# مو- كلمن- نحبه- يستاهل-نضحيله

الجزء الاول

# مو-كلمن-نحبه-يستاهل-نضحيله
بقلم فردوس عبد اللطيف
الجزء الاول. حقيقيه
بِسْم الله الرحمن الرحيم
اني شهد مواليد 1988 من عائله مرموقة اسكن في احد مناطق بغداد اهلي ميسورين الحال احنا ثلاث بنات وإخوان اثنين
مواصفاتي ولدت في بغداد شخصيتي دمي خفيف وعصبيه وطويلة القامه شعري طويل كستنائي حنطاويه البشره
والدي ....مقدم حقوقي
والدتي...ربه بيت امي تزوجت وعمرها 12سنه مواليد 1972
فتحت عيني عالدنيا عائلتنه سعيده جدا وابوي كان مدللنه وموفرلنه كولشي من ناحيه الاكل الملابس وكل مستلزمات الترفيه الى يحلم بيهه كل طفل
بصراحه من طفولتي ماكنت اشوف والدي كونه عسكري ويداوم بالبصره واجازاته قليله يعني مانشوفه الا قليل طبعه صارم بسبب كونه ضابط عسكري بنفس الوقت هادئ واذا تصرفنا غلط او شقاوه اطفال مكان يستخدم الضرب كان يفهمنه بخطأنا ويوجهنه ويامرنه بترك الخطا والتصرف بصوره صحيحه كنا نتمنى يبقى معانا اسلوبه التربوي حببنا بعكس والدتي كانت عصبيه وتظربنا على طول وسلاحهه الوحيد (الجفجير) مكنت احب معاملتهه النه
كنت بصف الرابع الابتدائي ومدرستنا قريبه كنت احب المدرسه وكنت متفوقه والطالبه القدوه بالصف وأيام التسعينات خير وفير ترقى ابوي قاضي ..كان بساعد الناس لوجه الله مجان يأخذ منهم فلوس او اي شي مقابل خدماته لمساعده الناس .بس بصراحه هما الناس كانو من نفسهم يجيبولنه هدايا والبيت ينترس هدايا اغنام وصوغات أشكال وألوان . غير راتبه كان مكفينه وزايد
كنا سعداء بهذا النعيم الي عايشين بي والدتي دائما توزع من الهدايا صدقات
والدي ياخذنه سفرات وحدائق حياتنا سعيده
اتذكر كان يأخذ دفتر الي يوزعون بي مستلزمات للموظفين من الحوانيت بالشعب يروح يشترينا كنت احب الرسم هوايتي المفضله والدي يجيبلنه كلنا ألوان مائية وخشبيه وكل الأنواع نكعد اني وخواتي نرسم ونلون نحب الموسيقى جابلنا بيانو وهرمونيكا نعزف ونغني كانت حياتنه سعيده
مرت سنين الطفوله السعيدة مثل الحلم دائما الأيام الحلوه تمر بسرعه تركض ركض مرت سنين وفد يوم سمعت أبويه يكلم امي
عيني ام فاديه اني شغلي على طول بالواجب واخاف عليج انت حلوه وبعدج صغيره وهنا وحدج ميصير اخوي باني مشتمل بحديقتهم حا اشتري واحولكم يم اخوتي
سنه 1999 تحولنا بمنطقه اخرى وكعدنا بالمشتمل يم بيت عمي الكبير تركنا بيتنا ومنطقتنه ومدرستنا وحياتنا وذكرياتهم كلهه تركناها احلى واسعد حياة وذكريات تركناها خلفنا اول ما دخلت المشتمل انقبض كلبي وحزنت لان حياتنا وسعادتنا وبيتنا ومدرستنا كلهه راحت ومترجع ودخلنا لبيت صغير جدا غرفتين صغيره ومطبخ وملحقاته بقيت ابجي لان بيتنا السابق كان اجمل واكبر انتقلنه للمدرسه القريبه مدرسه ابن حيّان تغير على كلشي حياتي كلهه تغرت تراجع مستواي الدراسي كنت مستغربه وصعبه اركز بدروسي مثل قبل. بيت عمي يمنه اولاد عمي كبار متزوجين وعدهم اطفال وهوسه كل هذا اثر علينه لأنهم قريبين علينا
مرات اختنك بالبيت اوكف بالباب وإلا ابن عمي عاط بي دخلي جوه شعندج واكفه بالباب وظربني ظرب قوي وبعد ما اشوفج تطلعين بالباب
من اجه ابوي حجيتله كال ميخالف بنتي اذا تضوجين اني اطلعكم صحيح ميصير توكفين بالباب
وصدك ابوي بالليل ياخذنه نشتري مثلجات ويفرنه بالسياره ويشتريلنه حلويات ونرجع فرحانين وسعداء
مرت سنتين تقريبا سنه 2001 بيت عمي معاملتهم تغيرت حاقدين علينه يكرهونه محد يزورنه وبغياب ابوي يجون يتعاركون ويه امي غلط ومسبه كله بسبب نسوانهم تغار من امي لانهه اجمل منهم وتشبه الممثله شاديه ومرتبه وبيتنا مرتب احسن من بيوتهم واحنا كلنه نظافه وترتيب من يدخلون يشوفون بيت صغير احسن وارتب منهم صارو يالفون كلام باطل وكل هذا امي ماتحجي لأبوي تخاف لا ينقهر ويصير بي شي وهما 7 اخوان وضخمين مسلوبه الرحمه من وجوههم كل هذه المشاكل قلبت حياتنه الى تعاسه وبالكوه نجحت من السادس الابتدائي وصرت بالاول متوسط وبالعطله كنت اختنك بالبيت اروح لبيت جدي اهل امي بيبي كانت تحبنه وتحترم ابوي لانه ماقصر وياهم من توفى جدي ب 91 كانو خوالي صغار وابوي تكفل بمعيشتهم ومدارسهم خوالي طيبين ومياذون احد
ابوي رجع من الدوام ... سال وينهه شهد
ماما. اجه خالهه سعد واخذهه وياه
واشلون تخليهه تروح ميصير بنتج تغفل عينج عنهه
اجه ابوي أخذني وتوبني بعد ممنوع اروح ابات الا وياهم
عاد كتله بابا خلي اكولك شي. اني ما احب هذا البيت صغير وخنكه وولد اخوك دا يحاربونه وميحبونه سويلنه حل
ابوي صفن...محسبت بناتي يكبرن بسرعه لازم اشتري بيت اكبر. بقلم فردوس عبد اللطيف.
للحكايه بقيه f