مدافن الألم

الجزء 03

امي وقفت وبقت تعاين لي انا يادوب خلصت العشاء ولسه الصحن قدامي .. قالت لي حرام عليك يافتحي .. مالك انت داير تكتلني ؟ انا القاها منك .. ولا من ابوك ؟.. حرام عليكم انا تعبت .. تعبت والله ..

هارب ماشي الدويم ؟ ومخليني لي منو؟ وانا عايشة اساسا" عشان منو؟ انت عايزني بعدك انتحر ؟

وقعدت في السرير المقابلني .. والساعة ماشة على 12 نص الليل .. اخدت نفس وهدأت شوية.. وعيونها حمر من البكا.. انا ماقادر اعاين ليها ..

عاينت لي عم الطاهر . وعاينت لي زوجته .. وقالت ليهم..

بس اقول ليكم .. ربنا يجزيكم خير .. وان اشاء الله ربنا مايبتليكم

وما يحرمكم من اولادكم .

قوم يافتحي قوم ارح .. انت لو ماشي الدويم انا زاتي بمشي معاك .. انت لو هارب انا ذاتي بهرب معاك .

ومسكتني من يدي وودعتهم ..ومسكت المراة باستها بي جاي وبيجاي .. والمراة دموعها في عيونها ..وتعاين لي امي بي كل شفقة ..

ولمن نحن طالعين,, المراة قالت لي. يافتحي خليك ولد شاطر. وماتحرق حشا امك .. انت ياولدي ماعارف يعني شنو الام .. ربنا يمرقنا من حقها ..

ولمن نحن طالعين من البيت بتاع ناس الطاهر .. امي قعدت تتكلم معاي .. وانا حسيت انو الطاهر كلمها بالسر .. السبب الخلاني انا اهرب .. امي قالت لي انت ليه مابتحكي لي يافتحي ؟

انا موش قاعد احكي ليك اي حاجة؟

قلت ليها ما قاعده تحكي لي وبتكذبي علي ..

قالت لي متين بكذب عليك ..؟؟

قلت ليها كل مرة ابوي يضربك .. انت مابتكلميني .. وبتكذبي علي.. تقولي لي ضربني الباب .. ولمن يجي يتشاكل معاك بتقولي لي خش جوة عشان ما اسمع ..

قالت لي بس والله يافتحي انا ماعايزاك تكره ابوك .. لانو معاملتو معاي بقت كعبة .. لكن هو من جواهو طيب .. بس الناس مؤثرين عليهو .. وبملو ليهو راسو مني ..

قلت ليها طيب.. هو موش عارفك انتي شنو؟ ليه يسمع كلام الناس؟ .. يعني الناس ديل اعز منك ؟؟

قالت لي ايوة طبعا" اعز مني .. اصبر انت لمن تكبر بتعرف اي حاجة ..

قلت ليها انا هسي كبير.. انتي شايفاني شافع يعني .. ؟؟

قالت لي ايوة انت كبير .. وراجل ونص .. بس انا ماعايزاك تكره ابوك.. والله ابوك زول كويس بس .. البسوي فيهو ده غصبا عنه .. انا عارفة ظروفو والحاصل عليهو ..

بس انا يافتحي هسي . عايزة اديك وصية.. اوعك تكلم ابوك تقول ليهو انك كنت عايز تهرب .. لانو بكتلك .. واوعك يعرف الحكاية دي ..

انا وصيت عم الطاهر مايتكلم .. عشان الكلام مايصل ابوك ..قلت ليها كويس ..

قالت لي انت عارف لو انا الصباح صحيت من النوم .. ولقيتك مافيش ح اعمل شنو؟