مدافن الألم

الجزء 07

طبعا ابوك .. عرف انو غلط .. غلط كبر انو يتزوجني .. لكن شايف كونو يرضخ للشروط دي ويطلقني .. كدا ح تكون.. عايدة واخوانها انتصروا عليهو.. وهزموهو .. حتى قدام اصحابو تاني ماعندو كلام يقولو ..

انا طبعا" لمن شفتو متحير .. قمت قلت ليهو انت وديني بيتنا .. وقول ليهم طلقتها .. انا اصلا بعد فترة بسيطة المفروض امشي عشان اوضع هناك .. لغاية ما انا اوضع .. بتكون الامور مشت تمام .. وح نرجع عادي .. وانت حاول فهم عايدة براحة .. وهي ح تقبل.. مافي مراة بترغب تخرب بيتها بي نفسها ..

قال لي خلاص مافي مشكلة .. بس هسي خليني اعمل ليهم عملية تأديبة ..

وصح في الفترة الاولى اصلا ابا يقول ليهم انا عايز اطلق دي ولا اطلق دي .. بس طبعا" زيو وزي اي اب.. بحب اولاده شديد ..

وعايز يمشي يسلم عليهم وخايف من ردة الفعل بتاعة الاهل ..

والناس بدت تتكلم .. وقالو المراة الجديدة .. طلقت عايدة وقعدت في بيتها .. وانا منظري بقى شين شديد..

طوالي قلت ليهو يلا يا الامين وديني البيت .. وتعال لي في اي وقت .. متى ما جيت مرحب بيك .. والبيت بيتك ..

غايتو بالاختصار رجعت بيتنا هنا.. وقعدت مع امي .. لغاية ماولدتك انت ..وكانت اسعد لحظات حياتي .. ماتتخيل الفرحة الفرحتها.. لمن ختوك لي قدامي.. وانا بعاين ليك وانت قطعة من قلبي .. كنت جميل وشعرك ده اسوااااد.. وكابي في جبهتك كدا زي شعر الهنود ..

ابوك بقى معاي مازي .. زمان يعني المحبة الكان بشوفها منو قبل الولادة.. بعد الولادة قلت كتير ..

وبقى يعدي عشرين يوم مايجي .. وانا مستغربة المفروض بعد جبت ليهو ولد .. يحبني اكتر .. لكن حصل العكس .. ماعارفة ليه .. طبعا انا مابضمن البتقال بي وراي من الحريم ديك شنو .. لاحظ.. لسع هو ما ملطلقني ..

المهم بعد عديت شهرين تلاتة كدا بعد الولادة ..

قال لي خلاص نرحل نمشي اسكنك في بحري بعيد منهم .. بس انا ماعايز المراة دي ولا اهلها يعرفو انك رجعتي .. قلت ليهو والله يا الامين دي حياة ماعندها طعم.. ولافيها راحة ولا سعادة .. يعني نحن نعيش حياتنا زي الحرامية.. كاننا عاملين لينا جريمة ..

قال لي معليش يا سامية .. محنة وتعدي ان شاء الله .. قلت ليهو طيب .. ما مشكلة .. انا ماعندي قدامي غير الصبر والرضا بالواقع.. خصوصا" بقى عندي منك جنى .. يعني انا لازم عشان ولدي اقبل باي تنازلات ..

لكن لو عايز راي انا .. خليني امشي اسكن في امدرمان .. لي سبين

اولا بكون بعيدة منهم .. ومابعرفو عني اي حاجة ..

الحاجة التانية .. بكون قريبة من خالتي حياة .. ومابحس باني متوحدة..

وافق على الموضوع ده .. ومشى اجر لي بيت في امدرمان قريب لي بيت حياة خالتي .. طبعا" حياة دي يا فتحي .اخت امي الاصغر منها طوالي .. وماعندها اولاد متزوجة وساكنة في ابروف .. تتذكر مشينا ليها في ابروف؟ . قلت ليها اي متذكرها واصلي ..