لهون انتهينا

عناد

دق الباب ووقف ينتظر بعصبية لحد ما فتحت ريما الباب وابتسمت: ورد ..تفضل تفضل..
دخل بدون ما يحكي شي.. قالت ريما : شو وين رين؟؟
ورد : مو معي... وين عمي ؟؟هو هون؟؟
ريما باستغراب من حالتو: اي هون.. تفضل..
دخل ورد.. وحمحم بادب.. وقال : مرحبا عمي..
وقف ابو رين وقرب منه وضمو : يااهلا وسهلا... ميت السلامة ليش ما خبرتني انك جاي كنا عملنا غدا مرتب.. ؟؟
ورد بدون ما يتطلع فيه: لا عمي معلش بعدين في موضوع حابب احكيه معك...
ابو رين : خير يا ابني شغلت بالي..؟
ورد : الله لا يشغلك بال.. ممكن تنادي خالتي..؟؟
ابو رين: اكيد.. ريما نادي امك...
راحت ريما ورجعت بعد شوي الام وسلمت عليه باستغراب...
ورد : عمي انا جاي لاحكي معك بموضوع بيخصني انا ورين.. ومتمني انك توقف معي.
الاب: خير؟؟
ورد : عمي رين مصرة انو نتطلق
الاب : اوف؟
ورد : اي والله من امبارح فتحت عيوني عم يندق الباب فتحت ولا رسالة من المحكمة.. قال رافعة دعوة طلاق علي..
الاب: رين هيك عاملة؟؟
ورد : اي والله يا عمي..
الاب : طيب والسبب؟؟
ورد بخجل : قال لانو هي ما بدا ياني اكمل حياتي بدون ولد.. وهي ما فيها تجبلي ياه..
ارتخى الاب بكرسيه وحط ايديه.. عل جبينو وقال : من شان هيك؟؟
ورد : اي..
الاب شبك اصابعو امامو.. : شوف بلنسبة للطريقة غلط كانت لازم تناقشك بموضوع الطلاق وبعدين تقرر ترفع دعوة او.. لا.. تانيا.. يا بني رين بنتي والابن اغلا شي عند الانسان.. بس انت كمان من لحظة اللي حبيت بنتي انت كمان صرت واحد من هل عيلة وولد من ولادي انت متلك متل علي ..وانا لو ابني مكانك انا كنت رح اطلب منو يتزوج لحتى يصير في عندو ولاد.
الام : شو عم تحكي محمد كيف يعني..؟ بدك ياه يتزوج عل بنتي عادي ؟؟.
الاب: مو هاد اللي عم بقصدو قصدي انو هو رجال بدو ولد يشيل اسمو... ورين اكيد عرفت هاد الشي واتخذت هل قرار... عرفت تتصرف..
الام بعصبية : يعني انت مبسوط لانو بنتك رح تتطلق.. ؟
الاب : مافي اب بيتمنى انو بشوف بنتو مطلقة... بس هون في خيار يا اما تضل معو وتحرق قلبو عل ولد وبلنهاية يلومها... يا اما تتخطى وجعة الراس وتبعد..
ورد : لا عمي انا مستحيل الومها انا.. بحبها انا.. يا ناس ليش ما عم تفهموني... ؟ كرمال الله وقفها قلها انو انا مستغني عن ولاد.. هي سمعت كم كلمة من عمتي من شان هيك ثارت علي..وبس كلما حدا بدون يحكي معها شي رح تعمل هيك؟.
حل صمت مطبق الدقايق.. بعدها قال ورد : عمي انا طلاق مو مطلق.. انا بس بدي ياكم تعرفو هاد الشي.. وتقولوها ياه انو انا رح حط ملاااين ضدها وما رح طلقها..وخلص.. انا بستاذن..
وطلع من لبيت وهو معصب عل هل وضع وزعلان.. بس داااخل دواخلو.. من جوا.. حاسس انو الطلاق هو الحل المناسب ليخلصو من المشاكل... فكر بهاد الموضوع امبارح.. كلام رين صح.. كمان هو مل من حكي الناس.. ومن تساؤلات امو.. ومن تلميحات عمتو.. ومزحات رفقاتو.. ضرب المقود وحط راسو عليه.. وراح عل البيت...
اما رين كانت مع المحامي عم تسالو كم شغلة ورن تلفونها اعتذرت من المحامي وطلعت من لمكتب: الو؟؟
الام: الو.. وينك انتي؟؟ تعالي عل بيتنا فورا وبدون اي اعتراضات؟؟
وسكرت لتلفون بوجهها.. تطلعت رين بلتلفون باستغراب ودخلت اعتذرت من المحامي وطلعت ركبت سيارتها و راحت عل بيت اهلها.. وهنيك دقت الباب فتحت اختها ريما وهي ساكتة ما عم يطلع منها حرف.. دخلت رين وقال : شو في؟؟
هزت راسها ريما بمعنى ادخلي.
دخلت رين واول ما شافت امها اللي ركضت لعندها ورفعت ايدها بقوة و ضربتها كف وقالت بقهر: بدك تتطلقي..؟؟ ليش الرجال شاريكي.؟؟ بدك تطلقيي. ؟؟
فتل راس رين من الكف عضت عل شفتها السفلية بالم ورجعت تطلعت بامها ببرود وقالت: اي بدي اتطلق..
صرخ ابوها: ميديا مو هيك لا تضربيها
ميديا : مو سمعان بنتك.. جنت رسمي.. قال بدها تطلق..
الاب: رين شو صاير ليش هيك... ؟؟
رين : هيك...
الاب : تناقشي معي متل الناس.. شو في.. ؟؟
رين وبلشو الدموع يتجمعو بعيونها.. : انو اتطلق احسن من انو اسمح لناس مو مستاهلين يدوسو كرامتي طول الوقت ويعيروني انو انا ما بجيب الولاد.. ومع انو ما دخلني.. متلي متلو.. هيك الله راد... الطلاق اهون بكتير من انو اتحمل لوم الناس بشي ما الي علاقة فيه.. واهون بكتير من نظرة اللهفة بعيونو لما بقلو بطني عم توجعني ويفكر اني حامل ولما يشرب يجي يقلي شو حلو لو عندنا ولاد.. واهون بكتير من انو يجي ويقلي انا بدي اتزوج لاني بدي ولاد او يقلي انا بدي اتطلق لانو بدي اتزوج... لا تلوموني طالما انتو مو عايشين للي عايشتو...
الام اللي دموعها نزلو من الحزن عل بنتها قربت منها وضمتها... وقالت: ويعلي عليكي ياعمري... لا تزعلي حالك..
تمسكت بتوب امها وبكيت بقوة امام ناظر اهلها ابوها واختها..
بعدت عنها وقال : انا بدي روح عندي شوية شغل بدي اطبخ وهيك...
الاب هز راسو بمعنى خدي راحتك... وقبل ما تطلع ناداها ابوها: وين رح تضلي بعد الطلاق..؟؟
رين: رح استاجر بيت..
الاب: ترا بيتك عم ينتظرك اذا ما بدك تستاجري.. غرفتك لساها مكانها..
ابتسمت وطلعت.. ركبت سيارتها وراحت للبيت.. ولما وصلت شافت جاكيتو عل كنبة عرفت انو هو هون.. دخلت عل غرفتها وسمعت صوت لحمام الداخلي عرفت انو جوا.. اخدت بيجاما.. وغيرت لبسها وطلعت شغل التي في وقعدت تتفرج..
لحد ما سمعت صوت باب غرفتهم عم يتسكر بس ما كلفت نفسها تطلع عليه او تحكي معو.. وحست فيه قرب لعندها.. وقعد عل نفس الكنبة وقريب منها كتيييير.. تطلعت فيه رين كان مو لابس كنزو.. وبس بلبنطلون.. رفع رجليها وحطها عل حضنو.. وقال : وين رحتي اليوم؟؟
رين بدون ما تطلع فيه: عند المحامي..
سند راسو عل الكنبة وصار يمسح عل رجليها: رين كرمال الله لا تجني.. ليكون بعلمك اما مستحيل اطلقك..
رين نزلت رجليها بعصبي : من شان هيك انا معينة احسن محامية بلبلد.. لانو راسك يابس وما بتفكر غير بحالك..
صرخ: هلق انا اذا كنت عم حاول حافظ عل عيلتنا بكون اناني.. ؟
رين ابتسمت بسخرية : اي عيلة.. اي عيلة عم تحكي عنها؟؟ العيلة بتكون مؤلفة من ام واب وولاد..
ودمعو عيونها: ونحن ام واب وولاد شي؟؟ لا ..فلا تدعي انو انت عم تنقذ اسرة ما انخلقت اصلا..
وقامت من عل كنبة.. وبعدت عنو...
مشي وراها وشدها من ايدها ولفها عليه وحط ايديه عل كتافها بحنية : بس يا رين انتي عيلتي... ما بيكفيكي هاد الشي.
قالت ببكا : ورد انا بيكفيني بس انك انت عم تتنفس وسعيد ولو بعيد عني بس الناس والكرةالارضية ما بيكفيها...
صرخ: الله يلعن كلشي..
رين صرخت: واولهم انا...
ودفشتو بقوة... وراحت عل غرفتها ونامت بعد فترة طويلة من البكا..
تاني يوم..
فاقت رين وتطلعت عل المراي... شافتو عم يظبط ربطة عنقو.. تطلع فيها من انعكاس المراي ورجع تطلع بحالو.. قالت: صباح الخير..
بس هو مارد..
فركت عيونها وقالت: اليوم بدك تجي عل المحكمة في كم ورقة رح توقعهم..
قال وهو عم يلبس الجاكيت: مو مطلق..
نفخت وقال : ما بقا نخلص من هل قصة بقا.. مليت انا...
ورد : رح نروح اليوم لعند اهلي استعدي رح امر عليك عل 5 تمام
قعدت ولفت رجل عل رجل : مو رايحة عل مكان...
قرب منها ورد عل السريع وباس خدها وقال : رح انتظرك..
وطلع من البيت.. نزلت ايديها بحزن وقامت عل حمام استحمت ولبست واستعدت.. لتروح معو فهي رغم كلشي صار معهم لامرة جرحتو..
بس مع هاد هي مصرة عل الطلاق لانو حست انو ورد بدو ولاد بس هو لطيف معها لدرجة انو ما بيعترف بهاد الموضوع ركبت سيارتها وراحت عند المحامي واخدت اورق اللي لازم يوقعهم... ورجعت عل البيت وقعدت عل الكنبة تنتظرو وهي عم تقضم اظافرها لحد ما اجا واخيرا.. وطلعو هن التنين.. وراحو عل بيت اهلو.. وكالعادة الكل مجتمع.. سلمت عل كل وقعدت جنب زوجها اللي كان واضح عليه لانزعاج...
جابت رويدة الشاي وصارو يحكو شوي عن لشغل وشوي عن الاكل.. وبينما النسوان عم يحكو اشر عم رين لورد انو يروح معو عل مكتبو الخاص..
وقام ورد تحت انظار رين.. اللي ابتسما بكبرياء
وكملت حكي مع النسوان..
ورد دخل ورا ابوه اللي قلو اقعد قدامي..
قعد ورد بدون ما يفتح تمو بحرف وقال الاب: احكيلي شو صاير بينك وبين مرتك ليكون مزعلها.
تنهد ورد ومسح وجهو بكفيه.. وقال : اخخخ من مرتي... رح تجنني.. بابا رين طالبة الطلاق... مو بس هيك رفعت الدعوة ضدي..