# مو- كلمن- نحبه- يستاهل-نضحيله

الجزء 5

#مو-كلمن-نحبه-يستاهل-نضحيله
بقلم فردوس عبد اللطيف
الجزء 5
من رجعت لعيالي اعتبروني ضعيفه واذيتهم زادت اعتبروني كخدامه بالبيت واني حامل وعندي طفل وزوجي وجوده من عدمه لاشي كنت مجبره اعيش حياة المذله وما اعرف ليش شنو السبب الي يجبرني على هالعيشه هل هو الحب هل هذا مفهوم الحب عند احمد واهله حتى مشاعر احمد ماكنت أحسه يحبني مثل ماحبيته تزوجني بس مجرد حاجه الرجل الزوجه تخدمه بالنهار وبالليل يقضي حاجته بدون كلمه حلوه وبدون اي احترام لكن موقفي مابي خط رجعه المطلقه بمجتمعنا تعرفون وأهلي كان وظعهم مو مثل قبل يعني ما ردت أذب حملي عليهم تحملت هالفتره اشلون مجان لحد ما صار وقت ولادتي طبعا اهلي يودوني للقابله وهما يتكفلون بوالدتي
ولدت بنت سميتها أيه كانت حلوه ...احلى شعور لما الام تولد طفلها تحس كل تعبهه بفتره الحمل يروح وتنسى من تنظر الى براءة الطفل شعور جميل ما اعرف اشلون اوصفه الكم لان حياتي كانت مختلفه عن باقي المتزوجات فرضت علي حياة بعيده عن طموحاتي وتطلعاتي
رجعت لبيت اهلي من القابله اول مادخلت للبيت وكعدت عالسرير اجه زوجي
احمد. ها شجبتي
شهد سكتت مجاوبته كلت خلي انطيهيا بلكي كلبه يحن من يشوفهه فتح القماط والحفاظه حتى يشوفها بنت او ولد
احمد صاح هاي شنو هم بنيه وشمرها بالأرض اوووووي تأذت بنتي لحد الان كلبي يوجعني من اتذكر الموقف
الضربه صارت براسهه وكانت شتاء همزين اكو فراش وكعت عليه بس راسهه صار عالي من جهه تعلمن كصتها
انقهرت على بنتي طبعا كلمه الحمد لله على سلامتك ماكلي مستكثرهه على طلع وعافني كانما مو بنته وكأني مو زوجته
بقيت يم اهلي فتره الولاده لحد ما رجعت صحتي بعد لازم ارجع لعيالي طبعا زوجي بهالفتره ميجي يشوفنه الا مره بالأسبوع ولا ينطيني مصرف كله اهلي يصرفون علينه اذا هو عاطل وياخذ مصروفه من أمه باقي تحت رحمتهه
رجعت لبيت عيالي ورجعت لنفس الوظعيه بس هالمره عندي بنات 2 يحتاجون مداراة وعنايه وعيالي يردون خدمه من الفجر لليل كل هذا ومراضين يتحججون علي صحيح الزوجه لازم تتحمل ظروف زوجهه لكن بالمقابل لازم يكون احترام تقدير مو ضرب واهانه
بقيت يمهم مده 6 أشهر عباره عن رجل الي مصنوع للخدمه ولازم بكفاءة عاليه وبدون تقصير مره قصرت لان كنت سهرانه مع بنتي مريضه وصخونه وإسهال بقيت الليل بطوله سهرانه وياها الصبح ماكدرت اكعد اني هم بشر
دخلت علي خالتي للغرفه وتصيح وصايره اعصاب
اني شويه جاوبتهه كتلهه سهرانه ويه بنتي شيصير لو انتو تخبزون اني بشر مو مكينه
يا يابه اشلون اجاوب تعاركت وياي وطردوني من بيتهم
رحت لبيت اهلي من عرف ابوي كال بعد ماكو رجعه. هي اصلا ماكو رجعه طردوني
فرغولي غرفه عدهم في بيتهم اني وبنات 2
احتجت ملابسنا اني والبنات اتصلت بأحمد واجه جاب أغراضنا وشاف اهلي موفريلي غرفه ومرتاحه كال احسن ابقي هنا واني هم اجي يمكم طبعا هو متعلم كاعد بدون شغل
اني مكدرت ابقى عاله على اهلي اعرف الحياة صعبه وحملنه ثكيل قررت اتعلَّم خياطه بس حتى فلوس ماكنه خياطه ماعندي امي من شافتني محتاره اشترتلي مكينه خياطه ودخلت معهد تعليم خياطه وتعلمت أخيط بفتره قصيره لان الانسان من يخلي هدف بحياته يكدر يحققه ماكو شي صعب. وبديت أخيط بسعر قليل حتى اكسب معاميل والحمد لله نجحت وصرت اكسب من الخياطه وأصرف على نفسي وبناتي وبديت اتعلَّم الندافه يعني اشتري مندوف وجاهز بس اخيطه بالجودليه او اللحف وصرت أخيط للناس بعد جودليات ولحف أسهر بالليل حتى اكمل الخياطه لان في بالي اشتري بيت اهلي هما يصرفون علينه اكل وشرب بس بناتي اني اوفرلهم من وارد الخياطه والباقي اوفره وزوجي بعده عطال بطال بس اني اهملت نفسي صرت اجمع فلوس في سبيل اوفر بيت اسكن بي بدون ما انذل يم عيالي لان اهلي اكيد يفكرون يرجعون لبيتهم في بغداد بس تستعدل الظروف
مرت 4 سنوات تطورت خياطتي وصار عندي زبونات وما اتعاجز أخيط كلشي وحرمت نفسي وشبابي من كلشي ممتع من لَبْس او اي شي اهملت نفسي في سبيل العيشه المبلغ الي جمعته بهالاربع سنوات كدرت اشتري بي شقه صغيره
كانت هي مملكتي فرحت بيها لانهه نتيجه تعب ايدي وسهر الليالي وحرماني من امور كثيره بس ماكان عندي اثاث
سنه 2009 اهلي قررو يرجعون الى بغداد ومكدرت يأخذون أثاثهم اشتريتهم منهم بسعر زهيد وحولتهم لشقتي
استقريت بالشقه ومستمرة بالخياطه زوجي يبحث على تعيين لكن ماكو
مرت 7 سنين على وظعي اخذت مانع للحمل بهالفتره لان ما اريد الطفل يشغلني عن الخياطه لانها مصدر رزقنه
وكلت خلي بناتي يكبرن
في سنه 2015 زوجي طلعله تعيين كان يحب عمله بناتي كبرن قررت احبل بعد كم شهر رحت لبغداد لبيت اهلي راجعت دكتوره حتى احمل والحمد لله حملت بولد وتركت الخياطه وكلت خلي انتبه لنفسي شويه اهتم بمظهري بعد ما اهملت نفسي وأنجبت ولد وسميته امين واحمد فرح بي
عمر ابني صار 4اشهر بديت الاحظ زوجي تغير من دخل الجيش اشترى موبايل حديث بالليل اتسحب اسمعه يكلم بنات ويتغزل بيهن بصراحه بيني وبين نفسي كلت يالى بس بالتلفون
لكن فد يوم طلعت شفت زوجي واكف ويه وحده ويسولفون
هي واكفه بباب بيتهم اني من شفته ختلت ماخليته يشوفني
رحت على ابو المحل الى يمهم
سألته كتله شنو ذولي واكفين مو عيب
لا بنتي هذا خطيبهه واعتقد باجر النيشان مالتهم
للحكايه بقيه. بقلم فردوس عبد اللطيف