حقد الاخوان

الجزء 4

#قصة_حقد_الاخوان_جزء_4
#للكاتبه_فردوس_عبد_اللطيف
بدت عندى كابه وخوف شسويت بروحى لانوم بالليل وبالنهار الوب شسوى ياربي اشو عادل مداير بال المصيبه
تخربطت معدتى ما تستقبل اى اكل كمت اتقيء امى عبالهه مستبردة وتسويلي نومى بصرة وتشربنى ما تدرى بمصيبتى شكلهه غير تتخربط على وين انطى وجهى يا ربي
الوووو عادل وينك الحكنى
اشبيج حبي حياتى
يا حياتك انى بمصيبه
اشبيج يا ستار
يمكن انى حامل
شنووو  ولج صدك جذب
بجيت الحكنى
انطينى مجال افكر
يوم الثانى
خابرنى عادل
الو ساهورة عمرى
هلو عادل
اليوم انتظرج براس الشارع اوديج للمستشفى نحلل ونتاكد
وشكل لامى
اى شي
يمه اريد اروح على صديقتى خطيه كلش مريضه تريد تروح للمستشفى
وشكل لابوج اذا سال
كليله اى شي
زين طلعت رحت شفت عادل براس الشارع ابو مشتريله سيارة برازيلي يروح بيهه للكليه ودانى للمختبر كله نريد نحلل لزوجتى نشوفهه حامل..انى من سمعت كلمه زوجتى احس ردت روحى
سولى تحليل وكعدنه ننتظر على اعصابنا رجلى تختض وعادل دكطعت رجليه من المشي دوخنى رايح جاى صاحو اسمى كلبي دك رجفت رجلى ثكلت
ركض عادل تفضل طمنه
مبروك حامل
اصفر وجهه اخذ الورقه واجه على
الا انى اكثر منه مرعوبه
تمشينا للسيارة صعدنه بيهه
بقينا ساكتين لانحجى ولا ساق كاعدين وبس لحد ما سمعت هورن يمنه فزينه صحينه من الصفنه
كلى سهورة تنزلى تكدرين
ما اكدر اخاف عادل خاف اموت الله يخليك حاجى اهلك...
زين خلى اشوف
اوكف ودينى لامك انى ابوس ايدهه يعنى تعتقدين تغير رايهه
شمدرينى خلى نحاول وياها
رحنه لبيتهم دخل هو كبلى
صاحنى تعالى سهورة
دخلت .. جان دكول هاى شجابج شرايدة
دنكت بست ايديهه خاله فدوة اروح لج استرى على انى عرضكم
روحى عينى روحى الله يدرى ويه منو غلطانه وجايه تذبين بلاج علينه روحى ماما روحى شوفى غيرنه تلزكين بلوتج عليه
خاله فدوة اصير خدامه عندج بس سترى على ولج روحى شوفى غيرنه
خاله خلى الله بين عيونج
تجاوبنى بقوة وصلافه لج بابا من كل عقلج بعد ما سلمتى نفسج بالحرام اخذج لابنى اكيد عندج استعداد تسويهه ويه غيرة
بعد شحجى وياها..
مشيت لحكنى عادل سهورة
عاطت بي ولك وين عادل ارجع
معليج يوم عوفينى
صعدنه بالسيارة ودانى لاهلى
نزلنى براس الشارع مشيت كانما جاى امشي اميال مو جم متر
دخلت البيت وكعت بالارض اغمى على
اول شي ذاناتى بدت تسمع بس جسمى ما احس بي شويه حسيت رجلى تنمل بدت الحركه بجسمى اسمع وما اشوف شي
فتحت عيونى شفت امى تبجى وتلطم ولج يما خرعتينى عليج اشبيج يا يمه اسم الله عليج
ما اكدر احجى لسانى ثكيل بس اباوع شويه شويه بدت حركه جسمى كتلهه مابي شي يوم صديقتى انقهرت عليهه كلش تعبانه
رحت لغرفتى كظيت يومين نايمه لا اكل ولا شرب
حتى التلفون ما ارد عليه لان شفت عادل ضعيف امام امه ومابيدة حل لازم انى افكر بحل لمشكلتى
مرت كم شهر وكاتمه بكلبي ومحد حاسس بي ومالى خلك احد حتى عادل اهتزت مشاعرى اتجاهه بس هو يخابر ويحاول يجى بس انى ما اخلى لان رخصت نفسي شحصلت هو شكو عليه بس انى الى اكلتهه
للحكايه بقيه#