بنت الشيخ

الجزء العاشر

#بنت_الشيخ

الجزء العاشر

Nada hs
كملنه ورجعنه للسياره....اشوف كل حركة بياسر تطلع عصبيه.. فتحته للباب...السدة مال باب... حسراته الي كل شويه تطلع منه حته ماعاد عاين بوجهي ابد... ومن حركت السياره هو طول الوكت ساكت...انه ظليت الوب...واحس الصوج بيه... شايفين مرات واحد شكد مايطي يحس روحه مقصر... انه هيج حسيت.. گلت هذا مني ضايج ويتحسر... يمكن انه الدمرت ضحكته الطب بيهه اول يوم عليه بالخطبه... يمكن انه چنت حمل علي... هنا انه اكل بروحي اكل.... كلت لازم اتسبع واحاچي واسوي اليريده...
-حبيبي...؟! حته الحبيبي من تطلع مني احسهه مامتوالمه وياه ومااحچيهه عدل...من حچيتهه خفت لا يعيب عليه...
بس همزين... من سمعها مني التفت وجهه عليه... اشوفن ابتسامه بوجهه...وعيونه تباوعلي برضه...
ياسر:گولي حبيبتي؟ امري؟
-عساك سالم...بس شفتك ضايج... ان...اني ...هنا خفت تطلع مني انه..ويروح يقلد عليه...كوه لحكت روحي كلت اني... اني ماريدك تزعل مني... كل همي ارضيك.. بس اصبر عليه شوي
ياسر:اي... بس لتحچيلي كل شويه اصبر عليه واصبر! خليج بدون متحچيلي...
شو هذا من يحجي مد ايده عليه...صارت ايدي كلها بچف ايده
كلش خجلت ...بس بداخلي مااريدن اخسرنه... خليت ايدي بيده وماحركتهه... وظل طول الدرب هيج... لحد ماوصلنه لبيت سميره
نزلنه عادي وعلاليكي بيدي ونفس ذيج المره ... راحت وياي سميره لبيت اهلي...طبينه سوه... همزين اخوتي ماشفتهم ... بس نسوانهم موجودات...
انه دنگت حته لايركزن بوجهي حيل ويشوفن المكياج...طرت لغرفتي كبل... شويه ولحكتني سميره... شافت شجايبين وشمشترين...هم ظلت تسولف وتحمد بياسر وذوقه انه هلمره سايرتهه وحجيت وياهه...چي احس ياسر راضي عليه واحس الدنيه صارت حلوه...والاحله هلمره ماقلد عليه ولارجعنه متزاعلين لو ضايجين واحد من الاخر....
ردت سميره لبيتهه ..انه وره ساعات طبيت سبحت واحس براحه...كل شي اسوي احس براحه...احس امشي ع طولي مرتاحه...
كعدت بغرفتي امشط واذكر ياسر وبوحيدي اضحك بدون مااحس ع روحي... شويه وسمعت صوت هزاز التلفون... فتحت خط وبذاك الصوت الحلو سمعت ...
ياسر:يابعد روحي وكل دنيتي...ولچ احبچ احبچ احبچ!
وشني يحچيها بصوت عالي...
-اشش لحد يسمعك...اني هم احبنك..
ياسر:اششش...خل كل الناس تسمع...احبچ اموت عليچ... راح اخذج غصبا ع الكل... انتي حبيبتي وروحي من الدنيا...
طرت فوك الريح وانه اسمع هذا الحجي... يبووو انه كل هاي السنين احس چنت ماعايشه.. هسه عشت...
ظل يحچيلي حبيات وانه اسمع وساكته...بس لساني الساكت.. گلبي وعضاي كلها تصيح اريدك اريدك...
شويه وگام يضحك ..مو ضحك عادي...لالا بصوت عالي وچن گاعد بشارع او هيچ شي...انه هم ماسألته...نسيت من حچيه الحلو وياي... وره هاي الضحكه سد التلفون...
انه بيها متت علي زايد...تمنيت العرس يگرب... احس الايام من تمشي تاخذ من عمري وانه بعيده عنه... ومااسمع حچاياته الحلوات ولااشبع دلال منه...
الليل كله مانمته... كل كلمه كالهه اذكرهه... الفرحه الصارت بيه يمكن ماماره بيها من گبل... حسيت انه موبس للخدمه والشغل ولا بس مهانه للفروخ والنسوان...حسيت انه موجوده.. الي من يحبني ويقدرني.. نسيت كل حچيه كبل وتصنيفه عليه...
ماهمني...گلت هذا حبي بعد... وبده يتغير وينصلح...
ماكو زلمه مايصعبهه ع مرته اول بدايه... هيج جنت اسمع... وصدگت وصارت وياي انه وياسر...
گعدت ثاني يوم كلش متأخره من سهر البارحه... لگيت المطبخ هوسه وجدوره كبار ومجيده جايتنه... مو شي غريب.. لا عادات ابوي...عده عزيمه..
هم تريگت ع السريع وعاونتهن...اشتغل وبالي يم ياسر... لااكدر اجيب التلفون اخلي يمي اصيرن فضيحة اذا شافو عدي ولااكدر اعوفنهن واصعد اشوف التلفون خاف داك عليه...
مجيده:ولج هذا يويسر شمسوي بحالج؟ شو تعبان وجهج وسمعت تطلعون تشترون!
انه خفت كلت اي اكيد واحد من عيالهه شافني ويا... بس من ردت كالت :چا حته سميره زاعتهه ولااستحت منه؟ ولجن والله كون احيل ابوي عليجن واخلي ينعنعجن تنعنع! ارتاحيت وعرفت هي ماتدري..
-لا هنه مرتين..كملت مسواكي بعد..
مجيده:اي؟ وشوكت عز الله ياخذج؟ شو اشوفنه حيل طول!
امي:دبسچن! ياول حظ! هسه وكتجن كملن الغده وبعدين سولفن!
حسيت امي رادت تسكت مجيده.. وهي صدك مجيده كل حچيهه دبز ومغثه...مثل المجروح وتجيب ملح تخلي ع جرحه...
شوي التهينه بشغل...ردت مجيده صفت وي امي وتبسبس تخاف يسمعنهه فلحة وملحة..
مجيده:يمه انتم شني سالفتكم! شو ساكتين من هذا داهر ياسر حته عيالي غاد ينشدوني واحسنهم يعيروني... اختج ماخذت اختج شلونهه وي الغريب..
امي جانت تخوط بالجدر.. من سمعت مجيده ركعت قبق الجدر حيل وكالت:وانه شمدريني! ذيج سمره روحي نشديهه! مو هي الجابتهم! شصار كلهه ع راسي!
حته نسوان اخوتي التفتن ع صوت امي..
فلحة:اكلج عمه...صدك انه هم ردت انشدنج.. همه شوكت يعرسون ..صارلهم بالشهرين من عقدو؟!
امي:وليييييييه! انه شمدريني!  امي انفعلت وكامت تأشر بديهه ع باب المطبخ وتصيح:روحن ! روحن انشدنهم! يله روحن!
ملحه:يااا عمه ع كيفج.. چا غير نستحي من الوادم تاكل وجوهنه كل ساع واحد ناشدنه عليهه...غير صارلهه طگ... غريب ومانعرفه شني.. وطالع وشايف وعايف..
مجيده:يمه..ودي ام رائد عليهم.. خل تحاچيهم .. شني ماصايره هيچ؟
امي سكتت بعد وماردت ع احد...چنهه ماتسمع...
انه انهزيت هز من حچيهن..هنه صدك صارن شهرين.. بس مااحسهن هواي..كضيناهه مشاكل وطلايب..والبارحه يله بديت افتهم منه شي.. بس هاي احنه لازم خطبه وعرس اسبوع واحد
كملنه الغده وصبينه للزلم وتغدو وراحو... انه ردت اصعد غرفتي واغلس ع التنظيف حته اشوفن التلفون... بس منين اخلص.. من امي لو مجيده لو نسوان اخوتي...
ظليت انظف واكرف البيت كله.. نوب اجه ابوي كعد وجيب جايات وودي مايات..
امي:خويه ياهو الضافك اليوم؟
ابوي ابتسم:هذا عناد.. انه خابرته..نشدته ع عمه وگال بعدهم.. استحيت منه النوب عزمته.. كوه اجه مارضه..حلفته بروح ابو يله اجه..
اسمع اسم عناد انجاب.. گبل اجت صوره ذاك الشفته بالحديقه ابالي.. وخفت..مدري شجاني.. بعدين ظليت كاعده يمهم وابوي يسولف عليهم..انه غلست كلت شعليه.. كل همي اشوفن ياسر اريد اسمع منه حچي مثل البارحه..اريد اسلوبه مال البارحه مو الحچي والنغز!!
امي:من دهر الفره عمهم! شني من بشر هذا.. والله ولد اجاويد هذا عناد وهاكثر مطول خلك وياه..
ابوي:انه اقترحت علي..يشوفله وحده من بنات عمه ويتزوجهن.. بلكت تفض طلابتهم ويتراضون بالنسابه..
امي:ياا چا هو غير ماخذ! خطيه مريته..ع بختك خويه لا تشجعه اطيح برگبتك مريته!
ابوي كال بضحك وهز ايده:اهووو يامره! كولي الله يرحمهه.. جا مو ذاك اليوم گتلج چنت بفاتحتهم!
امي:ياخوي يابن امي! يمه ويلاه! شموتهه! شو اظني مااسمعتك!
ابوي:بيهه ذاك المرض..خطيه تعب وياهه..ماظل دكتور ماوداهه اله..
امي بحيره:يا يا...الله يرحمهه...انه لو اعرفهم واندل بيتهم چا رحت الهم..
طبت مجيده وبيدهه ماعون تفاح وتفاحه بيدهه تكرط بيها..
مجيده:شني يمه وين تردين ترحين؟
امي:خطيه مرية عناد ..هذا صاحب ابوج..ميته..
مجيده دنگت ونصت حسهه:عبالي ع اهل ياسر!
ابوي:شني؟ ياسر؟ شبي؟
انه وجهي صار نار..دنگت ورجليه مااطاوعني اكومن..
مجيده متردده:بويه.. چا هي سوايتهم سوايه! شني لهسه هيچ ظالين ! ترضاهه بويه.. انه بيت عمي الطاب والطالع يسألني احيرن شگول!
ابوي دنك وسكت ..شوي وكال:خلي..انه ماعاجبني .. لا هو ولا هذا رويد ! خل اشوفن شني تاليهه وياه..
امي ذبت حسره..
مجيده:بويه اكربهم ..بلكت يحسون..
ابوي سكت ماحچه بعد... تغيرت السالفه وحچو بالفروخ وبيت عمي عيال مجيده وهواي سوالف... انه سحبت روحي للمطبخ وفلتت النوب لغريفتي...
گبل رحت للتلفون..كلشي مالكيت..لا مكالمه ولا رساله..
ظل بالي مشغول ..وانه منا اريد اعود روحي اصيرن جريئه مثل مايكول.. دكيت علي..طاح بيهه ورفضهه.. وره شويه رد خابرني
طبيت بالكنتور خاف احد يسمع صوتي ..
-الو..
ياسر:ها احلام..شلونچ؟
-زينه.. وانته شلونك.. ظل بالي عليك..
ياسر يحچي بتعب:اوف احلام..كلش تعبان وراسي يريد يطگ
-اسم الله عليك..بعد روحي شبيك؟
ياسر:مابيه شي..عادي ..هسه اخذ حبايه براسيتول وانام..
-انته بالدوام؟
ياسر:لا حبي ..اليوم مرحت..مكدرت اروح..
-خوفتني.. روح للطبيب!
ياسر:لالا ميحتاج..بس ارتاح اصير احسن..
-ديله نام وارتاح..وراح ادعيلك اطيب..
ياسر:يله مع السلامه..
-الله وياك..
سد التلفون وانه مامرتاحه كلش..ظليت احوس..اروح منا وارد منا.. شكد خفت علي..هواي افكار مزينه اجت ابالي.. ها خاف مريض..خاف بي شي وماكالي..خاف احد طاكه ع راسه..
متت من التفكير واستحيت اخابر سميره وتكول لرجلهه نوب شيكول عليه..يكول مفلفله لو مامصدكه بي لو ادور ورا!
ظليت ساكته احسن.. لليل اتاني يدك ماكو.. نمت وهو مادك عليه ولادره بحالي شصار بيه من وراه... حته عشه ماتعشيت..
ثاني يوم الصبح كعدت وهم كبل رحت للتلفون.. كلشي مالكيت
دكيت علي كبل لاانزل جوه واشتغل ويروح الوكت وانه مااعرف اخباره..
ياسر:ها حياتي..
-شلون صرت..بالي يمك..ميته من الخوف عليك!
ياسر:هههههههههههه مابيه شي ! شبيج انتي؟
-الحمد لله..شريد غير سلامتك..
ياسر:الله يسلمج..محتاجه شي؟'
-لالا..
ياسر:يله حبي..اني عندي هوايه شغل هسه.. بعدين اخابرج..
-اخذ راحتك ..الله وياك..
شويه هديت من سمعت حسه ويضحك وهو نفسه ياسر الاعرفه.. مو حسه مال ذاك اليوم الرايح چن صوت واحد ميته اله احد..
نزلت تريكت واحس الي واهس بكل شي.. نظفت البيت كله..
من كملت كعدت بالمطبخ ..هيج لاشغل ولاعمل ماعدي شي..
مااسمع بس صوت اخخخ! حس واحد من الولد..
رحت واشوفن حليم امدد شطوله يم الدرج ورجل هنا ورجل هناك
هههههههه انه صدك اول شي خفت علي بس من شفته هيج خربت من الضحك ضحكت من كل وكلبي وانه الي مده ماضاحكه هههه... زلمه وامدد شطوله وزالك وطايح هههه
نوب ظل يغلط علينه وماكو حچايه ماحچاهه...
انه نسيت روحي انه النظفت وهذا الماي الظال انه نسيته.. هو عدنه شويه طسه يم الدرج.. هاي ماتنشف زين اله نرد عليهه بوصله... وحليم صار ضحيه هل مره ههههه..
حليم:ومرض المرضج! تضحكين مو ؟ كون افلش راسج هسه!
شويه وطب مجيد.. شافهه هوسه وعالكه.. سأل مرته ومرته سولفتله... نوب همزين مجيد صار وياي وخرب من الضحك ع حليم.. ظل يصنف علي..
مجيد:ها ولك زغيرون..ماتشوف ههه هو مو انته الطحت.. الماي طيحك..هههههه
حليم:دكافي ! هي مال شقه! ظهري چا انكسر!
مجيد:يابويه..كون شايفك زيدون غير اله يحط صورتك وانته امدد بالجرايد.. ولج حلومه جا ماخابرتيني اجي اشوفنه شلون امدد هههههه..
صار التصنيف ع حيلم بفلس بيومهه... صدك ضحكت وحسيت روحي چنت مثل المحرومه من الضحكه... اخوتي وابوي وامي ونسوان اخوتي وحته الفروخ الجنت اضوج منهم حبيت لمتهم وضحكتهم وونستهم... صرت كلش اتحسس.. اكولن شلون راح اعوفنهم..شيصبرني ع فراكهم... انه الچنت اتمنه اعرس اليوم كبل باجر ..من صارت صدك خفت ..
خفت اعوفن بيت اهلي واتغرب من هاي اللمه الحلوه... الوياهم اخذ راحتي بكل شي..امون ع كل واحد بيهم..مااخجل من اوصي ع مسواك ولا اخذ حذر من حچايه تطلع مني ولا اخاف تنفهم مني حچايه بغير قصد...حته فلحة وملحة..اعترف چنت من اضوجن اطلع حرگتي بيهن.. وهنه مرات يحملني ومرات لا يسونها هوسه عليه ههههه..
دشاديش ابوي وكويهن...العطر الاحطنه الهن من اعلكهن... عگال الاشوفه من باب الحوش كبل لايطب.. ريحه امي الكلهه گرنفل وسعد...ملابسهه وشيلتهه المرات هيچ يعجبني البسهه بس حته اشم ريحتهه... زيدون.. زيدون واكلاته وكل مايعجبه يتشهه يتومر عليه... كل هذا راح اشتاگله.. وهواي بعد..هواي ماذكرته اخوتي حليم ومجيد...سوالفهم الحلوه.. لمتهم.. حسيت چني راح اموت مو راح اتزوج.. حسيت انه چنت ظالمتهم واسمي المكدره ووضايجه منهم ..حسيت قصرت وماعشت حياتي وياهم صح..بس هسه فات الوكت وتندمت ..راح يجي اليوم اعوفنهم واروحن...

يتبع...