#مو-كلمن-نحبه-يستاهل-نضحيله
بقلم فردوس عبد اللطيف
الجزء. 7 والاخير
بفتره البناء والتقشف الي عشنا حتى نوفر تراجعت صحتي وتعب السنين طلع علي راجعت الدكتوره كالت إنتي حامل وضعج خاص
شهد ميخالف دكتوره اني التهيت بالبناء وأهملت صحتي
الدكتوره. حا اكتبلج مقويات وفيتامين استمري عليهه لا تقطعيهه
بعدها استمريت عالعلاج وبديت اهتم بصحتي جبت معلاق وفواكه وخضروات
وصلت بالحمل 7 أشهر كمل البيت تحولت بي وأخيرا تحقق حلمي ثمره التعب والشقاء والجوع الحمد لله ربي عوضني بهالبيت صرت ارتب البيت وأثاث ومستلزمات تعرفون بعد كظيت شهر كامل واني ارتب بالبيت وأشتري أغراض
كلت اكمل قبل لا أولد والتهي بالطفل
بهالاثناء بدء احمد يتغير علي صار يعصب ويضربني لأتفه سبب ويغلط علي كطع المصرف علينه بالبيت وراتبه من يستلمه يودي يجمعه يم ابو
شهد. احمد مو المفروض انت مستلم راتب وين مصرف البيت
احمد ماكو راتب ما نطوني
شهد. اني اعرف استلمت وين وديته ليش هيج تسوي مو حرام عليك بيتك وجهالك انت مسؤل عنهم ترى حرام عليك متجيب الحاجه الا بالصياح والمناكر
احمد. اني ما اريدج بعد اريد اتزوج
شهد. ها هيجي كول اني سمعت تودي راتبك يم ابوك تجمع للعروس وتريد تجيبهه في بيتي
احمد اجيبهه واكعدهه وياج بالبيت وشتسوين سوي وطخي راسج بالحايط
شهد. زين عيد الأضحى جاي وديني لبيت اهلي اني والجهال
احمد. روحه لاهلج ماكو مترحين واني اتزوج ومئه الف وحده تقبل بي عندي راتب وبيت
شهد حبيبي البيت بيتي
احمد قشمري نفسج بهالحجي اتزوج واجيبهه بالبيت وغصبا عليج
شهد. ياويل يضحكن عليك تصرف عليهن
احمد انت معليج الي براسي اسوي
ضجت اشتقت لاهلي حتى ما اكدر اروحلهم اتصلت باخوي محمد
شهد. الو محمد اشلونك لزمتني البجيه وبقيت ابجي
محمد الو هلو شهوده اشبيج ليش تبجين
شهد. محمد اني ضايجه تعال يمي
محمد اي اجي حبيبتي شهوده بس اهلي ثالث العيد يرحون لرشا بخانقين يتباركولهه لبيتهه هم كملت بناء وياج وتحولت صارلهه أسبوعين بالبيت الجديد ولازم ابوي يروح
بس لاتخافين اجيج
شهد. اووو شكد عيب ليش مكتلي رشا كملت بناء وتحولت لو اني يمكم كان رحتلهه وياكم
العصر وصل اخوي محمد. وبقى يمي يومين
هذا الحدث حصل بعيد ضحيه في سنه 2016
بوجود اخوي بالبيت زاد حقد احمد ورعونته وتصرفاته واستغل انشغال اهلي وغيابهم وظل يتعارك كل شويه باليوم اكثر من عركه واخوي يفاككنه
محمد يمعودين. عيد الله واكبر بس تتعاركون
ثاني يوم العيد الصبح كتله محمد روح جيبلنه ريوك من الاسواق هذا قريب
رحت احضر الشاي كعد ابني امين احمد روح اخذ امين لا يتأذى وحده بالهول
احمد اني معلي
شهد هاي اشبيك مو ابنك كتلت روحك عالولد شويه لعبه حن عليه
ظل يغلط ويسب ويفشر وكانما متحمل علي وانفجر ظل يضربني بايديه ورجليه بكل مكان بجسمي واني غطيت وجهي. وأسمعه يكول الا اموتج واسكنج الكبور وظل يضرب وكفت عالحايط حصرني وركض جاب الجاكوج الحديد وظربني على راسي اكثر من ضربه بعد فقدت الوعي ماحسيت بالدنيا مع اني كنت حامل وكعت عالارض
اجه اخوي محمد طبعا اني فاقده بعدين حجولي بناتي الي صار
من دخل محمد ولك احمد هاي شسويت اشلون تظربهه استغليت غيابي وتضاربو وصارت عركه قويه دخلو الجيران فوك ما يضربون احمد ظلو يضربون باخوي شبعو كتل
محمد اتصل بابو هلو بابا هسه ترجع من خانقين وبسرعه شهد حالتهه خطره وبالمشفى
ابوي. بابا صدك جذب اشبيهه احجي ليش تبجي
محمد ظربهه الحقير وينزل ماي أصفر من خشمها وفاقده الوعي
ابوي كان ردة فعله قويه كال اذا صار شي على شهد اقتل احمد اذا ماتت بنتي
محمد اي بابا تعال اني وحدي ومحتار جبناها اني وخالي ومن تجي احجيلك الي صار
ابوي ماشي بابا مسافه الطريق
محمد انتظرك
ابوي وصل للمشفى وشاف حالتي كدمات على وجهي خياطات براسي اني فاقده الوعي بغيبوبه فحصو وضع الجنين حالته مستقره بس اني وظعي خطر الطبيب يريد يسويلي مفراس لكن خطر عالطفل لان يسوي تشوهات بالطفل
بعدهه سوو تقرير وابوي سوى بلاغ بالشرطه ابوي ماسكت
واحمد كان خايف بس اهله مساندينه وياه عالغلط
ابو احمد. يكول لأبوي. لاتخاف على بنتك ابو محمد هي زوجته وشيسوي بيهه احنا ماندخل بنتك ماينخاف عليهه كذابه الظاهر تحب المشاكل
ابوي تعصب من كلامه وصارت مشاده كلامية بين ابوي وابو احمد امي اغمى عليهه من القهر وارتفع ضغطها
كمل محضر الشرطه ويردون يأخذون الادله احمد نكر بالبدايه كال اني مضاربها هي وكعت من الدرج ورأسها انطخ بالأرض الكاشي
جاوبهم الطبيب كال لا مبين مضروبه براسهه بشي قوي ولو واكعه من الدرج الطفل يتاثر لكن طفلهه مابي شي وخل نسويلهه أشعه ونتأكد وبعدين نشوف كلامك صح ام خطأ بعد الأشعة
طلعت نتيجه الأشعة
الحاله خطره كسر بالفقرة الرقبه وكسر وخلع بالكتف الأيمن وفطر بالحوض وظربه على الرأس أدت الى تلف الأنسجة حول المخ وظرر بالجمجمه وتجلط دماغي وشلل نصفي
من قرى النتيجه ابوي كال هذا شاف بنتي ما عدهه احد وهيج سوى الا اسجنه
بقيت فاقده الوعي أسبوعين عايشه عالمغذي وأهلي سهرانين وياي بالمشفى ماغفلت عينهم عني
عيالي أبد ماسالو علي لأنهم كانو خايفين
من فتحت عيني ...اباوع اكول اني وين ما اكدر اتكلم لساني ثكيل بس اباوع بعيوني وما اكدر أحرك ايدي انشليت تماما
اختي رشا تقربت مني شافتني بهالحاله كانت باقيه يم أطفالي محد يمهم ابني امين كان عمره سنه ونص من شافني ظل يصرخ ويبجي انرعب وجهي كان ازرق من الظرب عيوني مورمه وحلكي وجسمي كله يوجعني
رشا من شافتني بهالحاله اغمى عليهه ظغطهه نزل صار 4 ونيموهه بصفي نفس السرير وعلكولهه مغذي بلا صحت خطيه كانت حامل 5شهور طبعا مصورها اخوي محمد اشلون من دخلت وشافتني وشصاربيهه ومن صحيت راواني التصوير مدري اضحك مدري ابجي
رشا تحاول تحجيني اني ما اكدر اتكلم ولا اجاوب امي نادت الطبيب من اجه شافني فحصني كال مضروبه جلطه متشوفوهه متكدر تحجي لاتحجون يم رأسها تحتاج راحه كتبلي علاج بعد أسبوعين تحسنت حالتي
الدكتور كال لازم نولدهه بنج موظعي وظعهه ميتحمل بنج عام
بعد ماجبت ولد الحمد لله بس ماشفته بقيت بالمشفى والطفل اخذو للبيت بس ما اكدر أتحرك ورقبتي تتحرك مثل ميل الساعه
ابوي رفع قضيه على احمد وصدر قرار سجن بحقه مده 7سنوات وانحبس احمد اني طلعوني للبيت لكن وظعي الصحي تعبان يثبتون المخده يلى تثبت رقبتي ما أسيطر عليهه وصرت جليسه كرسي متحرك امي وخواتي يداروني مثل الطفل وزني كان ثقيل من يحملوني بقيت على هالحال مده 6اشهر بلشت علاج طبيعي بس اترك العلاج ارجع انتكس وللعلم مصاريف علاجي كولهه عالوالد بناتي انهملن دزيتهم لعيالي لان اهلي يادوب يداروني وصار ببناتي قمل لان محد بحالهم وحلقو شعرهم صفر من اشوفهم انمرد وابقى ابجي
بعد مرور شهرين تنازلت عن حقي لاحمد حتى يطلع من السجن وابو كفله طلع احمد حاقد على أبويه بس ابوي وقعه على وصل امانه بمبلغ 200مليون اذا صار علي شي
اجه احمد يشوف ابني سال شنو جبتي امي كالتله بنت من فتحت الحفاظه وشافه ولد شهك وكال ليش دكولين بنيه هذا ولد وراح يم اهله حجالهم والولد بليلتهه تخربط وصار بي خناق وصار يختنق ونفسه ينكطع وما فاده العلاج امي تعبت تداري شهرين يختنق واجه يوم ابني حبيبي الي تعذبت بي وقرة عيني سلم روحه لرب العالمين توفى ابني واني متت قهر بس مشلوله ما اكدر الطم بس دموعي تنزل
بعد فتره احمد التحق بالموصل واتصوب براسه شظايا فتحت راْسه بس تعالج يمكن رب العالمين نقذه لخاطر جهالي والشظايا اثرت عليه وصار عنده نوع من الخبال بس من يأخذ علاج يتحسن
اني حاليا بالمشفى وأطفالي يم عيالي وابني امين يم اهلي
بس اني انتهت حياتي واني بعز شبابي عمري الان 29 سنه
بس ماكو فائده مني مقعده على كرسي مصابه بشلل والآن ماعندي مانع اذا يتزوج احمد لان بعد ما أنفع كزوجه
كل الي صاربي بسبب زوجي لانه انسان جاهل (غير مثقف) وماعنده شخصيه
احب انصح كل بنت لاتتسرعين بالزواج حتى لو حبيتي اسئلي عليه واهم شي الاهل وتأثيرهم وخلي في بالج ماكو احن عليج من اهلج مهما عاملون بقساوه ..كوني واعيه بقرارج لان في العجلة الندامه
تحياتي لكم اختكم شهد اني ماكدرت اكتب لكن بنتي حنين اسرد وهي تكتب واذا وافاني الأجل ترحمولي وادعولي
حبايبي عذروني تأخرت عليكم بس اريدكم تدعون لاختكم شيماء اسمها الحقيقي وليس شهد لان من نزلت قصتهه انقطعت اخبارهه عني وكنت اتمنى تقرى قصتها ولكن كان وظعها خطر وفى المشفى اخواتي ادعو لها بالرحمه اذا وافاها الأجل واذا عايشه ادعو لها بالشفاء لخاطر اطفالها
النهايه. ترقبوني بقصه جديده. الكاتبه فردوس عبد اللطيف f
أنت تقرأ
# مو- كلمن- نحبه- يستاهل-نضحيله
Actionالقصه حقيقيه وعلى لسان صاحبه القصه وتحب إيصال فكره الى كل بنت التفكير قبل الزواج وعدم الاستعجال بالزواج حتى لو كنتي تحبين هذا الشخص وصدكي لا يوجد احن من اهلك عليك وكوني واعيه بقرارج لان بالعجلة الندامه
