#مو-كلمن-نحبه-يستاهل-نضحيله
بقلم. فردوس عبد اللطيف
الجزء. 6
من سمعت هذا خطيبها وباجر النيشان تخبلت جسمي كوله يرجف عيوني تطلع منهه نار احس الدنيا صارت ظلمه ..احمد الى تحملت كل وظعه وظروفه وضحيت بصحتي وشبابي وحرمت نفسي من امور كثيره كنت أتمناها سويتله بيت من العدم بس صار عنده راتب يريد يتزوج والبنيه مو مسلمه (يزيديه)اشلون اقنعهه
كلت خلي اروح لعمامه بلكي يأثرون عليه
عمه الكبير بالمضيف وكان عمامه اثنين كاعدين بيت عمه
شهد السلام عليكم عمو انتو جيتو خطبتوني من اهلي وبعد ما سويتله بيت واشتغلت خياطه 7 سنوات تاليتهه من صار باظافره طحين يريد يتزوج هاي جزاتي
عمه الوسطاني. وشكو بيهه من حقه ههههه علوا احنا نتزوج
شهد. بس اني مقابله يتزوج
عمه الكبير. بنتي انت تقبلين ما تقبلين هو رجل ومن حقه يتزوج وانت متكدرين تمنعي طالما يكدر يصرف عليهه
شهد يعني هذا رأيكم ومراح تمنعوووه. بس لا احد يلومني عالي حا اسوي
والله بنتي المشكله بينكم اثنينكم وأنتو حلوها
طلعت منهم مسطورة ما اخذت لا حق ولا باطل وبعد مايدينه
رجعت للبيت ياربي شسوي وشبيدي فكرت دماغي احسه انشل من التفكير اصعب شي من تضحي لأجل انسان ويطعنك بظهرك. شكد حبيتك احمد وشكد ضحيت وشكد حرمت نفسي وشبابي من اللبس والاكل حتى اوفر لك بيت
طلعت من البيت ومااعرف شسوي بس لازم اوكف هالزواج
اخذت وياي كم امرأة صديقاتي ورحنا لبيت البنيه
دكيت الباب طلعت
هي نفسهه البنيه
شهد ...مرحبا
هناء اهلًا تفضلي
شهد انت تعرفين احمد
هناء اي احمد خطيبي
شهد. ماتحملت جريتهه
وسحلتهه بالشارع وسويتلهه فضيحه بقيت أصيح
شهد. ولج احمد اني زوجته وعندي 3 أطفال يسووج
ويسوون اهلج حقيره تردين تأخذين الرجال من بيته واطفاله
هناء. اني شعلي هو اجه علي
شهد ليش ماتعرفين بي متزوج وعنده اطفال
هناء. هو فهمني زوجته مريضه ومبهذله
شهد كفختهه ودفعتهه عالارض وكعت باوعتلي نظره حقد يعني اصبري أردلج إياها
بعد هه عافته واجاني عصبي ويتحجج وضربني بس مفتح موضوع هناء بس مبين طلعله حجه
بعد مرور شهر نسيت الموضوع صارت عطله العيد سافرت يم اهلي ببغداد واحمد التحق بالجيش مر اسبوع واني عند اهلي متونسه اتصلت بي جيراني ام علي
الو. وينج ام حنين انت وين
شهد. اني بيت اهلي ليش صاير شي...
ام علي. معوده بيتج محترك وشبت بي النار
اني من سمعت الخبر وكعت بالأرض اغمى علي شمموني عطر غسلو وجهي صحيت تذكرت بقيت ابجي والطم تعبي راح تعب السنين راح بيتي سويته قطعه قطعه من صحتي وعافيتي
بقيت ذيج الليله مانمت للصبح بس كشف النور اخذت تكسي وللبيت كبل
من وصلت للبيت انرعبت من المنظر البيت معطب دخلت جوه الأغراض كلهه محتركه ما باقي منهه شي كانت قنينه غاز داخل البيت متروسه غاز مفجوره والبيت مدمر شحجيلكم باقي بس حيطان من القهر انهارت أعصابي لان كل قطعه بالبيت من كدي وتعبي
بقيت افكر اشلون أعالج الوضع بقيت بالبيت يومين لحد ما يرجع زوجي حاولت ارتب بالبيت واصلحه ميفيد جبت عمال حاولو ماكو فائده الحيطان كولهه سوده مفحمه والسقف وكع
اجه زوجي ما اهتم ولا دار بال لان ماتعبان بالفلوس وماحسيته مقهور بس اني منهه طلع البيت من كلبي كرهته وما احب اسكن بي
بعد فتره وصلني خبر .. اخوان هناء هما الي حركو بيتي بعد ما سرقو شغلات منه فوضت امري لله اخاف على جهالي ما اريد العداوه اخاف اتهمهم وينتقمون اكثر سلمتهم بيد الله
بعد فتره رحت خطار لبيت عمه والتقيت بمختار المنطقة وسلم علي كان يعرف ابوي حجيتله عالي صار وانقهر علي
وكال لاتهتمين راح اساعدج
وره يومين فعلا اجه المختار مع أشخاص اثنين من المجلس البلدي قيمو أضرار البيت وكال ماينسكن بي وانطاني أوراق وكال وقعي وكال مريلي يوم الأحد حتى ابلش معاملتج
وفعلا رحتله يوم الأحد وأخذت المستمسكات
شهد السلام عليكم ابو محمد طمني خير
ابو محمد. كل الخير بنتي والدج عزيز علي وتعبان على نفسه وما اريدج تنظرين راح اسويلج تعويض وامشي بشغلتج
وراها اجتي لجنه و.....و
شهد ها ابو محمد شراح تسوي
ابو محمد. ام حنين راح اسجلج على قطعه ارض باسمج
شهد ياالله ياريت
ابو محمد. القطعه 200 متر
شهد ياريت جزاك الله خير وياريت منطقه بيها خدمات وقريبه
ابو محمد تدللين بنتي
ومشيت المعامله وحصلت قطعه ارض باسمي الحمد لله
رجعت للبيت لكيت خالتي يم الأطفال وحجيتلهه الي صار
اشو هاذي تلعثمت ونظره حسد مكدرت تخفيهه شنووووو صارت تخربط بالكلام واشلون ووين حصلتي وين سويتيها عمي والله بخت عمي انت محظوظه
شهد خاله هاي تعويض عن البيت لان ماينسكن بي
بعد استلامي القطعه قررت ابنيها فاتحت زوجي كتله لازم نبني القطعه وانت تساعدني من راتبك وراح اتداين من ابوي هم واعدني بديت ابني شويه شويه أعلنت الحصار بالبيت تقشفت بكلشي سنتين واني والله دجاجه ما دخلت للبيت حرمت نفسي وبناتي من كلشي الفواكه تجي بموسمهه مانشوفهه كله حتى ابني البيت وحتى ابوي ساعدني
كلشي يهون والمعده ممكن تمليهه باي اكل قصرت على نفسي من ملابس حتى اهلي قللت زيارتي الهم والتهيت بالبناء واسوي سلف مرت سنتين فتره البناء وأهلي مشايفتهم ابوي اتصل يعتب علي. التهيتي بالبناء ونسيتي نفسج بالجذب ماتجين نشوفج
شهد. اسمعني بابا. الكروه الي ادفعهه للتكسي تنفعني
براحتج بابا بعد لادكولين عندي اهل
شهد شسوي بابا بس اخلص بناء وراها انظف البيت ومدارس البنات صبرو علي
اقتنع بكلامي
للحكايه بقيه. ترقبو البارت الاخير بي احداث مؤلمه
بقلم فردوس عبد اللطيف
أنت تقرأ
# مو- كلمن- نحبه- يستاهل-نضحيله
Actionالقصه حقيقيه وعلى لسان صاحبه القصه وتحب إيصال فكره الى كل بنت التفكير قبل الزواج وعدم الاستعجال بالزواج حتى لو كنتي تحبين هذا الشخص وصدكي لا يوجد احن من اهلك عليك وكوني واعيه بقرارج لان بالعجلة الندامه
