#بنت_الشيخ
Nada hs(ندى ح س)
بنت الشيخ
سلام..انه حليمة بت شيخ ابن شيخ لحد سابع ظهر ههه... عمري 25 سنة ..عيوز مو(عجوز)؟😣
گبل خمس سنوات شلنه من الريف للمدينه ... شفت الدنيه غير شكل..ناس حچيهه يختلف ولبسهم وحته اكلهم... اول ما شلنه للمدينه ابوي حرم علينه الطلعه..وين گبل اطلع بالبستان واتفسح براحتي...هسه محبوسه ومگابله التلفزيون...
عايلتي(عائلتي) همه امي چبيرة شويه بس بعدهي بحيلها وهي الامر الناهي علينه..ابوي الشيخ كل وكته گعدات وفصول.. اخوتي مجيد الچبير ماخذ وعده تلث فروخ(اطفال) اختي مجيدة هم ماخذه ابن عمي وعدها خمسه... اخوي حليم هم ماخذ وهذا مرته موتتنه يوميه حبلانه وجايبه حتى امي تسميهه چلبه مال فروخ ههه... نوب انه مماخذه واتحسر ع كلمة زلمة..اريدلي رجل وماكو.. لو محد يمشي (يخطب) عليه لو يجون بس ماتصير قسمة.. اختي الاصغر مني سميرة هم ماخذه(متزوجة) بس شني اخذت واحد من المدينه..
سميرة من يوم الي شلنه بي للمدينه مابطلت مدرسه وچانت بوكتهه صف رابع اعدادي.. چانت المدللة عد ابوي وماحرمهه من شي ولا بطلهه.. من تروح وتجي شافوهه بيت جيرانه وابنهم چلب بيهه.. كتل روحه عليهه شچم(شكم)مرة يلحگها وتجي تسولفلي وخايفه منه..مشه عليهه وابوي تسودن چي(لان) الزلمة غريب وشگد چانت سميرة عزيزه عده بس طاح بيهه وكتلهه كتله من هاي التمام وبطلهه اسبوع... الزلمة مابطل منهه وراح جاب شيخهم وسادة وشيوخ... ابوي كل مرة يجون جان يتسودن علينه انه وامي وسميره...
ظل الشك ماكل گلبه ومامصدگ بسميره يگول اكيد هي مطيته مجال وماكو هيچ واحد يچلب بوحدة اذا مارايدته...
اسبوع والثاني رائد الي يريد سميره صار يجينه هو واهله..
ابوي اخر شي رضه..كل عمامي گالوله اطيهه ولا تعطل قسمتهه والولد من عشيرة معروفه وماقاصرهم شي والاحسن من هذا بيتهه راح يصير گبالنه بنفس الشارع...
گامو يجونهه وكل يوم جايبيلهه شغله ومامصدگين شوكت ياخذونهه...ابوي كام يماطل وياهم بس حتى تظل سميرة يمنه .. لحد ماصار العرس واخذوهه..بيومهه ابوي ماطلع من ديوانيته.. الصبح من گعد حته ماتريگ...وطلع مااجه لليل يله.. جا مو شويه هاي سميرة عده روحه من الدنيا.. وهي سميره هم بيوم عرسهه سوت فلك بالبچي...
هاي سميرة اختي العله راسي(الي وراهه مباشرة) وراهه اخوي زيدان صغير وماماخذ ... هذوله احنه... كلهه اخذت بس انه ظليت ..كل التجي ع امي تحچي بيه(ليش ماخذت وشعجب محد يجيهه وخاف مسويلهه سحر)
كلهه صارت تحچي بيه..بت الشيخ ماخذت..بت الشيخ يمكن مو حلوة ومحد اخذهه.. وشكد حجي سمعت من بنات عمامي الي يجنه... وهو حظ مو اكثر... واله انه حلوة مابيه شي يتعيب..
عيوني عسليات وحاجبي مشمور وثخين اسود ع ابوي ولوني حنطيه وشويه طويله وشعري اسود مثل ابوي ... اكثر شي انه اشبه لابوي ومابيه شبه لامي هواي...
كام محد يدك بابي والناس صارت ادور الصغيرات بالعمر وخاصه عشيرتنه كلهن ياخذن بعمر طعشات اله انه...هذا حظي هسه النوب لو مخليني اكمل مدرسه جا شويه التهيت...
بس نجحت من سادس ابتدائي بطلوني ابوي واخوتي...
ومن ذاك اليوم لهذا اليوم انه محسرة ع الدراسه والطلعه ..
ابوي جي شيخ مايرضه نطلع..اله للطبيب اذا كلش وصلنه الموت يله..ملابس وشغلاتنه النريدهه امي تروح تجيبهن..
هاي انكتبت عليه اصير بت شيخ ومااطلع ومااتزوج...
كل يوم يمر اموت من القهر من اسمع فلانه انخطبت وفلانه راح تعرس... يبووووي بس انه ظليت..ماعايزني شي بس الزواج..
اريد فريخات اريد رجل اهتم بي ويهتم بيه اريد اسولف ويا اريد اطبخ ورجلي ياكل من ايدي..
حته محد ظل من گرابتي (اقاربي) ماماخذ..ولد عمي وولد عماتي وخوالي وخالاتي...كلهه اخذت.. انه ايست گلت اذا ماكو حته اذا ع شرچ(زوجة ثانيه) هم ارضه.. احسن من الماكو ههه..
خمس سنوات انه بالمدينه ومحد دگ بابنه عليه...
بهاي الخمس سنوات تغيرت حياتي..چنت گبل اگعد من غبشة
واخلص شغل البيت ومرات اطبخ...بس بالمدينه گمت اسهر وانام الصبح مااكعد من وكت...ومو بيوم وليلة هيج تعودت... لا ظليت شكثر يله.. وكله من الملل والضوجة...
نسوان اخوتي فليحة ومليحة خوات ..بنات عمي يصيرن... عايشات ويانه.. بس هوسه فروخهن كافي عليه تخليني افكر بالزواج... نوب شني ..العدهه شغل والتريد تنام وي رجلهه والتريد تروح طبيب تذب خلفتهه يمي... هو صح انه احبنهم بس هم يمللون ولا واحد ولااثنين..فليحة3 ومليحة6 ..
نوب حته امي تحچي ع مليحة ع الخلفه وهي ولاجنهه... كل تسع تشهر ونزلت وكالت عمه اظن انه حبله اخذيني للطبيبه...
ماتحلك تجيب منا وتحبل منا...
گبل اول ماخذوهن اخوتي اكيف اكعد وياهن نتونس ونسولف بس هسه من خلفتهن مانكدر نكعد اذا مايتعاركون لو واحد منهم يسويله شغله لو يتعور😠
مرة انه نايمه وچنت بيهه انخيل روحي متزوجة وزوجي يخبل من الجمال وعدي ولد وبنيه انه شايله بتي وهو شايل الولد ..غفيت ومااسمع بس..
سجاد:عمه عمه عمه عمه عمه!
-هاا شبيك وحمس!
سجاد:طاح حظج عمه ..
طكاله ضحكه وشرد...عاد انه كل شي ولانومتي احد يزعجني بيهه طفرت من مكاني واركض وراه مالحك بي... صعد الدرج واركض ورا وماكضته نزل وانه بعدني اصيح واغلط علي ولك ياجلب ياامطي اله اطيح حظك...ظل يعيب عليه من جوه وانه واكفه الدرج محروك كلبي منه... جان غرفة اخوي حليم قريبه من الدرج ومخلي شحاطته بلباب عاد هي شلون شحاطه من ذني الوزنهن كيلو ههه... واشيلهه بيدي وماباوعت علي بس اسمع صوته بعده يضحك عليه ويعيب واشمرها كل قوتي ومااسمع بس صوت ابوي (انه غلام ابوي راحت عيني) يمه انه متت..اباوع هذا ابوي طايح عگاله كاظ عينه...
مدري اشرد مدري انزل اشوف ابوي... شفت امي اجت ع صوت ابوي وتصيح ولكم ياهو هذا ولكم شسويتو...
نزلت انه لابوي وكلت اذبهه براس قاسم ابن حليم جان فوك واكول هوه شمرهه...
نزلت مسويه روحي مصدومه وخايفه واصيح ولكم ياهو الطك ابوي هههه... شلت ايد ابوي عن عينه واشوفهه من جوه صايره چبده(لون الكبد) انه اخترعت وميته من الخوف...
اخوتي التمو ع ابوي وحطيناله ثلج ظل امدد بالهول ع الكرويته.
حليم:ولكم ياهو شمر الشحاطه..
سجاد:بويه هاي عمتي هي شمرتهه..
مجيد:ولك لاتجذب لا اكص لسانك!
سجاد:والعباس هاي عمتي..انه شفتهه رادت اطكني وطاحت بيدي(جدي)
انه ظليت فاتحة عيوني بكبرهن وسكته...عاد الفروخ كلهه اعترفت عليه وكلهه طلعت شايفتني بس ابوي ماشاف ياهو الطگه... چنت بيهه گاعده يم رجلين ابوي وهو كاظ عينه...من سمع انه الشمرتهه اجتني دفره برجله..
ابو مجيد:گومي عمه بعينج ..طيح الله حظج.. شكبرج تصيرين وبعدج عگلج(عقلج) وي الفروخ...
ردت احچي وادافع ع روحي واكول هو العال بيه محد اطاني فنتگ(مجال) كلهه تولتني ررزايل وحجي معدل... شردت انه بغرفتي وسديتهه عليه... شگد جنت خايفه ع ابوي بس من تذكرت الموقف خربت من الضحك وانه اكول ابوي شلون راح يطب مضايف وهو عينه من جوه مزوركه وشراح يكول للناس هههه شيكول وشيحچي..
بس شني محد شبع مني..ردت امي عليه بالليل ورزلتني ونسوان اخوتي هم بس الملامة شلون طكيتي ابوج ولج وماخفتي انه عطت بيهن وگلت الهن التخلي فرخ من فروخهه يمي اسوي وصلتين ...هنه زعلن وراحن😂 وادري بيهن راح يطشن سالفه طگة ابوي يم اهلهن..
ثاني يوم ابوي ماطلع من البيت وانه هم ماطلعت من غرفتي اله اتأكد هو بغرفته يله ههه.. وشني مثل الحرامي اخذ اكل اليه وارجع لغرفتي.. لحد ثالث يوم من طكة ابوي انه غرفتي انترست مواعين وجدوره من الي اخذ بيهن اكل اليه... حتى الغرفة حمضت من ريحة الاكل الظال😂
رابع يوم طلع ابوي واخوتي هم...محد ظل بلبيت بس النسوان واخوي زيدان.. نزلت المواعين والجدورة وهم صار الحچي عليه بفلس من امي ...
امي:شنهاي ياخايسه! لازم حته مسويتهه بالغرفه! شبيج مكسره طلعي بالليل من ابوج نايم واغسليهن!
-يمه من الخوف هليام انام من وكت ومالحك انزل اغسلهن..
امي:روحي سبحي من وجعة! ونظفي غرفتج لازم جافت! اطب عليج النسوان وتعيرج ! صچيچة كون بعينچ..
انه ذبيت المواعين بالمطبخ وطبيت لغرفتي نظفتهه وهويتهه وطلع الي ملابس ورحت اسبح... ظليت بالساعه بالحمام .. جي امي كالت مو اقل من ساعه يله تنظفين .😕 عوزهه بس ماتجيبلي سيم مواعين اسبح بي...
كملت وطلعت من الحمام الفوك ومدري شجاني ونزلت... اجت عيني بعين ابوي ... ماحاجني ودنك..سلمت علي الله يساعدك مارد عليه... انه هم سحبت روحي ورديت لغرفتي...
عاد انه هم تحسست كلش وكلت اله ازعل واشوفهم يهتمون بيه يو لا... والله صدك عاد اجتني مليحة صاحتني ع الغده... طبعا ماناكل سوه وي اخوتي وابوي.. معزولين نسوان وحد وزلم وحد..
كملنه اكل وانه بسلت(جريت) روحي وشردت لغرفتي خاف احد يكلي غسلي مواعين...اي طكت روحي جا شني كله عليه خل يحسن بالخدمة الاخدمهه انه...
للعصر اجتنه مجيده... انه عرفت جيتهه مو خاليه.. نزلت اسلم كبل كبت بوجهي!
مجيده:ولج صخيمه! شلون طاكه ابوي بالشحاطه!
انه وكفت بمكاني وسكتت...
مجيده:يمن كون مرض بگلبج.. ولج يو انه منه اكص راسج .. خزيتي ابوي وين مايكعد يكلوله ياهو مزوركك!
انه مادري شجاني وحصرتني الضحكه وكوه كضيت روحي بس شني حلكي ابتسم مو بيدي بعد..
مجيده:شگد مريضه انتي..تضحكين؟ عليمن تضحكين؟ شوفي روحج ظليتي بايره محد ياخذج من سوالفج!
الحجايه حزت بگلبي حز..امي صاحت :كافي بسچن! تمالخن بعد فرد نوب ماتستحن!
انه خليت ورجعت لغرفتي .. شغلت تلفزيون وطلعت مسلسلي دموع الورد واشوف عمار كوسوفي وادك بجي.. مدري شجاني وكمت احاجي عمار بتلفزيون واكله خل تولي هاي نرمين ام الفلوس عافتك هل طايحة الحظ شني هل ادبسز هاي..
ظليت ادردم لحد ماانتبهت ع روحي وكلت بداخلي ..نعمه! صرتي تحچين وي روحچ..لا هاي نعمه !
ظلت مجيده لليل يله راحت..كل شوي اطلع اباب غرفتي اشوف واحد من جهال اخوتي اودي اكله شوف عمتك راحت يو لا.. لمن كالولي راحت يله نزلت...
تعشيت وذبيت فلك..جا غير ظاله بلايه غده من وره مجيّده!
نوب گعدت بالهول وحدي كله العرب نايمه بس انه .. رديت باحلامي الورديه اتصفن بزواج وبدله عرس واتخيل روحي حبلانه ورجلي يدلل بيه... لحد ما مليت من هاي الاحلام وصعدت لغرفتي نمت...
مرت ايام شطولهه ويمكن بالشهرين ابوي مايحاجيني ..الشيخ وزعل بعد... حتى اخوتي يحاجوني من وره خشمهم.. بس زيدان لا چي صغيرون مايهتم ويسولف وياي ومرات نذكر الشحاطه الطاحت ع ابوي الي لهسه ضامهه زيدان يمه ههه...
..
يتبع..
رجعت بقصة جديدة ياريت لو يكون التفاعل اكثر حتى تشجعوني اكملها 😑☹️
