حقد الاخوان

الجزء 6

#قصة_حقد_الاخوان#
#جزء_6_
#للكاتبة_فردوس_عبداللطيف#
تخربطت امى ظليت الطم على روحى كلت راحت امى وانى السبب يمه كومة انى اموت ولا انتى يمه كعدى كله منى .. انعل ابو الحب الى بهذلنى وبهذل اهلى ونزل كرامتى صبينا عليهه ماى شويه تحركت شويه بدت تباوع وديناها للطبيب كال صار عدهه سكر
الله ينتقم منك ياعمى انت ومرتك الله يجازيكم
ابوى اجه ميعرف اى شي ماكلناله نخاف عليه لا ينجلط ويروح بيهه بدت امى لازم تبهرز اكلهه وتغير وظعهه سلمت امرنا لله صحيح مرات تلومنى ومن تشوفنى الطم وابجى تنقهر على تحظنى وتبجى بقينا على هالوضع ...
عادل انكطعت اخبارة لان اهله منعو ومهددى يطردو اذا اتصل بي..
بدت بطنى تكبر خيطتلى دشاديش عريضه تركت المدرسه وانحبست بالبيت حتى لا يشوفنى احد ومن يجى ابوى احاول اروح لغرفتى حتى لا ينتبه على بطنى دخلت الشهر الاخير كتلهه يمه انقبض كلبي من البيت خلى نروح لبغداد ونزور الكاظم بلكى تنفرج
خلى اشوف ابوج
اجه ابوى وكلتله وافق خطيه مايعرف شي
رحنا لبغداد وزرنا الامام بقيت كاعده وابجى واندعى
من طلعت حسيت فد حركه بطنى يمه وراسا الم بظهرى ولويات يمه الحكينى
اشبيج بنيتى يمه لويات
اسم الله عليج
ولج يمه ما اكدر امشي شوفيلي سيارة مستشفى
رحنا مشينا اخذنه تكسي لمستشفى الكاظميه...فحصتنى الدكتورة كالت ماما هاى عدهه ولادة بسرعه وديهه للصاله
يمه خايفه اذا متت سامحينى يمه والله مو قصدى اغلط يمه خلى ابوى هم يسامحنى ولج يمه الحكينى
وامى بس دموعه تصب سكته ولازمه ايديه
وصلنه للصاله كلولهه يوم هذا حدج بس البنيه تدخل
دخلت صاله الولادة اويلي يايمه هيجى تاذيتى من جبتينى واحنا ناكرين وياما عاندتج يمه هسه حسيت بوجعج يمه سامحينى ولك عادل وينك انعل ابو الحب
شسويت بي هاى تاليتى بالغربه اولد وطفل حرام الله يسامحك بقيت اطلك طول الليل...
لحد ما حسيت راح تطلع روحى واجه الطفل
صلوات بنيه حلوة مثلج الحمد لله على السلامه
انى اختنكت بجيت شحجى شكول
بقيت شويه يمهم جيكو وظعى ودونى للردهه وجابو الطفله
يمه بنيتى خلى اشوفهه واحظنهه
وامى بس تبجى
ولج يمه لا تتعلقين بيهه خلينى افكر اشلون نخلص منهه
يمه وين توديهه هاى بنتى دمى ولحمى
ولج شنكول لابوج غير يذبحج شنكول للعالم ولج سكتى
يمه فدوة خلينى اشمهه خليهه بحظنى هسه وبعدين
لا يمه اذا ابقيهه راح تتعلقين بيهه
ورة ساعتين اجت الدكتورة فحصتنى وكتبتلى علاج وخروج من المستشفى
طلعنه وين نروح والمصيبه ويانه
اخذنه تكسي ورحنا يم البيوت الى يم الامام اكو درابين مشينا والله توة الصبح اكو باب مفتوح دكت امى الباب
منو
انى حجيه
تفضلى عينى
بلكى ندخل يمكم نصلى احنا من البصرة
تفضلى عينى هلى بيكم وباهل البصرة
والله دخلنه شفنه نسوان 2
كالو احنا خوات وتزوجين اخوان ورياجيلنه يشتغلون بسوك الكاظم يبيعون قماش وتوهم طلعو
كامن سوولنه ريوك وجاى وغسلنه وصلت امى كلتلهه عندج اطفال
كالت انى عندى 2 بس خطيه اختى صارلهه 10 سنين ما عدهه اطفال
الله يرزقهه
راحن هنه للمطبخ
وامى كللتلى ولج ساهرة يالى خلى نطلع ونعوف بنتج عدهم
يا يمه اشلون بالله يكتلوهه لو يذبوهه
يالى ما كو وكت لا تجى المرة
للحكايه بقيه#