#بنت_الشيخ
الجزء الثالث عشر
Nada hs
مرت الايام والشهر.. وانه ع نفس حالي.. لا خاطب دك بابي ولا طالعه من البيت..ولا صار شي جديد عدنه..
بس العزايم مال ابوي وهوسه الفروخ وامي هم ردت ع نفس عصبيتهه الاوليه واخوتي بلشغل لو يرحون وي ابوي بكعدات..
مجيده هم طلعت حبله.. وكامت ماهاكد تجينه تستحي من بطنهه.. چي هي چبيره شوي وابنهه صار حگ زواج وحته بتهه غاده هم اجوهه خطابه وچنهم يردون يطونهه..
انه بهاي المده مافكرت بعرس ورجل ..بس بعدني ملچومه ومجروحه.. مانسيت ذيچ الايام.. صرت حته احلم بياسر.. مو محبة بي.. بس ذيچ الايام بيهه شي يميزهه.. شي يخليني مااكدر انساهه.. شي يخليني احن لذيچ الايام صرت اظلن گاعده ع نفس الوكت الچان يخابرني بي.. كمت احاچي روحي بحچياياته الحلوات.. حبيبتي ويگلبي وروحي...
بلكت روحي تقنع وتهده ..بلكت دمعتي تنشف..
بس مثل العطشان وشاف سراب..
حته اهلي بهاي المده.. ردو مثل كبل ..لا تشاقو ولاضحكو .. كلمن لاهي بروحه وشغله.. حته امي بس شافت خلگي زين عافتني وراحت منهه مظره المحنه والطيب وردت عصبيهه وعيونهه تجدح وحواجبهه مطبوكه..
ويوم بليل كاعدين يم ابوي..انه ونسوان اخوتي وامي.. دك تلفون ابوي..
طلع التلفون من جيبه وظل صافن علي ويعصر بعيونه حته يشوف ياهو المتصل..
ابوي:الو.. ياهله ..ياهله وچثير الهله.. الله يسلمك..كلنه بخير.. هاا؟ بيهه الخير بيهه الخير... ماشاء الله ماشاء الله..
هله بويه ..شلونچ..الحمد لله انه زين..ع خير عليكم.. اي هاي ..
ناوش التلفون لامي..
امي كضت التلفون وماانتبهنه عليهه..
امي:الووو! خايب الووو! خايب ياهو هذ.. ماتحچي؟ يااا اظنه انگطع!
ابوي:شو دجيبي شني انگطع غير هل اسمع حسهم!
اخذ ابوي التلفون من امي وطلعت كاضته مكلوبي ههههه... السماعه يم حلكهه والحاكيه يم اذنهه... انه فطست مدنكه ودموعي صبت من الضحك.. عود ماابين ع روحي اضحك بس شني كل جسمي يرعش ويهتز هههه..
رد ابوي اطه التلفون لامي..
ابوي:كاضته مكلوبي! ولحظ!
امي اخذت التلفون من ابوي وخزرته.. هي ماترضه يكولون ماتعرف .. تحب تعرف لكل شي..
ظلت امي تخابر بعد ماسمعوهه الجيران كلهم ويمكن حته مجيده ابيتهه سمعت امي ...
امي:باچر اروحن يم مجيده.. غويده راح تعرس عاينت علي وردت كالت:وانتي هم اخذج وياي..
ابوي:اوديچن هسه؟
امي:لا شني .. الصبح من غبشه نمشيلهم...
انه كمت منهم ورحت لغريفتي..حسره خنگتني.. مو غيره.. بس كسره وخوف من حچي الوادم..وخايفه من نشد الناس عليه.. ليش ماخذت؟
هذا السؤال المن شبيت لليوم اسمعنه.. بس بفتره محد كام ينشد وبعينهم صرت بايره .. وهسه اكيد لگو سالفه جديده بيه.. الخطبه وياسر وحظي المصخم..شلون راح اواجه وشرد ع اليسمع حچي؟!
ظليت اهمن بهاي السالفه لحد مانمت..
كعدت الصبح ع صوت امي.. عاينت اشوف بس وجهه طالع وكله سواد.. العصابه والجواريب وحته عباتهه لابستهه.. انه من شفتهه هيج اخترعت ونسيت حته عدنه عرس ههههه هو اليشوف هيج شوفه من الصبح ينسه روحه مو بس ينسه عدهم عرس..
امي:خايبه كومي! دبسچ ماشبعتي نوم! نوم مال مطايه !
-اي يمه كعدت كعدت.. بس اطيني فنتگ(مجال) اخذ نفس .. والله انكطع الهوه من شفتج هيج..
امي:يله.. ورانه هواي شغل اهتمي!(استعجلي) سويتلج ريوك كومي يله..
نزلت امي وانه امشي وراهه.. كل بايه من الدرج تظل خمس دقايق يله تنزل وتظل تحجي عليه انه شصعدني وانتي ماكعدتي وبطينه...
هي لو لاكيه احد چا ماصعدت وودته يكعدني.. بس الله وكيلكم بسته اله ربع محد كاعد..لكيت ابوي متريك ونوب كعدت تريكت بسرعه بسرعه خاف امي تصيح عليه..
كملنه ولبست عباتي ونزلت حته نمشي... من طلعنه ابوي كاعد بلحديقه.. سلمنه علي وردنه نطلع صاح..
ابوي:كربوله!
امي:ها خويه؟!
ابوي:روحي اخذي بعد فلوس.. خاف مايكفن.. ولاتنسين حليمه حالهه من حال غاده.. شتريد اشتريلهه...
امي لفت عباتهه وردت جوه تجيب فلوس.. انه عاينت ع ابوي وخجلت..
خجلت چي ظليت برگبته لهذا الوكت وظل شايل همي ويفكر بيه...
ردت امي ورحنه لبيت مجيده.. ماصارلهه اشهر من شالت بي بعد ماچانت وي بيت عمي بالبيت الچبير...هو مو بعيد كلش.. بس يجوز انتم عدكم بعيد واله ترحون بسياره هههه...
لكينه مجيده وفروخهه يتريكون.. بس العروس ماكو.. كعدنه بلساعه كامله وهي ماكو ضامه روحهه..رحت طبيت عليهه للغرفه..
لكيته مدنگه وكاعده ع چربايتهه ووجهه احمر..
-ولج غويده؟ ماسلمين ع خالتج!
هي كامت سلمت عليه وحاببتني..
ظليت اسأل بيهه شلونهه مالونهه... حسيتهه ما هلگد راضيه بهذا العرس..
-شو چنچ ماراضيه ولچ؟
غاده:خاله اريد اكمل مدرستي...
-يا خاله واذا كملتي مدرستج؟ مردچ لبيت رجلج.. تستقرين وتخلفين .. تشوفين رجلج يفتر يمج وفروخج دايره حواليج...چا تردين تظلين مثلي؟
غاده:لا..
-چا بعد شني؟ ذيچ خالتج سميره.. هم اخذت وعافت مدرستهه وذيچ اياهه مدللة يم رجلهه وفروخهه تارسين حظنهه.. ووليد عمج خوش وليد وتعرفينه ومنكم وبيكم...
سكتت غادة وچنهه اقتنعت.. تولمنه للسوك.. ورحنه انه وامي ومجيده وغاده. ردنه هي تختار ع ذوقهه.. هي مدللة وطابه وطالعه وشايفه البنات شتلبس...
ظلينه نتسوك لحد ماكال الله بس.. هلكنه هلاك من كثر العلاليك.. انه مارضيت اشتري لروحي شي.. هذا اليوم لغاده ومايصير احشر روحي انه.. اهم شي هيه...
كملنه نص الغراض والباقي كالت مجيده هي تروح باجر تكملهن.. تغدينه وگيلنه(قيلوله) يم بيت مجيده.. عزلنه مسواك غاده انه واخياتهه... وكل ما اطلع شي وكالت خاله اخذي الج.. خطيه فطيره بس توزع وانه ماارضه عليه هيج..
للعصر ردينه انه وامي.. نظفنه وسوينه العشه وخلص الوكت بسرعه.. رحت لغريفتي وذبيت روحي بعد مادريت من التعب.. نمت نوم ماصاير ..
كعدت بلخمسه ونص نشطه وشبعانه نوم.. نزلت سويت ريوك وتريكنه انه وامي نوب اجه ابوي هم ريكته... ظلينه نسولف انه وامي بغاده ونهم بيهه خطيه.. ام رجلهه شوي وكحه.. وهي فطيره ..ابوي بدل وكشخ كال مسير ومعزوم.. وصانه كبل لايروح نمر لمجيده ونعاونهه...
كملنه شغلنه ابيتنه وركبت امي الغده وكملن نسوان اخوتي باقي الشغل ورحنه... عاوناهه رتبنه بيتهه وحطت بردات جدد وعدلو النزله اليم باب الحوش مالهم ونظفنه البيت من فوك لجوه...
ماظل للعرس غير بس يومين.. ع اساس ماكو حنه للعروس اول شي.. بعدين انه حسيت بيهه ضايجه .. من نشدتهه كيفت وكالت اريدن صديقاتي يجني... هي تستحي وتخاف ماتكول لامهه.. عدنه العروس تسكت وماتطلب ولا تشرط... انه رحت لامهه وقنعتهه بس ماكلت هي تريد..
عاد بدينه نحضر للحنه.. ودينه ع كيك وشربت وجكليت وشمع وحنه...
وراحن لمحل البدلات مجيده وامي وغاده اختارت بدلة الحنه... انه ماكدرت اروحن وياهم.. من شفت غاده بالبدله دمعت عيوني..
حسيت البدله هي مرضتني وهي العقدتني... ايام وشهور وسنين احلم البسهه وافكر شوكت والمن...
هواي چنت اشوفن البدله بخيالي.. لو من نروح للسوك ونمر من محلات البدلات.. تنكسر رگبتي عليهن لحد ما نعبرهن..
سوينه الحنه واجن نسوان بيت عمي وجارات مجيده وصديقات غاده.. بس شني ماقصرن صديقاتهه.. الرگص والهلاهل والشعر والجمال العليهن..
النسوان تعجبن بغاده.. طلعت تشبه سميره واحله بعد.. عيونهه وساع وشهل وبيضه ورديه والبدله مصبوبه صبابه عليهه...
رادني اركص.. بس ماركصت.. استحيت احط العين عليه وارجع اصيرن علج بحلوك النسوان لو اسمع حجايه تغثني .. ظليت متكتره(مبتعده) ع صفحهه واعاين.. ومرات اصفك ..
كضت الحفله وطشت النسوان.. ظلينه نلملم وانظف الهوسه الظلت والعروس هم تعبت.. صارت غروب واجه حليم.. راد ياخذ نسوان اخوتي لاهلهن چي حنه الولد يمهم... عاد هو خابر مجيد واجتنه سيارتين كلنه رحنه.. ماظل احد بالبيت بس امي ومجيده وبناتهه...
وصلنه يم بيت عمي ومسوين كعده وكراسي بره.. والنسوان جوه..
سلمنه ع مرت عمي وع چنتهه الهي ام الولد... ظليت افتر وياهن بس مليت وطكت روحي وضجت.. كلت هسه انه شجابني.. والله ماكو شويه وصارت حفلتهم تخبل.. الهلالهل والركص بالشارع زلم تركص والرمي صار ماله والي.. بعدين كالو شيخ منصور يكول اذا واحد رماله طلقه اخلي التفكه بعزه.. هههههه ابوي يسويهه...
ردينه انه وفليحة كلش متأخر.. بس مليحة ظلت يم اهلهه.. لكيت امي نايمه
انه هم صعدت غرفتي وذبيت روحي من التعب بعد مادريت...
كعدت الصبح تريكنه وامي كالت بساعج اهتمي نروح لمجيده..
كملت بسرعه ورحنالهه...
نظفنه البيت وياهه وسبحنه العروس وولمنه جنطهه وغراضهه.. تغدينه ونوب رحنه للصالون.. ظلت غاده هي تطلب التريده وطلعت تخبل.. امهه چنهه ماراضيه عليهه چي هي طلبت المكياج وتسريحه ع ذوقهه..
بس هي مدللة ومن الولايه وبت الولايه..شافت الناس شتلبس وشتخلي..
كملنه واجه ابو غاده اخذنه... كعدنه العروس شوي ترتاح وسويت الهه لفه اكتلهه بس تروح غاد بعد ماتاكل...
احنه هم ع واهس اكلنه تجواعه مال وره الغده.. والله شويه وخابرو كالو جايين.. احنه بسرعه بسرعه لملمنه وكعدنه العروس بمكانهه وعطرنه البيت
اجو وصوت الهلالهل ترس اذني والبيت انترس وادم كام يغص ويبلع
نوب بيهم ظلو برا وحركو الجو حرك بالرمي... والله لو يدري بيهم ابوي هههه... كومو العروس واخذهه رجلهه والناس كامت تطلع وراهم انه ظليت اولم بالجنط مالاتهه.. شو شويه وماظل نفر يمي بلبيت.. طلعت بلباب.. اعاين لا امي ولا نسوان اخوتي وولا مجيده! مدري وين تبخرن...
شفت من كرايبنه واستحيت اصعد وياهم.. احسهم غربه استحي منهم..
رديت سديت الباب وكعدت.. نوب من الحركه طلع جدر المرك واكل وابچي.. خره بحظج حته بهاي نسوج!
صارت غروب ومحد فگدني ودره بيه.. اختنكت خنك نوب اسمع صوت الجامع كام يقره قران وانه وحدي.. ظليت افتر بلبيت.. نوب طبيت للغرف والحمد لله مدري شعجب حظي كعد.. شفت تلفون بغرفه ولد مجيده..
كبل ركضت علي.. طلعت الاسماء ودكيت ع مجيد مكتوب (خالي مجيد)
مره مرتين ماجاوبني.. انه كلش اعتكفت.. ضجت من حظي المصخم...
والله دكيت مره ثالثه وجان يرد..
مجيد:خايب وين انته! شبيك ثبرتني كلساع ادك!
-خويه انه حليمه! خوي انه ابيت مجيده.. ويمي غراض العروس..
مجيد وكوه اسمع من الهوسه يمه:ياول ثول! يله جايج
شويه واسىع صوت الهورنات بالباب.. طلعت واسحول بروحي والجنذ وياي.. عاوني عليهن مجيد...وظل يدرم علينه جي وحدي ههه...
حرك السياره وظلينه نسولف ع الخرفان الذبحوهه وع الناس الاجتهم...
وصلنه كريب من بيت عمي.. شفت الهوسه والزلم تارسه الشارع ومصيف هم متروس... انه كاعده ليوره ومنزله الجامه للنص ماطالع بس عيوني.. دورات اعاين ودورات استحي انزل راسي..
بعدين كلت عليمن هي دنيه ليل ياهو اليشوفني خل اعاين.. رفعت راسي واجت عيني بعيون مو غريبه عليه.. دوره الوجه هم شايفتهه هاي.. السكسوكه.. الدشداشه البيضه الترفرف.. طرفت عيني لايده.. شفته شايل رشاشه بيد وحده ويرمي طلقه وره الثانيه..بعدين نزل ايده وناوشو شاجور اخذه منهم وحطه بالرشاشه بسرعه... جان يباوعلي.. اي متاكده منه يباوعلي وضحك من شافني.. من حط الشاجور وسحب اقسام ظل يرمي هل مره خرط جره وحده.. انه وي صوت الطلق احس كلبي ينتفخ ويرجع يفش هههه
وصلنه يم باب بيت عمي ووكفت السياره وانه صافنه علي بعدني.. حته مجيد مدري شحجه ماسمعته.. نزلت وشفت ابوي واكف بصفه.. نزلت راسي ومشيت ومجيد يصيح بساعج بساعج الزلم كلهه شافتج فضحتينه!
انه كبل لا اطب باب البيت ردتلي حجه حته التفت.. حته اشوفن اخر نظره
التفتت وهم اجت عينه بعيني چنه چان متاني ادير وجهي علي..
-مجيد خويه الجنط والغراض!
مجيدصاح بيه:طبي فضحتينه انه انزلهن!
يتبع...
