مدافن الألم

الجزء 05

اتخيل تلات سنوات ابوي مافكر يوم من الايام يجي يشوفني .. او يسأل مني .. حتى لي وفاة جدي برعي ماجا .. ولاحتي رسل مرسال عشان يعزي امي او يعزي صلاح ..

انا بقت تجيني افكار شيطانية .. ياربي احتمال ابوي ده يكون شاكي في نسبتي ليهو؟ يكون ماشايفني ولدو؟ لكن الغريبة انابشبه ابوي اكتر من امي .. صورة نسخة من ابوي .. مرات بنساهو.. واتذكره لمن لمن اشيل المراية.. من شدة الشبه البيني وبينو ..

امي بدت تتضايق من معاملة صلاح لي .. والتحريش البتعمل فيهو نسرين عمران .. وماقادرة تتكلم .. لانو صراحة المراة لمن تكون مطلقة وقاعدة في بيت اهلها .. بتحس بي عدم انتماء

وكانها غريبة .. خصوصا لمن تكون عندها اطفال بتحس انها عبء على اسرتها ..

مع انو امي عندها حق في البيت زيها وزي صلاح .. لكن مرات بتديني احساس انو صلاح متكرم عليها .. ومقعدها في بيتو.. خلي صلاح .. امي شايفة انو نسرين البيت حقها اكتر منها هي .. غايتو الحمد لله ..

انا امتحنت بي كل البلاوي والنفسيات دي .. والحمد لله جبت نتيجة كويسة شديد ..واول مابدت الاجازة نزلت شغل .

ومرت الايام في الفترة دي خالتي بدرية خطبها واحد من ام درمان .. وجونا في البيت واتكلمو طلبوها وحددو مواعيد المناسبة .. بس كانت امي خايفة وبدرية برضو .. ومتوجسين من الزواج ده .. اولا الفشل الحصل لي امي .. امي خايفة علي بدرية يحصل ليها نفس الحصل ..

وبدرية مقلقة ماعايزة تخلي امي وحبوبة براهم.. لانها شايفة انها مسؤلة منهم الاتنين ..

بدرية خالتي والله افضل من مية راجل .. غايتو عندها قلب حار .. ياسلام والله .. انا دايما بفتخر بيها ..

حبوبتي بقت تودي وتجيب وذاكرتها تعبانة .. واكتر الوقت هي برة الشبكة.. مع انها ماكبيرة شديد .. الدكتور قال عنها زهايمر مبكر .. مرات بتقول لي ياصلاح .. ومرات تصلي العشاء الساعة 12 ضهر .. كانو بقولو انو اثرت فيها وفاة جدي .. لانها مابكت عليهو نهائي ..

وبدرية زي ماحكيت .. هامة بي امي وشايفة انو المسؤليات عليها ح تكتر ودي حقيقة .

ومرت الايام .. والاجازة انتهت وانا قبلوني في مدرسة في الجيلي .. وبدرية اتزوجت وسكنت ام درمان .. وبقت بتجينا كل اسبوع ..

وخالي صلاح يطلع وبقى يشتغل ..بعمل شنو مابعرفو لكن بجيب مصاريفو .. وامي بقت قايمة علينا انا وحبوبتي ..

اها يازول باختصار في نص سنة اولى .. انا حسيت انو المدرسة دي مقابر لي طموحاتي .. وضعيفة .. الغياب في الاساتذة كتير .. اغلبيتهم مشو يشتغلو في المدارس الخاصة في الخرطوم .. والمدرسة مهملة اهمال شديد ..

وانا طبعا دخلت بي مجموع كبير .. وحاسي بانو موضعي مع المدرسة دي ح يكون موش ولابد ..

لكن طبعا ماعندي حل غير المواصلة .. بطلع الصباح بمشي المدرسة بالمواصلات.. وبجي راجع المساء بالمواصلات ودي طبعا ميزانية ماساهلة بالنسبة لينا نحن . الوضع مابستحمل ..