مشوار دلال

الجزء التاسع

#

رائد...صارت علاقتي بأم سيف قويه ، بس متعدت حدود السوالف وشغلات خفيفه...
موصلت الى مرحله العلاقه(.......)
احجيلها واشكي الها همومي ،جنت الگه بيها متنفس الي من الضغوط...
رائد...عافتني دلال گاعد جوه ويه الجهال بين متكمل شغل عدها فوگ...
عجبني بهالفتره احجي ويه سحر...
احنه دنحجي واسمع شخص ثالث على الخط صاح بااسمي، وعرفت دلال راح تحرگ الدنيا.....
رائدددددددد

دلال...نزلت اركض وجهي ينفض دم  واجهته وهو بقى ينكر..
دلال...كافي عاد يانذل صار سنتين وادري بيك وبقذارتك ، وساكته بمزاجي ...مو ضعف مني ، بس مردت اظلمك...
دائما اغالط نفسي واگول لا رائد يحبني وميسويها
بس طلعت خاين مع الاسف..
رائد...والله اني احبج وهاي مجرد نزوه، وماعندي شي وياها...
دلال...كافي وبعصبيه ، مااتحملك بعد ، اطلع من حياتي يانذل..تعبتني ، حبيتك بكل جروحي...
وهسه مااتحمل كافي ...اكرهك ومطايقتك وكارهه كل شي بيك...
حرامات عمري ضيعته على واحد ميستاهل...
طلگني ...طلگني اذا عندك ذره من الرجوله والكرامه...
رائد...دلال كافي انتي عصبيه ومتعرفين شنو تگولين ،
دلال...اعرف شنو اگول...داگولك طلگني وراح اروح الم غراضي وغراض الجهال، وتحلم بعد تشوفهم ...

رائد...دلال فقدت وانهارت بس تصيح وتكسر بالغراض وتبجي ...وتريد الطلاگ وراحت تلم بالملابس...

رائد....وگفت باب الغرفه وگتلها...
انتي ابقي بالبيت هذا بيتج ، واني طالع لان اني الغلطان...(گلت انطيها فرصه ترتاح شويه، وبعد كم يوم تبرد وترجع لعقلها)

دلال....اي اني ابقى بس لتحاول تخطي عتبه الباب...
رائد....لا مااجي اطمئني...
دلال....انطيني نسخه مفاتيحك مال البيت...ولتحاول تحجي ويايه بالدوام ترى احرجك گدام الموظفين...

رائد...اخذت ملابسي وطلعت وجار ورايه خيوط الخيبه، هدمت حياتي بنزوه طيش..اوف من كيد النسوان..
رحت گعدت بيت اختي امل لان اتزوجت وگعدت بغداد...
مرت كم يوم ودلال ابد متراويني وجهه بالدائره...
واني مااندگ بيها، لان اعرف طبيعتها من تنقهر من شغله متحب احد يضغط عليها لان تعاند..
خليتها براحتها...
اعرف اخبارها من رويده ، عرفت امها چايه گاعده وياها...

دلال...من صارت المشكله ...خابرت امي وگتلها جيبي غراضج وتعالي گعدي يمي...لان رائد طلعله ايفاد مفاجئ...
دلال...رائد صدمني وكسرني ، ادري بي يحبني بس شنو الفايده...گدر يعرف وحده عليه ولعبت بمشاعره...

ام سيف...من عرفت صايره مشكله بين رائد ومرته، اني استغليتها وسويت مشكله بيني وبين رجلي وطلبت الطلاگ...
تواعدت اني ورائد نتشاوف...وتشاوفنه

سحر...رائد حبيبي اني راح اطلگ واصير ملكك وبس الك...
رائد...اسمعها تحجي وماخذها على گد عقلها...واستمرت لقاءاتنا المتكرره ...ودلال متقبل صلح وتريد الطلاگ ومتريد خط رجعه...