#بنت_الشيخ
الجزء الثالث
Nada hs (ندى ح.س)
مرت الايام وانه مبتليه بنسوان اخوتي...نوب شني ياريت لو بس هنه.. وال9 الغضب مالتهن يمي...
وامي ماصدكت حته تكرب عليه.. وانه كيفت عود من صرت بالمدينه عبالي يخف الشغل عليه تالي طلعلي المگمعات فليحة ومليحه صفح...😒
كمت حته غرفتي اقفلهه..جا مليت.. يوميه خلفتهن كاعدين بغرفتي وعله فراشي وع تلفزيوني.. تلفزيوني هو روحي من الدنيه وانه گوه حصلته..حبيت (بوست) الادين والرجلين حته يجيبولي واحد... وكوه ابوي رضه وجابليا.. خربطولي قنوات التلفزيون وخربطو حته وكت نومتي.. همه شني بس خباثه يعني مو صدك يردوني لو ما يكدرون يدبرون شي بدوني.. بس هيج حته يغثوني😠 كمت يوميه اقفل غرفتي واخلي المفتاح بعبي...
خلصت منهم والغرفه تظل نظيفه.. امي كامت تحجي عليه ها شعدج تقفلين غرفتج وها شضامه بيهه لازم مسويتلج دكه وماتكولين... سولفتلهه وهم ماسكتت مني ظلت تصوب بيه...
حته اخوتي درو انه كمت اقفل غرفتي .. بيوم اجتنه مجيده وسميرة وجابن خلفتهن وياهن ياساعه المصخمه..
كعدنه نسولف ونضحك والفروخ دايره علينه ويلعبون ونوب سميرة حجت المفاجأة الضامتهه النه..طلعت هم حبله... يعني صارن 3 حبل ..فليحة ومليحة وسميرة.. انسردن يمكن... هسه بله اخوتي عرب ويكيفون ع خلفه ..بس انته رجل سميرة شمالك ذبيتلك 3 والرابع بالدرب...
صار العصر والبيت صار مثل مكة استغفر الله... والفروخ هي التفتر داير مداير.. اخوي راد ينام مالكه مكان .. بكل غرفه اثنين تلاثه.. وبالهول وبالساحات بكل مكان.. 17 فرخ وعدكم الحساب
اجاني كال..
مجيد:اطيني مفتاح غرفتج..
انه ظليت صافنه استحي اطلعه من عبي كدام اخوي..
مجيد:شبيج وين المفتاح اطينياه..وين مخليته؟
مااسمع بس الفروخ ع فرد عيطه(بديو.***.!! بديو.**.!!) وعله فرد ضحكه كلهم.. مجيد خزرهم... ونوب راح ورجع بيده صونده مال مجره(صرف صحي) وطاحلهم دكه مادكه...
يابويييييه فوخ گلبي من كتلهم.. حسيت روحي ردتلي ههههه.. فضحوني فضيحه الادبسزيه... عاد منهه توبت وكمت اخلي المفتاح فوك الكاونتر بالمطبخ...
بالعشه ماحجيلكم شصار.. ابوي عزم رجوله خواتي وطبعا ابن عمي رجل مجيده ماقصر جاب اخوته 3 وياه .. بس رجل سميرة انسان مثقف اجه بطرگ عمره...
طبخنه كونيه تمن اله شويه.. وجابو كباب من بره بالعشر كيلوات وخمس دجاجات شوي للزلم هذا ..وسويت بالصندوگ طماطه هذا للفروخ عود طماطه تگلاه.. والصمون زيدون خطيه من المغرب لليل يله اجه محمل تحمل علاليك.. حطينه العشه ومدري شبسرعه خلص وصارت مچافت بين الفروخ والنسوان .. كامت امي كالت تعاي وراي...
ردينه النوب سوينه علاكه بتيته وعلاكه بيذنجان وظلينه نكلي ومامحلكين... الزلم كملو والنسوان والفروخ بعدهم يحشون .. نوب رجعت الصواني مال زلم زايد اكل بيهه وصار فرهود ياچساب(كساب=الي يكسب اسرع)😂😂
مدري شلون كملنه وشبعو..انه بيومهه ظليت مااكلت من التعب وحسيت روحي اريد ازوع تكرمون.. والحمد لله ل9 بليل كلهه طشت لبيوتهه .. صرت ونيده(خرده) من التعب والركض..
ذبيت روحي ع فراشي ونمت.. حته ماسبحت.. بس شني ليل كله مانمت مرتاحه.. احس جسمي ملزك من العرك والدهن والتگلاه
اول ماكعدت الصبح سبحت ومشطت وانه اباوع ع روحي بالمرايه واكول شوكت هاي الضفيره يحلها زوجي.. والله مليت هي شني وين تاليتي...
طارت هل فكرة من بالي من سمعت صوت امي تصيحني.. وج حليمه لطيمه صخيمه! نزلت اركض ها يمه شكو..؟؟
امي:تعاي عاونيني(ساعديني) ابوج يمه خطار اليوم..
انه كلت بصوت ناصي:يمن ساعه السوده ماصدكت خلصنه من هوسه البارحه ردت علينه اليوم عزيمه اخره وياريت لو نكدر نجيب جاهز مثل البارحه والباقي نسوي بلبيت... لا عيني هل مره ابوي جايب اثنين طليان😩
كعدت وي امي وكطعنه اللحم ونكعنه التمن ..امي ركبت الطليان وانه التمن والشعريه عليه وفليحة سوت مرگ احمر مال بانيه ..
ردينه نوب انه ونسوان اخوتي نخبز.. بس شني كل الخبز صار عليه .. وهنه وحدتهن كاضه بطنهه وتفتر يمي.. تالي طردتهن وكملت وحدي معجانه شكبرها..
طحنه خلك لحد ما كضينه كل شي وغسلنه الخضره والفواكه.. نگلو(نقلو) الغده للزلم وفرغ المطبخ من الهوسه..
هذه ابوي يوم والاخر عازم.. ومو اي عزيمه لا كله مفطح وشلوخ ومايرضه يجيب طباخ اله اذا عزيمه كلش چبيره.. وله الطلي والطليين هاي مثل الزلاطه عدنه..
نسوان اخوتي بس صبينه صعدن.. كملو غده ورجعو الصواني والهوسه كلهه صارت عليه.. غسل وتنظيف .. الچايات ظلت ع امي...
ظليت انه اغسل مواعين وادردم عليهن وع الزلم الاكلو وراحو اكلتو سم كون وكون تزوعونه مر ولا طاح ابطنكم .. هههه اكثر شي يضوج المواعين وانه عود كلت اليوم كل شي مااسوي اكعد واسكت تالي طلعولي ذول صفح..
كملت للظهر الناس نامت انه يله كملت.. صعدت لغرفتي وكلت يمكن اذا احد صاحني اطگه ع فچه(الفك مال وجه) اطشر سنونه..
كعدت للغروب روحي طالعه وضايجة ومثل كل مره اذكر العرس وأيس من روحي واسكت بعدين..حته اللهفه الچنت متانيه بيهه العرس راحت..حته لو عرست بعد راح يصير بله طعم يمكن جي تأملت وحلمت هواي بهذه اليوم...
مرت ايام وانه ع نفس حالي..نوب حته نسوان اخوتي بعد محد راحت منهن للطبيبه واطلع وياهه... اجه ابالي اسوي روحي مريضه واخليهم ياخذوني للطبيب حته اطلع هههه...
بعدين خفت خاف انكشف وبطلت من هاي السالفه...
وبيوم انه كلش ضايجة وعصبيه .. نزلت من غرفتي لگيت الفروخ لاعبه طوبه بالبيت مامخلين لا ورق ما مشككين لا طحين ما تارسين بي الگاع لا مواعين مامطرشينهه ...
همه شافوني وولا نفر ظل... امهاتهم ماكو بغرفهن وامي رايحه لاختهه مريضه... عاد انه كمت بكل حركتي انظف واغلط ..
شلت الماسحه رگعتهه بالگاع:كون گطيعه التگطعكم!
طحت بالجدورة والمصافي المطلعينهه وادفرها برجلي:ظلن نايمات انتن وضيمجن ع راسي!
ماخليت باب مارگعته ..حته الماريد اطلع منه طبيت منه ورگعته.. نزلت فليحة وتباوع من وره خشمهه.. يااا شني هاي؟
-افروخج! دهرج انتي واختج الذبيتنه عليه!
فليحة:چا همه مو فروخ اخوج چا بس فروخنه!
-انعل ابهاتهم يابو ابهاتچن!
مدري شلون طلعت مني هاي الحچايه بس ثوله بعد.. عاد هي خزرتني وردت صعدت.. شويه ونزلت هيه واختهه لابسات عبيهن
-فليحة انه اسفه.. مدري شلون طلعت مني..
فليحة:انه؟ تسبين ابوي؟! خل اشوف عمي شراح يسوي من يدري ..
طلعن وخلفتهن وياهن وماوگفتهن گلت يطبهن حريشي شسويلهن خل ارتاح منهن...
كملت تنظيف براحتي والبيت صار هدوء اجاني زيدان يسأل سولفتله السالفه بس خوفني گال البدي(اختلي) بغرفتج گبل لا يجي ابوي ويعرف بعملتج.. ظليت انه ماهتيمت وماصعدت..
كلت والعشه ياهو يسوي .. بلشت اسوي العشه واشوف ابوي صاير نار طب عليه..
ابوي:شمسويه ولج؟ شحاچيه وي بنات عمچ؟!
-بويه خل احاچيك..
ابوي صاح كل صوته:اكلي خره! ادبسز ! انتي مال ادفنچ بيدي حته اخلص منچ! انه يخابرني اخوي يشتكي من بتي! وعليمن عله الجهال! شوفي لطيمه اذا مامشيتي عدل اكسر ضلوعج واخلي اخوتج ينعنعونج تنعنع!
انه ظليت واكفه ومن خوفي صبت دموعي... حته عفت العشه وصعدت غرفتي دك بچي... چا انه محد يحس بيه.. چا ليش مايصيحن ع فروخهن..
يومين وهنه ماردن.. اخوتي ماحاجوني.. امي بس تعارك بيه.. كلش طلعت روحي ..كل مااصفن واتذكر حالي اطگلي بچية..
ثالث يوم اجتني امي..
امي:كومي رايحين لبيت عمج..
-ليش؟
امي:ووجعه! وتسألين ليش؟ ترحين تحبين راس نسوان اخوتج حته يردن.. اخوتج حته تمرضو خلافهن!
-مااروح يمه..استحي من عمي..
امي:گومي لا اچسر(اكسر) ضلعوچ ! گومي يله گومي!
-كمت كمت ع كيفج!
لبست عباتي وشحاطي ورحت وي اخوتي وامي..
طبينه ومرت عمي عوزهه بس ماتكتلني.. كعدنه وياهسه يجن نسوان اخوتي ياهسه! ماكو! ظامات روحهن..
بعدين مرت عمي صاحتهن من وره خشمهه.. بس شني هذه كله وانه امي متوليتني بز بالحچي.. اجن الفايخات گمت الهن وحاببتهن(باوستهن) وتعذرت منهن.. مليحه شويه ارتخت بس فليحه نار وشرار صايره ... ظلن يسولفن امي ونسوان اخوتي ونسوان اخوتهن وياهن مجيده وانه بس مدنگه واباوع ع الحلوگ...محد يحاچيني..
رادو يعطلونه ع العشه بس مارضت امي..طلعنه وسيارتين يله كفت ..فروخهن سحگوني سحگ وانه ساكته خاف هم احچي وتصير مو خوش...
ردينه واخوتي اختفو بغرفهم وفروخهم ظلو جوه يم امي.. انه سويت العشه وكملته يله نزلن.. ابوي رحلته وتعذرت منه وگلتله انه بعد مااكررهه... هو سامحني ورضه عليه وكال عيب تسوين هيچ بأبوج انه دمعت عيوني وگتله بويه والله بعد ماسويهه..
هو گال دكافي لاتبچين شمسويه عشه.. انه مسحت دموعي وضحكت گتله خير من الله اصبلك؟ گال اي.. صبيتله ووديته بيد زيدان چي انه صارت هوسه يمي الفروخ كلهه تريد عشه...
نزلو اخوتي واحدهم مايلم حلگه من الفرحه ويحاچوني.. رادو اصبلهم عشه ويسولفون يردون يرحون للريف لمكانه گبل ويشوفون الحلال والزرع مالنه... انه كيفت كلت اروح وياهم .. بس تالي كالو ناخذ نسوانه والفروخ يظلون يمي... ياساعه السوده المصخمه... انه چن خنجر طب بخاصرتي من حچيهم.. چني مو اختهم ... سكتت وماحچيت... بس ثاني يوم امي سولفت لابوي وگالتله يردون يخلون خلفتهم يم المجيريده(المگروده)
عاد ابوي من فدوه لعگاله گال شني بكيفهم! خل ياخذون فروخهم وياهم...شني مو هيچ كالوهه حته فروخهم يذبونهم ع حليمه چا همه نسوه شني ساس(اساس) الزعله مال نسوانهم...
انه كيفت وگلت همزين خلصت...
حاچهم ابوي كالهم اخذو فروخكم وياكم حته يتونسون .. همه سكتو مايگدرون يعارضون ابوي.. ههه
وره يومين راحو سيارتين كلمن بسيارته حليم ومجيد... ظل البيت هدوء ونظيف... زيدان خطيه راد يروح وياهم بس ابوي عطله علمود مدرسته.. وهمه اخوتي يبطون(يتأخرون) غادي(هناك)
وخاف تخرب علي مدرسته..
ظليت انه مكيفه طبخ شويه تنظيف شويه النومه مرتاحه بيهه...
گلت بيني وبين روحي چا هسه لو ابوي يرضه يطلعون وحدهم ابيت واحنه نفتك(نخلص) ..انه سالفه الزواج بعد ايست كلش وگمت اعوض روحي بحنان من الاشوفه بالتلفزيون... والله لو تدري بيه امي وتشوف ذوله التركيين الصاكين چا هفت التلفزيون براسي هههه... بس شني همه دوه لعلتي من اشوفنهم انسه روحي واتونس احس روحي انه البطله بالمسلسل هههه..
يتبع..
