مشوار دلال

الجزء الاول

#مشوار_دلال
البارت الاول
#بقلمي
همسات الليل(ام آيه)

إذا ما أتاك الدهـر يومـا بنكبـةٍ
                            فافرغ لها صبراً ووسع لها صدراً
فإن تصاريـف الزمـان عجيبـةٍ
                           فيوما ترى يسراً ويوما ترى عسراً

قصتنا اليوم حقيقيه واحداثها واقعيه....وبطلة قصتنا اسمها (دلال)....اتركم مع البطله واحداث قصتها...

*****************
منير.... روحي شغلي النقطه مال الگلوب دلال وصلتلها بالكهرباء...
دلال : اي منير وخر عنها راح اشغلها.... اه ه ه ه (بعيطه)....
ام حاتم .....يمه بنيتي تكهربت يبوووو...
الله لا ينطيك يامنير على سوايتك السوده شسويت بااختك.....
يمه راحت بنتي مني الحگولي ياعالم ياناس...
حاتم ....ها يمه شكو شصار شبيج تصيحين ...
اختك اتكهربت يمه وماتت يبووو على حظي المصخم...
حاتم ...دلال دلال گعدي حبيبه......ظربتها راشديات الما رجعت لوعيها...
دلال....فتحت عيوني وچان اكو غواش عليها وشفت امي واخوتي فوگ راسي ....امي تبجي واني مستحيه ديفركون بايدي و بوجهي...
ام حاتم.....يمه بنيتي دلول وشمعه بيتي ردت روحج ورديتي اليه ياغاليه...

اني دلال واحب اعرفكم على نفسي...
شكر موصول للكاتبه....
ارجعلكم الى الوراء من چان عمري 18 سنه ...

مواصفاتي بيضه ومتوسطه الطول وعيوني ملونه وشعري طوله وسط.....يگولون عليه حلوه ماخذه جمال الشمال من اهل ابويه ...
اعيش ويه اهلي واحنه ناس بسطاء جدا وعلى گد حالنا..
امي حلاويه وهي انسانه عظيمه بشكل وفوگ الوصف واعتبرها قدوتي بالحياه....
زوجوها اهلها وهي صغيره بعمر 13 سنه وصار عدها اختي الجبيره  سعاد وحاتم ومنير ...
واتوفى زوج امي وتركها وحيده بهمها وهم جهالها الي چانوا كلش صغار ...
كافحت امي وتعبت وبقت تعيلهم وشايله المسؤوليه وحدها وماأخذت مساعده من اي احد...
اشتغلت هوايه شغلات شريفه  ومباعت نفسها بسبب الفقر والعازه...
اخر شي جماعه طيبين شافولها شغله  بمعمل لف للچكاير .....
واشتغلت بي حتى تعيل اطفالها الايتام لان ماعدها سند بالدنيا بس رب العالمين.....
الى ان اجه اليوم الي شافها بي والدي...
وچان شاب من اهل الشمال...ملگه فرصه عمل بديرته... واجه لبغداد دياخذ فرصته بالحياه...
شاف امي ارمله وصغيره بالعشرين وسباعيه ومتوطي راسها لاي احد ...
انعجب بيها وبقوتها .. .وتقدم لخطبتها وتمت الموافقه من امي وبيبيتي...
واتزوجها .....
وجابت اخويه لؤي وبعدين اجيت  اني اصغر منه  بسنه...
والدي دللنه وجان عطوف علينا وعلى اخواني الي من امي لان ايتام وهو يخاف الله هوايه بيهم ومقصر وياهم..
امي تغيرت حياتها من اتزوجت ابويه ...
وحست نفسها عدها سند بالدنيا....وانشال عبئ چبير من حياتها لان ساندها شخص وراح يشيل عنها الهم والحمل باقي العمر...
بس مو كلشي يتمناه الانسان ويحلم بي  ويريده  يكمل...
ابويه جان كلش خوش انسان ويخاف الله ورحيم بااخوتي وميفرق بيناتنه ابد.....
بس عيبه الوحيد چان يشرب الكحول والشرب هد حيله وتعبه.....وبده يتعب وهو بعده بدايه الاربعينات....
ويوم عن يوم زاد تعبه بسبب المرض....
وصار عمري 8 سنين واخذه الموت من عدنا وهو بعز شبابه...وفقدت ابويه وصرت ويا اخوتي بقائمه الايتام....
ورجعت امي لقهرها وظيمها وزاد همها  وكبر بالزايد....وهالمره كثروا ايتامها..
امي ماعدها لا اخ ولا اخت يساندوها .....عدها بس ام ومريضه وضريره وتحتاج من يرعاها.....
ربتنه احسن تربيه ....ومايوم احد جاب سيرتنه بشي موزين....
واخوتي ربتهم تربات زلم مو مبينين ترباة مره الى ان كبرتهم.....وذبوا نفسهم على الشغل واعتمدوا على نفسهم  ...
امي فقدت اخويه الشقيق لؤي بعمر 15 سنه ومات متكهرب.....
وغيابه دمر امي وزيد همها وقهرها وكسرها....بس لخاطرنه رجعت وگفت على حيلها....
اختي الچبيره سعاد اتزوجت واني صغيره وحتى اولادها صاروا قريبين من عمري...
اخوتي اتزوجوا وعايشين ويانه بنفس البيت وكلمن شايل همه....
وامي بقت تشتغل وتخيط وتعيلنه ومحتاجت لاي احد...
چنا عايشين بحي شعبي ، وعلى البساطه بس ابد مقصرت ويايه لابلبس ولا باي احتياج....
اني الوحيده كملت دراستي وطبعا بمسانده عمي محمود وهو الوحيد الي وگف ويايه من عمامي....
اهل والدي كلهم چانوا مقابلين على زواج ابويه من امي لان ارمله وعدها ايتام ومن طبقه فقيره وهمه ناس مرتاحين...
ولان غريبه ومو من گرايبهم...
عمي محمود استاذ جامعي وعايش بغداد...ساندني وشجعني على الدراسه..
گدرت اكمل ثالث متوسط ودخلت معهد سنتين وتعينت بدائره امنيه ...موظفه اداريه اشتغل على الطابعه...

واليوم چان اول يوم الي بالدوام...
ام حاتم....يله دلال تاخرنا...
دلال...على شنو اتاخرنا يوم ....
على دوامج يابنتي غير...
وانتي شكو  تاخرتي يايمه...
مو اني الي راح اوصلج لدوامج...
دلال. ...يمه وين توصليني شنو اني جاهله لو صغيره...مو عيب شيگولون عليه الموظفين الي ويايه بالشغل..
ام حاتم......شيگولون خل يگولون ...خو ما اعوفج تروحين وتجين وحدج بالنفرات وانتي بعدج حديثه...
ام حاتم.....يله كملي تبديل وديري بالج تحطين حمره  ...
دلال....مااحط حمره والله ...
ام حاتم....اي يمه احنا ناس بسيطين وعايشين بمنطقه شعبيه ...وكلها تحجي وتعيب من تشوف شي غلط..
خلينا بحالنا وابعدي عنا لسانات العالم وتهايمهم....
ام حاتم...اني تعبت عليكم هالعمر كله وماريد احد يجيبج انتي لو اخوتج بحجايه...
دلال.....لتخافين ماوطي راسج يوم ،ومقدره كل تعبج ويانه...يله اني كملت خل نمشي...
طلعنا اني وامي وصعدنا بالفورتات ..
ام حاتم ....دلال طبي جوه يم الچام اگعدي واني اگعد بالطارف خاف احد ينطخ بيج...
دلال...امري لله فايته...يمه ترى والله اني كبرت ميصير تعامليني عبالك طفله...
ام حاتم...شگد متكبرون تبقون بنظري صغار ...
ام حاتم....يمه بنيتي مااوصيج....
لتضحكين ويه الموظفين بدون سبب واختاري صديقه تشوفيها من ثوبج...
ولتباعين فوگ بالعالي تره تنكسر رگبتج بنيتي...
وعلاقتج خليها محدوده ويه زملائج على گد السلام والشغل...
ولتنطين سرج لصديقه لان الدنيا متتأمن والي تشتري سرج اليوم باچر  تبيعه برخيص...
وانتبهي على روحج وكلامج واتستري بگعدتج...
ولتغترين بجمالج وتشوفين حالج على البنات......
الانسان كلما يكون بسيط ،الله يزيده جمال وحلاه بالروح وبالشكل...
ويمه ليقشمرنج البنات وتخربطين بلبسج وشكلج ،الله ناطيج نعمه وحلاه ماكو داعي للتزوگ...
واخر حجايه اگولها الج...
اكلي الي يعجبج ولبسي الي يعجب الناس ...
والي يعجب الناس هسه هو الستر والحشمه بنيتي...

دلال .....صار يمه والله افتهمت ،يله مبقى شي و انزل...
ام حاتم ...مودعه بالله بنيتي ماوصيج بعد،اني ارجعلج ساعه 2 الظهر...
دلال...يمه اني ارجع الدنيا امان شبيج والله راح تحرجيني گدام موظفين الدائره...
ام حاتم...اذا ميعجبج الوضع گوليلي حتى اگعدج من الوظيفه...
دلال...يوم مو ميعجبني بس اني على مودج احجي ......راح تتعبين من الروحه والرجعه وهم مصرف زايد...
دلال.....يعني الراتب كله راح ندفعه بس على الكراوي..
ام حاتم....اذا  على التعب معليج انتي بيه ،اني  مااتعب..
واذا على الصرف معليج انتي....   مااخذ من راتبج ولا دينار..اني ادفع الاجره من شغلي...
دلال....فهمتيني غلط اني اروحلج فدوه حبيبه ...
وجوه رجليج راتبي يااعظم ام بالدنيا...
يله نازله مع السلامه يمه....
الله وياج بنيتي مودعه بحفظ الله..

لاتنسوا التصويت والتعليق على القصه
اتمنى لكم قراءه ممتعه وحسن الاستمتاع

الكاتبه
همسات الليل(ام آيه)