايدتج بموضوع
ام محمد. تفضلي ام احمد كولي
ام احمد. شنو رايج بابني احمد
ام محمد. والله شكول احمد ورده وابن اختي وحباب
ام احمد. رايده شهد لابني احمد
ام محمد والله شكول اذا مقسوم الهه ربج يسهل تعرفين اني اختج وماعندي اعتراض بس لازم أستشير ابوهه واخذ رأيها
ام احمد. اي عيني هم حقكم
ام محمد احنانردلكم خبر انت اختي والي كاتبه الله يصير
اني من سمعت طرت من الفرح بدون تفكير باي شي المهم اتزوج احمد الي حبيته من كل كلبي وافقت وابوي هم ما اعترض بعد ما شافني موافقه وامي موافقه هو هم وافق
بشهر 5 اجوي عمامه وخالتي وابو ونسوانهم وتمت الخطوبه وقراءة الفاتحه
الحقيقه هو كان بعمري بعده صغير وماعنده شهاده كل هذه الأمور مفكرت بيهه بس فكرت اني حبيته والمهم اجتمع وياه بيت واحد
بصراحه من يكون الرجل بدون عمل حايكون ظعيف الشخصيه أمه تتحكم بي يأخذ مصروفه من أمه
استعجلت ما انتظرت تجيني قسمه زينه رجل يشتغل معتمد على نفسه ووافقت اعيش ويه بيت خالتي وكطعنه مهر واني تقريبا عقلي متوقف عن التفكير بس قلبي الي يتحكم بي
تزوجت اختي لكن الحمد لله اخذت موظف معتمد على نفسه مدللهه بنالهه مشتمل بحديقه اهله وكان محترمهه ويعاملهه بحب واخلاص
بتاريخ 15 -9-2005. حددو موعد زواجي طبعا مبلغ المهر الي دفعوليا كان جدا قليل وكل عروس من تجهز لعرسهه تتمنى تلبس احلى الملابس لان هاى فرصتهه تشتري الي يعجبهه لكن جابولي أرخص ملابس وقبلت بيهن
بصراحه الوحده من تتنازل من البدايه الرجل حايسترخصهه لان ماكلفته شي كل هذا واني ماكنت مفكره بي ولا حاسه اني وافقت بهيج زواج تلزيك لشخص ما متحمل المسؤليه
تزوجت واني فرحانه هم احمد الانسان الي حبيته وهم أمه خالتي اخت امي
بعد مرور شهر من زواجي بدت معامله عيالي تتغير خالتي حملتني شغل البيت وتعبني كانما كان هدفها من زواج ابنهه تجيب خدامه تخدمهم
لازم استيقظ ب 5 الفجر وأخدم متواصل الى الليل لعائله متكونه من 12نفر كنت اتعب بس ما اكدر احجي
الطبخ لازم عالحطب متقبِّل خالتي اطبخ عالغاز والخبز نخبر بتنور طين عالحطب هذه حياتهم بالارياف واني بنت العز والدلال كنت عايشه بالمدينه حياة خير ودلال شجابني شعير وظعي هل هو الحب ام الزواج ام القسمه بالبدايه انصدمت ماكنت اعرف اي شي وتعلمت بعد ماشفت صعوبه
بعد مرور شهرين من زواجي حملت وفتره حملي تعذبت لان اول طفل وياهه شغل وتعب ما متعوده عليه
وقت ولا دتي بعد ما اكدر اخدمهم كتله وديني لاهلي هناك أولد ...صار وقت ولادتي خطيه امي وابوي احتارو بي جابولي قابله للبيتولدتني جبت بنيه فرحت بيهه كولش وكنت محتاره شسميهه اختي رشا كالت اني اسميهه (حنين). الله حلو اسم حنين ليش اخترتي هالاسم رشاوي
رشا حبيبتي شهد من كثرنا احن عليج مكانج خالي بالبيت بالمدرسه انت اختي وصديقتي
بعد أسبوعين رجعت لعيالي وبدت الكراب والشغل
مرت سنه وبسنه 2006بالضبط صار التهجير
اتصلت بأهلي وكتلهم منطقتكم مو امينه تعالو هنا كعدو بيت قريب علي بلكي عيالي تتغير معاملتهم الي من تصيرون قريبين اجوي اهلي واستأجرو بيت قريب وكعدو صارو قريبين علي
مرت شهور وبدت خالتي تسوي مشاكل ويه امي يوميه تطلع شغله وتتعارك زوجي احمد الي حبيته وضحيت وتنازلت عن كلشي علموده كان يضربني بقساوه كان قاسي وياي حتى يرضي أمه الي تصرف علينه والي كانت اتهاماتهه باطله وكله تأليف وكذب
فد يوم كنت اخبزبالتنور واني مدنكه بالتنور احتركت حواجبي شافتني خالتي. هاي شنومزينه حواجبج مو عيب شدكول علينه الناس
ردت اشرحلهه منطتني مجال بهالهوسه اجه زوجي ها شكو شصاير. وما احس الابوكس على عيني أظلمت الدنيا ما احس الاركض لغرفتي
وراها رحت لبيت اهلي شافوني ابوي شافني حجيتلهم واني ابجي ابوي كال ابقي يمنه وبعد مترجعين الهم الا اطلكج بقيت بيت اهلي 4ايام بس اني بيني وبين نفسي زوجي احبه ومااريد اتطلق وابوي محامي من ينطق بالطلاق يعني يسويهه. وكتله بابا اني حامل ميصير اتطلق وبلكي يتغير
بهالحمل كدرت اقنع أبويه يقبل ارجع لبيتي وبنتي
للحكايه بقيه. بقلم فردوس عبد اللطيف. F
أنت تقرأ
# مو- كلمن- نحبه- يستاهل-نضحيله
Actionالقصه حقيقيه وعلى لسان صاحبه القصه وتحب إيصال فكره الى كل بنت التفكير قبل الزواج وعدم الاستعجال بالزواج حتى لو كنتي تحبين هذا الشخص وصدكي لا يوجد احن من اهلك عليك وكوني واعيه بقرارج لان بالعجلة الندامه
