بنت الشيخ

الجزء السادس

#بنت_الشيخ

الجزء السادس

Nada hs(ندى ح.س)

وظلت سميره ع هل حال ايام... يوميه كل ما يصيرلهه مجال وحدهه لو بس انه وياهه تبچي ...حته حليبهه نشف... گمنه نرضع حموزه حليب قواطي وامي متسودنه تگول مزين علي... رادت تخلي يرضع وي منصور وشريفه بت مجيد بس سميره مارضت... وظل يشرب قواطي... وامه يوم عن يوم تييبس... كسرت گلبي عليهه كلش ورجلهه معاند مايدري شصفه بيهه.. وحته بيتهم كالو فارغ محد يطب ولاحد يطلع منه... انه وسميره كلنه ماكو غيرهه اكيد راح لبيت اهله... نوب هي منا تبچي ع رائد ومنا تحرگ بروحهه ع فروخهه الظلو غاد...
كل مره وكالت انه ليش عفتهم انه شجاني وطلعت من البيت انه چنت مو بوعيي من طلعت....
انه كلش انقهرت عليهه ..جريت تلفونهه من غرفة امي بغير ماتدري واخذته لغرفتي ورحت....
طلعت اسم رائد ...دگيت وانه ميته من الخوف وگلبي يرجف...
ماجاوب...مره ومرتين ماجاوبني... اخر شي كتبت رساله كوه دبرتهه(مرتك جابت تعال شوفهه...انه حليمه)
وره شويه رجع دگ التلفون... بلعت ريگ وصفنت ع الكاشي حته ارتب حچي واگدر اجاوب...
رائد:الو.؟؟ حليمه؟ شلونج؟ سميره شلونها؟
-انه زينه وسميره هم زينه.. خطيه راح تموت تعال شوف ابنكم وشوفهه...
رائد:ياعيني والله طلعت روحي..حليمه انتي متدرين بسميره شگد غلطت ويايه وسامحتها... بس اخر فترة صارت متنطاق! يعني اني هم حقي عليها تحترمني وتهتم بيه..مو من احاچيها اطلعلي لسانها شطوله! حليمه تسمعيني؟
-اي وياك... بس هي هم چانت حبله وتدري تصير الحبله عصبيه تحملهه واكسر الزعل بينكم... والله تكسر الگلب..
رائد:لو اني الغلطان اجيها واني الممنون! بس مو هي الغلطانه وطالعه من البيت بدون متگولي وتريد اجيها؟ زين هي الي گلتلج تخابريني؟
-لالا والله موهي...اصلا ماتدري انه اخذت تلفونهه بالبوگه...
رائد:حليمه علميها وگوليلها تحترمني! اني مو يوميه ضامن اعصابي وياهه! حتى اهلي صارو يعيروني بيها! واني مااريد هذا الشي... حاربت الدنيا كلها علمودها تالي هيچ تكسرني وتطلع ماادري بيهه؟!
-لا اتسرع.. والله هي گلبهه ابيض وتبچي دم ع طلعتهه..هي تندمت وماتگدر ترجعلك وحدهه...
رائد:اي اعرف..اكيد ابوچ يمنعهه... انتي علميها واني شغله ايام يله اجيها..حتى تحس ع نفسها ومتعيد خطأها!
-خطيه والله اخاف عليهه! تعاللهه اليوم...
رائد:ماگدر اليوم...
-الفروخ شلونهم؟
رائد:زينين... بس زينب طلعت روحي ع امهه...
-اي دكسر الشيطان وردو مثل ماچنتو؟!
رائد:الله كريم الله كريم حليمه.. لاتنسين علميها ووصيها ماترفع صوتهه عليه مره ثانيه... وهسه اني اروح عندي شغل..
-اي ان شاء الله... الله وياك...لاطول عليهه!
رائد:ماشي..مع السلامه...

من سديت الخط متت من الخوف.. گلت هسه انه شورطني وخابرت... خاف نوب يسولف لابوي من يجي ويطيحون حظي.. عمه انوب انه ماوصيته مايگول لاحد انه خابرته! ظليت اهم بهاي السالفه... مسحت الرساله ومسحت الاتصال ورديت التلفون لمكانه... تغدينه وغسلنه مواعين وصار البيت واق ويق من الفروخ والرضعان... انه صعدت عدي كلش وردت اتعارك وياهن مدري شلون كضيت روحي.. انه مايكتلني بس فليحة ومليحة.. هسه عدچن غرف وانگلعن بيهه! تغديتن وشبعتن المن تفترن يمي..
للظهر يله صعدن وصار البيت هدوء..
طبيت لغرفة امي... شفت سميره گاعده ع حيلهه وصافنه.. امي نايمه وحته بنومتهه مخنزره وطابگه حواجبهه ومغطايه بعباتهه... وابن سميره بكاروكه ونايم...
-ها شو صافنه؟
سميره:ها.. مدري ..
-تعاي وياي اريد احاچيچ..
لحگتني للمطبخ .. حميت الچاي وصبيت وطلعت كعك وهي سميره تريد تعرف شكو وبس تسأل...
-اشربي چايچ..
سميره:خوفتيني شبيچ؟
-مابيه.. اريد اسولف وياچ.. سكتت شويه وبعدين كملت.. انتي تحبينه رائد؟
سميره:اموتن علي.. انه مو بس احبه انه اعشگه!
ضربت ع فخذهه بخفه وگلت:اششش لا يسمعونج!.. بس انتي صوج منج.. ليش طلعتي وماگلتيله!؟
سميره:ولج غير هو غلط عليه؟ چا تردين اظل واصير مدگه وانه بت منصور!
-حته لو.. الزلمه يغلط ويطگ! مو عجبه! هسه مو هل فلحة وملحة يكتلونهن ويغلطون عليهن وگدامنه بس مايطلعن!
سميره:حته لو... انه مو مثلهن.. انه ماحد صاح عليه من اهلي يجي رائد يصيح عليه!
-والله خبلتيني انتي تحبينه يو لا؟!!!
سميره:احبه بس ماارضه يصيح عليه ولا يغلط.. انه مو خدامه ولا اشتغل عده! انه بت شيخ!
-خايبه كون اكضج اطيح حظج هسه! شگد خشمچ يابس ومطلعه روحه! شويه فكي من عصبيتج ولا تصيحين بوجهه ولاتردين... ماتذكرين امي من يعاركهه ابوي ويظل يصيح ويغلط! هي تسكت وماتحاچي لحد مايتهده وبعدين يردون چن كل شي ماكو!
سميره دنگت وگالت:اي..
-صيري مثل امي.. لا تحاچينه... وانه متأكده لو ما انتي مايصيح عليچ.. لازم ادوسين ابطنه ويصيح عليچ!
سميره اعترفت ع روحهه وظلت مدنگه وانه احچي واعلم بيهه.. هذا كله من دلال ابوي ...نوب من اجت زعلانه محد حچه عليهه كلهه صارت وياهه وطلعو عينهه بالزايد...
المهم يومين احنه ع نفس الحال...سميره مرمرتني بدموعهه وخاصه من تگابل وليدهه... واخذوهه عصريه للدكتوره فتحت خيوطهه وردت... خو من ردت منتهيهه كلش... حته نفسهه گوه يطلع منهه...
بليل اجو خطار لابوي مثل كل مرة...وبدت سالفه الچايات والگهوه والمايات...طاحت رجليه من الخدمه... وره شوي هم اندگ الباب .. بالصدفه شفت رائد طب ويا ابو واخو ووياهم مره توجهت عليه انه بالمطبخ...
من گربت مني المره عرفتهه هاي ام رائد...
حاببتهه(باوستهه) وسلمت عليهه وطببته جوه بالهول... امي هم سلمت وگعدت ونوب صحت انه لسميره وهي من سمعت بيهم جايين فرحت وانخطف لونهه وانصدفت خطيه هههه... انه رجعت للمطبخ اسوي چايات ووديتهن بيد زيدون...واخذت صينيه لعمه سميره...
راح اختصر الاحداث مال جيتهم...ظلت عمة سميره تقنع وتحچي هواي وطلعت سوالف سميره وي الولد ...خطيه طلع مبزعته اخر مده وكوه متحملهه ... امي مااطت حچايه من يمهه گالت انه موبكيفي بكيف ابوهه... والله شويه واجه ابوي يمنه متنگ گوه يحچي ...رزل ام رائد وطلع الصوج بيهم وهددهم اذا ترجع مره ثانيه زعلانه... همه الناس لوما اوادم مايحملون لا سميره ولا حچي ابوي... المهم ابوي رضه ترد وانه بسرعه بسرعه ولمت غراضهه وملابسهه وملابس حموزه ابنهه... وهي دايخه خطيه تروح منا وترد منا خاف ناسيه شي... نسوان اخوتي انغثن كلش من سميره...رادن بلكت صدگ ابوي يطلگهه...
وراحت سميره وردت لبيتهه...وفرغ مكانهه... كلش اختنگت من راحت وعوزي شويه وابجي...
صعدت الغرفه وانه اباوع ع مكانهه الچانت تنام بي گبل لاتجيب واتذكر سوالفنه تالي الليل لو من نشوف تلفزيون سويه ... سوتلي واهس بكل شي من اجتنه لحد ماراحت...التهيت وياهه هواي ونسيت روحي ونسيت همي الابچي دوم منه...
بس هسه رديت وحيده... لا حس ينسمع يمي بالغرفه ولا اذن تسمع الاگوله... ذبيت روحي ع فراشي ونمت... چنت تعبانه بيومهه وماطولت هواي ولاسهرت...
مرت ايام وكله ع وضعه...رديت لنفس الضوجة ولنفس السكته.. سميره اخيتي الزغيرونه راحت وظليت محد بحالي... من اشتغل لو امسح لو اكنس لو اغسل مواعين...گلت بيني وبين روحي انه اذا كبرت وماتو امي وابوي اروحن يم سميره...هي الوحيده التحن عليه وانه وياهه گلب واحد...
طبعا ابوي من يوم الراحت سميره متنگ كلش حته مايسولف مثل الايام الچانت بيهه سميره يمنه...
المهم وره اسبوعين من ردت سميره...چنت العصر اكشر بتيته اشتهيت اسويهه ع العشه اليه ... ولن طبت سميره وعمتهه... انه انخمش گلبي من شفت سميره...خفت لا هم زعلانه... بس من شفتهه تضحك لا شويه ارتاحيت.. سلمن عليه وطببتهن ع امي وهم سويت الچاي والماي وديته الهن... ونزلن نسوان اخوتي گعدن يمهن انه سحبت روحي للمطبخ شلت البتيته والكشور بالكاع ورديت يمهن...
اباوع ع سميره بس مگابلتني وتضحك... وعمتهه نظراتهه اليه مو مثل كل مره من تباوعلي ...هلمره تباوعلي حيل واترس بيه من فوگ ليجوه...التفتت لامي هم نفس النظره... يابه شكو ؟ مافتهمت ظليت مثل الاطرش بلزفه.. لحد ما گالت عمه سميره..
ام رائد:والله ياام مجيد...بنتچ عين الله عليهه... ورائد هو كفيلهه.. الولد رايدهه وشاريهه...
امي:خيه چا انه موبيدي...الشور بيد ابوهه...وانتي تدرين بيه انه ماادخل بهيچ سوالف...
ام رائد:اي ادري خيه..بس لازم نشوف البنيه اول والولد هم يريد يشوفهه...
امي گبت:شنهيييي ايشوفههه؟! لا خيه لا... عيب احنه بناتنه محد يشوفهن بس رجولتهن وبيوم عرسهن...
ام رائد:هسه الله كريم ...احنه ناخذ موافقه الشيخ ابو مجيد وهاي الامور نتفق عليهه بعدين..
انه اسمع واحس خدودي گبت نار...بس سمعت طاري عرس وخطبه مدري شصار بيه... لوما العيبه چا طفرت ع ام رائد احب راسهه...ظلن نوب  يسولفن بهواي شغلات.. ع بيت رائد وع اخوة رائد نوب ع الشغل والزلم .. انه فاصله الفيشه من يمهن واتخيل خطيبي حبيبي ههههه مادري ليش كل ما اغمض عيني واحاول اتخيله يجي ابالي هذا الشفته بالعزيمه... الي لهسه مااعرفه هو عناد الشيخ نفسه لو غيره...
ردن النوب يسولفن بالعرس والخطبه وانه لهسه مااعرف ياهو الرايدني...استحيت اسأل كدام ام رائد وانه من گاعده بنصهن سويت روحي ماادري عليمن السالفه هههههه...
راحت سميره وعمتهه وانه متانيه شوكت تجي امي وتحاچيني...
شو امي غلست ...تعشينه وغسلنه المواعين ونظفنه وامي سكته..
نوب التمينه احنه النسوان بغرفة امي...
فليحة:اكلج عمه... چا شو ماگلتي لعمي ع خطبه؟
امي باوعتلي وردت باوعت لفليحة وحچت بمغثه:اي.. باچر اگله..
-اكلج يمه؟ هو ياهو هذا ومنين؟
امي خزرتني وعوجت حواجبهه حيل:اثگلي شويه!
مليحة:لا عمه خطيه غير تريد تعرف هم حگهه؟!
فليحة:خيه اجوج خطابه من گرايب رائد...يصيرابن عمة رائد
انه دنگت ورديت گلت:وشكبره هذا؟
امي صاحت:زايحتهه كلش! لا حيه ولامستحه؟!
فليحة:عمه شني سالفتچ؟ چا كون هسه انتي مكيفه اجوهه ناس ومدني (ابن المدينه)ومثقف ودارس! وين تلگه احسن منه بعد؟!
يمه انه اسمع فليحة من تگول مثقف ودارس احس جسمي باد وكل حيلي راح....
مليحة:حلومه... عمره 32 سنه... موظف وعده خير من الله...
امي:ياخير هذه؟ گاعد وي اهله..لا بيت ولاسبيت!
مليحة:عمه چا وشني؟ هسه احنه مو هل عدنه خير من الله وكلنه ابيت واحد؟
امي:انتي تجيبين ذولاك علينه؟ احنه بيت الشيخ منصور زين الزلم تجيبينه يم ذول الكرخنچيه!(هي استهانه بس مااعرف شنو معناهه😂)
انه شفت امي مدري شلونهه وكلش متعصبه ع سالفه الخطابه.. نوب نسوان اخوتي بدن ياخذن ويطن وياهه وشويه هدت...
العرفته من خلال السوالف انه موظف ومكمل كل شي عوزه بس المره بس ماسألت ليش لهسه مامتزوج.... وره ايام يله عرفت چان خاطب گبلي ومبطل من خطيبته بعدين بسبب مشاكل بينهم..
انه مااهتميت وكلت شعليه مدام هو رايدني ومودي مرت خاله علينه هاي هي...
اجتنه سميره وره يومين هي ورجلهه... وگعدت عادي يم اهلي واخوتي وامي... واول ماظلينه وحدنه جرتني گالبت تعاي ولج بسرعه... ركضنه لغرفتي... انه ميته من الخوف عبالي خبر موزين ع خطيبي هههه... فتحت سميره جنطتهه وطلعت منهه صوره معقچه وظلت تعدل بيهه لحد ما صارت شوي عدله اطتنياهه...
باوعت بيهه اجت عيني لرائد اول شي..نوب انتبهت واحد بصفه يبوووووي... يموع يكتل يكهرب هههه...  انه راح من بالي ياسر ابن عمة رائد وراح من بالي سالفه الخطبه...صورة الشفته دوختني هههه...
-ولج سمره! هذا ياهو؟
سميره:ولج هذا اليريد يخطبج! شبيچ ثوليتي خيه؟
-ههههه صدگ تحچين؟ لا هذا مقلب!
سميره:ولج والله هذا ياسر واحنه اجينه حته نشوفج اياه واريد صوره الج حته لو جنسيتج هم يريد يشوفج هو!
-ولج شلون هيچ تگولين؟ شني يشوفني؟
سميره:معليچ هذا حقكم انتم اثنينكم.. بس اهلي مايعرفون بهيچ امور .. بعدين انتي بس صوره الجنسيه وهم قديمه وهم محجبه بيهه يعني موحرام ولاعيب؟!
-مدري ولچ اخافن؟
سميره:تحركي ولج بسرعه لايجن ذن المفضوحات ويسولفن لامي!
ركضت ع كنتوري وانه ناسيه عدي صوره ماخذتهه اول ماشلنه للمدينه وبهذا بيتنه ...اخذلنه زيدون كلنه صور...كل واحد وحده ونوب جماعيه... طلعتهه واطيتهه لسميره بسرعه...
-اكلج سمره؟ ماتخلين هاي الصوره يمي؟
سميره:ميخالف...وهو اصلا مايدري ..هاي خطتي انه ورائد ههه
-فدوة لهيچ اخت...انه وين الگه مثلج!
طلعنه من غرفتنه انه وسميره مثل الحراميه طبعا بعد ماضميت صوره الچبد مالي جوه المخده ههههه...
نزلنه جوه وتصرفنه چن كل شي مامسوين... تعشو يمنه سميره ورجلهه وراحو... انه بكل خطوه ماانسه صوره الفلك ياسر... يمه دهر... صدگ لو گالو اصبر تنول ههههه... اريد بس اخلص شغلي حته اروح اشوف الصوره زين... انه شفتهه بس احس عيوني ماشبعت شوف وماركزت بس ع وجه ولا شفت شلابس بالصوره ولا شفت جسمه زين ...
كملت غسل مواعين وفلحة وملحة ظلن ينظفن جوه ...انه ظليت افتر لحد ماطشت الوادم كلمن بغرفته وطشت الخطاطير مال اخوتي وكلمن صعد لمرته... انه صعدت وامشي ع الدرج خطوات ذايبه مال وحده عاشگه الهه عشر سنين مو چنهه اليوم شافت الرايدهه ههههه... وصلت غرفتي سديت الباب وگفت گبال چربايتي.. اباوع ع المخده مثل الثوله.. چن جسمي مايطاوعني اشيل المخده واطلع الجواهه... چن مستحيه عبالك هو صدگ موجود جوه المخده... چي من شفته اول مره سميره چانت يمي هسه انه وحدي😂 المهم گوه تحركت وطلعت الصوره... گعدت ع الچربايه وكل حسره ونفس اجره وانه اباوع بالصوره ياخذ حيلي كله ... ليلي كله مانمته بذيچ الليله... غفيت والصوره بحضني .. ظليت اتحلم بشكل ياسر واشوفه خطف بالحلم بس ماشفت حلم كامل يعني... لو يخطف مني لو اشوف بس وجهه ويروح النوب.... گعدت الصبح كل الحيل بيه ...ماخليت البيت كله جلفته جلف الملابس كلهه غسلتهه الفراشات كلهه شريتهه ونص غسلتهه يعني طلعت شغل من جوه الگاع... حته امي كالت عوفوهه اجتهه الحاله هههههه.... هو صدك انه من كبل تجيني الحاله اذا نظفت افقد وانسه روحي ههه... بس هلمره لا تختلف...بيهه واهس وبيهه حب بگلبي وبيهه فرحه وعرس وبدله ورجل مثل كل النسوان حسيت بيهه انه صدگ مره والناس مانستني وانه مابيه نقص..
كل هذه چان يدور بعگلي وانه طايره واشتغل وحته انتبهت ع روحي ابتسم ومادري 😂😂😂

يتبع...