#بنت_الشيخ
الجزء السابع عشر
Nada hs
چنت مثل كل يوميه.. اكعد الصبح اتريك وارضع امنه واخليهه تلعب وانه اروحن اشتغل.. لحد ماتتعب امنه احطهه بحضني واظلن الوليها وانومهه..
بيومهه انه بلشت شغلي مثل كل يوم وچان يوم جمعه.. عناد طالع مو بلبيت واخوته هم طالعين.. بس احنه النسوان بالبيت... مخليه امونه بالغرفه وفاتحه الباب.. وانه چنت انظف بالحمام.. سمعت صوت امونه بچت.. بس مو بچيه قويه.. هيچ مثل الواحد متاضيگ..مديت راسي شفت فاطمه نزلت من فوك..
-فطيمه.. فدوه لكلبج شوفي اخيتج..
هي باوعتلي صفح وهزت راسهه ايي..
ظليت انه انظف وماخذه راحتي ماسمعت صوت امونه بعد.. نوب رحت للمطبخ هم غسلت مميات امونه وطلعت للحوش مديت الصونده وبلشت اغسل بي.. وصلت للنص كلت خل اروحن اشوف امونه.. خاف نامت..
رحت للغرفه لكيت الباب مسدود.. فتحته ماكو فاطمه..باوعت ع امنه بكاروكهه من بعيد.. چان ظهرهه منه الي ووجهه دايرته.. باوعت شو احسهه ماتتحرك.. كلت شبيهه هيچ نايمه ذابه روحه... گربت اكثر.. حركت ايدهه عود ردت اديرنهه واخليهه تنام ع ظهرهه.. شو ايدهه مثل الخشبه اجت بيدي... هنا گلبي انقبض.. عاينت لوجهه ..الحلگ ازرك صاير وباقي وجهه اصفر.. هزيتهه مثل الخشبه صايره..كمت بلاوعي اصيحن ولج يمه امونه شبيج وج يمه اكعدي اكعدي! امنه ماكو.. لانفس ولا حركه... صرخت كل صوتي ولج عمه الحكيلي....
اجني عمتي ومرت حماي .. انه بعدني مامصدكه الاشوفنه! امونه شبيهه ماريد اكول ماتت.. ماريد افكر بهل شي.. ردت تجي عمتي وتسويلهه شي ع عرفتهه وتكعدهه.. اجت عمتي وانه اهزن بامنه بحضني واضرب ع وجهه يمه اكعدي يمه اكعدي ماكو.. عمتي جرتهه من ايدي ومااذكر شحجت وشكالت ... ظلت تسمع نفسهه ونوب ترد اطكهه.. نوب مرت حماي هم كلبتهه.. عاطن عمتي ومرت حماي... انه فاقده احس اليصير هذا مو صدك يمكن كابوس... شويه صفنت وشفت اليصير.. عمتي ادك ع وحهه وتكول شكولن لعناد! بيا وجه احاجي.. ومرت حماي لفت امنه بفراشهه ودموعه تصب صب.. طحت من طولي ع ركبي.. احس الدنيه افترت بيه وشمرتني شمر من مكان عالي.. بتي العفتهه مثل الورده شني الجرالهه وماتت! ما شبعت من ريحتهه! ماصار عمرهه 3 اشهر...انه بحلم لو علم!
دكيت ولطمت ملخت روحي.. شفت نسوان تروش بالبيت بس بالي مويمهن.. ولاادري ياهن... ردت عناد يجي واكله ع الصار بينه...
شويه وطب عناد عليه.. انه بعدني كاعده وادكن ع روحي... امونه اخذتهه مني مرت حماي وماشفتهه بعد... اجه عناد يمي ووخرن من يمي امه ومره وياهه.. كض راسي بيد وحده وضماني لصدره.. صرخت صرخات يمه واكله بنيتي ماتت.. بنيتي راحت وماشبعت منهه.. ماسمعت كلمه يمه الاتحسر عليهه مالحكت اوكلهه ماسمعتهه تتاغيلي ... اعاين ع كاروكهه وانتهي... احس روحي انشلعت مني.. مااكو اصعب من فگد الضنه.. احس كلبي ورم من الغيض...
عناد اشر لامه والمره طلعن من الغرفه وسدن الباب.. تعجبت ع القوه العده.. اشوفن حزن بعيونه وبنفس الوكت يريدني اهده..
عناد ضماني اله حيل وكال بصوت حزين وهادي:كولي حليمه شنهو الصار؟
جاوبت وانه اصرخ:مادري مادري...
بعدين سولفتله شلون رحت اشتغل وجنت انظف ونوب رديت لكيتهه ع حالهه.. متت اريد افتهم الصار شني.. بتي لا مريضه ولابيهه شي..
عناد حب ع راسي وكال:البگه براسچ .. شدي حيلچ هذا امر الله.. هسه هي طير بالجنه..
طلع مني عناد وماستوعبه اليكوله.. چا بس انه هيچ حظي؟ ماصدكت ع الله اصير عدي ضنه ..اسهر علي واتعب وكعد الصبح اضحك من اشوفنه يمي واشيلهه وتترس حضيني... مدري شلون خلص ذاك اليوم.. امي اجتني وابوي هم وياهه... من شفتهم ماردت اظل بالبيت.. عنادهم ماعارض كال خليهه ترتاح چم يوم.. ابوهه استشرع وكالو ماتستحق فاتحه بس سوولهه ثواب بالبيت.. وصدك ذبح هواي ذبايح وكال راح يوزعهه ع الجيران..
رديت لاهلي مثل طير المذبوح... لاني بسمه ولاني بكاع... شسوي ويطب جرحي هل مره.. شلون انساهه شلون انام ليلي وانه تعودت ع السهر وياهه شلون انساهه وحليبي لسه مانشف... امي شلغت قران يمي نوب اهلي كلهم التمو يمي بغرفه امي.. ابوي مكسور خاطره عليه..اخوتي حجو هواي فلان هم مات ابنه وفلانه هم وطير بالجنه وهذا يومهه ووو.. حچي.. كله بعيني بس حچي.. محد يعرف الاحسن بي.. محد يعرف بس الفگدت ضناهه..
ماردت انامن يم امي.. خليتهه وصعدت لغرفتي ماال كبل.. بنات حليم كايمات ينامن بيهه.. طلعتهن وطبيت.. انفجرت بچي.. احس هذا المكان مناسب الي حته ابچي.. بيهه خلصت ايام وليالي وانه ابجي وهسه هم رديت ابجي بعد ما كلت راح اعيشن مثل كل البشر...من كثر مابجيت كعدت الصبح لكيت روحي نايمه بالكاع ع الكاشي.. جسمي مكسر ..صدري مورم روحي طالعه.. بيه خنگه مالها مثيل.. مو مثل كبل.. لا هلمره تكتل هاي الخنگه.. تمنيت ماتزوجت حته مااشوفن هذا اليوم.. صبح علي صبح وامنه مو بحضني.. شلون اصدك جسمهه الزغيرون وجلدهه الناعم يلوحه التراب.. شلون ماتت يربي شلون! وجعهه شي وماتت! كلبت واختنكت؟!
اجتني امي وحجت هواي عن الصبر ومن هذا الحجي.. كالت تعاي انزلي وتريكي هذا امر الله.. رجلج يمج وبيج خير وخلفي... انه بداخلي اكولن ليش هي هيج سهله! انساهه واجيبن غيرهه!
بس الحمد لله الله ماياخذ عزيز اله ويطي بكد معزته صبر.. اول اسبوع انه منتيهيه كلش.. مدري شلون عشت ..حليبي نشف.. وعناد كام يتردد عليه وبيوم صاحولي بالديوانيه هو وابوي...
سلمت وكعدت.. جانو يسولفون بغير سالفه وظلو بيهه بعدين ابوي كال..
ابوي:بويه حليمه.. انتي مؤمنه ومصليه وصايمه.. تعترضين عله امر ربج؟
جاوبت وانه مكسوره ومدنكه كوه احجي:لا بويه حشه..
ابوي:هذا رجلج.. هم فگد بنيته.. بس خوما يتخبل ويكعد يعوف شغله! هاي الدنيه ..كلنه ع هذا الدرب .. انه وامج وانتي وكل الناس! بويه انتي صبوره وفاهمه.. لاادمرين رويحتچ بيدچ.. العمر گدامكم.. وكولي الحمد لله الله اخذهه بهيج عمر حته لاتكبر وتاخذ معزه بگلبج اكثر ..
دنكت وشبه اقتنعت بحچي ابوي.. بس مو هينه والله..
عناد يباوعلي هم بنظره مكسوره وبيهه توسل واسف..
ابوي:تكومين بويه تلمين مليبساتج.. وترحين لبيتچ ورجلج محتاجج وهو صاحب مشاغل.. لا تلهين العالم بحزنج! خلي بگلبج وادعي ربج الصبر الصبر..
عناد:اذا ماتكدر ترجع لذاك البيت اشتريلهه بيت اخر!
ابوي:لا يبن الاصول.. مو شيمتنه! احنه نسوانه كلوبهن جلده وگويات يحملن.. مو بويه؟
-اي بويه..
ابوي:يله كومي بويه.. روحي تولمي وردي لبويتچ...
كمت منهم.. تلكتني امي مولمه جنطتي الجابوهه وياي..طبعا ماخلوني البس سواد واحزن ت بنيتي .. كالولي حرام عليج وتاذينها وتاذين رجلج ويمل منج..
امي:يله يمه.. لبسي عبيتچ وردي لبيتچ.. الله يريح گليبچ..بجاه النبي..
جابتلي مليحة عباتي لبستهه وكعدت ع الكرويته.. شوي وابوي صاح يله بويه حليمه تعاي.. طلعت للحوش امشي وراهم وهمه يسولفون... بعدين تسالمو وابوي وصه عناد عليه.. كله بالك عليهه..
حبيت راسي ابوي وطلعنه.. صعدت بالسياره وانه تعبانه وحزينه.. مكسوره خاطر وفاگده جزء من روحي..
عناد ظل ساكت هم ماحچه شي.. شوي وجر ايدي اله... عصرهه حيل.. حسيت روحي اقوه بعد هاي اللزمه..
عناد:شدي روحچ.. اعرفچ بت منصور گويه ومو سهله تنكسرين..
كلت بصوت مخنوك:الله كريم..
وصلنه للبيت تلكتنه عمتي وحبت ع راسي وواستني.. حمواتي هم جايات..حاببني كلهن وواسني... كعدت شويه يمهن بغرفه الحجيه ..عناد كال تعاي للغرفه.. رحت وراه.. اول ماطبيت حضني حيل... حسيت بصوته نبره مال واحد يريد يبچي.. صارلي بالسنه ويا.. مشافته هيچ مهزوز..
عناد:اشتاگيتلچ ..
حضنته حيل ودموعي صبت :شلون راحت مني؟ انه ليش عفتهه وحدهي؟
خله ايده ع حلكي وكال:اشش.. حرام التگولينه.. هذا اختبار من رب العالمين.. ادعي الله يجبر گلوبنه انه وياچ...
ظليت ابجي ..احس شويه احسن بحضنته ووجوده وياي.. تمدد هو ع الچربايه وفتح ايده الي وكال تعاي يمي.. خليت راسي ع ايده وظل هو يقره ايات ويسولفلي ع صبر ايوب من فگد كل شي.. يمسح ع شعري وانه بحظنه واسمع حچي يريح البال.. انه صح سمعت هل حچي من اهلي. بس من عناد لا يختلف.. احسه يجيب الحچايه ع الجرح.. يعرف شحس .. غفيت ومادريت بروحي.. من ايام وانه تعبانه وعلتي مالهه دوه...
انام اكعد اكوم افكر بيهه...من كعدت مالكيت عناد.. لا كاروك امنه ولا ملابسهه .. كلهن ماكو.. عبالي الكه شي منهن واشمن ريحتهه.. بس اعرف هاي سوالف عناد لازم هو كالهم يشيلونهه.. طلعت من الغرفه اريد اروح لعمتي انشدهه ع غراض امونه.. شفت عناد جاي من المطبخ وهم يريد يطب ع امه.. كال ها؟ كتله عدي شغله وي عمتي.. وصلنه يم باب عمتي.. اسمع صوت فروخ عناد اول شي ماركزت شيحجون...ردت امد ايدي افتح الباب عناد كبل كض ايدي وحط اصبعه ع حلكه اششش...
قباء:ولج ليش موتيه؟ ولج خطيه؟
فاطمه:اكلي خره! تردين تحيب جهال حته بابا يعوفنه كلش؟ انتي ليش مطيه!
احمد:كافي شبيجن !
قباء:اختك موتت امونه.. سمعت صوتهه نحبت وبچت..
فاطمه:اي انه موتتهه! ولوبيدي اموت امهه وياهه.. خنگتهه وخلصت منهه واليحچي ويجيب اسمي يم بابا اخنگه مثل ماخنگتهه! ختولي هي مو اختنه لا تبچون عليهه..
السمعته مثل النتله مال كهرباء قويه سرت بجسمي كله! عاينت لعناد شفت وجهه صار دم.. فتح الباب كل قوته.. فاطمه جانت واكفه متخوصره..وقباء كاعده ع چربايتهه چي هم ينامون يم بيبيتهم...احمد بيده سياره ويلعب بيهه
ظلو صافنين بوجه ابوهم.. انه بذيج اللحظه بودي اكل فاطمه بسنوني.. يعني بشر الحرمني من بتي؟ مو يومهه ولا يمهه الموته! يعني لوما كاتلتهه چا هسه مامريت بكل هذا وبتي بحظني واسمع صوتهه...وانه الچنت اگربهه من اختهه واكولن بلكت تحبهه وتصير الهه سند ادليهه واتعلمهه وياهه.. معقوله البشر هيج يكدر يقسي؟ نوب مو چبيره يربي بكدهه انه كل فكري اللعب .. حته لو احد اذاني مااسوي شي ولا انتقم..
عناد صاح:فاطمه!
هي مشت خطوتين گربت يمه.. رگعها راشدي طاحت للكاع.. من شدة الصوت والضربهه انه وجهي وجعني...
اجو يمهه اخوتهه وخايفين يعاينون ع ابوهم.. انه انفجرت هنا...
-ولج ليش كتلتيهه! مو اختيج هي؟ شسوتلج؟ وشسويتلج انه تردين تموتيني! واخذتي بتي! انتي اخذتي روحي مااخذتي روحهه!
عناد لزمهه من شعرهه وچانت كصيبتهه طويله وناعمه...
عناد:انتي بنيه لو شيطان؟ ولج شلووووون! شنهو هل جرأة! ولج تكتلين روح بريئه!
انه دموعي ظلت تصب.. مااحس اله اجتني دفعه خفيفه من ظهري.. التفتت شفت حماتي الچبيره ووراهه امهه ونوب خواتهه...
جرت فاطمه من ايد ابوهه وصاحت:ليش خويه شبيك وياهه؟ شسوت هل يتيمه واطگهه؟!
عناد:اخذيهه من وجهي.. ماريد اشوفهه.. هاي هي الكتلت اختهه! موبعيده تكتل قباء لو احمد حته تكدر تكتل ابوهه السوت سوايتهه...
ردت علي:ياا.. خويه شتحجي انته؟ هاي وين والكتل وين! منين هل جذب المسفط هذا وخزرتني الي!!!
عناد:سأليهه.. سأليهه وشوفي.. دقيقه ماريدها هنا.. اذا شفتهه طلعت بوجهي اذبحهه قسما بالله!
خله وطلع عناد من غرفه امه وانه امسح بدموعي الماتسكت..خليت وطلعت بس ماشفت عناد وين راح.. طبيت للغرفه مصدومه من كل هذا؟! شلون وليش وشبدر مني حته هيج تسوي وياي؟ معقوله الغيره هيج تسوي؟
ظليت كاعده وابچي.. اسمع صوت حمواتي بالساحه نوب اختفه صوتهن
طبت علي عمتي... كظت ايدي وطبطبت عليهه..
الحجيه:كومي وانفضي روحچ من الحزن! شوفي الشيخ وين؟ لا تخلينه يكره طبة بيته! خابري وكليله يرد ...
-عمه ليش..شلون احنه هيج صار بينه؟
الحجيه اشرت باصبع واحد للسكف ورفعت راسهه:هذا امر الله.. كومي اغسلي ونظفي بيتج وسوي لكمه لرجلج وخابري..
طلعت وسويت مثل ماكالت... غسلت وبدلت وخابرت عناد كتله انه بحاجتك لاتتركني وحيده...ورحت للمطبخ عود اسوي اكل.. اول ماطبيت اجت عيني ع مميه امنه ظاله بالكاونتر محد يدري بيهه.. اختنكت من شفتهه.. كربت واخذتتهه حضنت المميه وصبت دموعي...ظليت صافنه واذكر من چانت ماتشبع مني واسويلهه مميه تشبع وتظل ساكته ومرتاحه... اذكر تالي الليل من اطلع افور الهه ماي وهي بيدي اسويلهه الممه... شنسه وشنسه...
ضميت المميه ع صفحه ... فتحت الثلاجة سلكت بيض وسويت زلاطه .. عناد متعلم ماياكل دهن بليل خاف يصعد ضغطه...
كملت وحضرت كلشي واجه عناد..كتله تريد عشه كال لا ماريد.. خطيه من ضيمه مايشتهي ياكل...كال ماريد شي بس اخلي راسي وانامن..
راح سبح واجه يمي.. تحاضنه اثنينه مكسورين.. اثنينه فاگدين.. هو يمكن مصيبته اكبر .. احسه مختنك.. كوه يحچي.. مانشد ع فاطمه.. بس انه من طلعت ماشفت عماتهه ولا شفتهه هي وقباء.. بس احمد شفته طلع للحمام ورد.. يمكن راحن وي عماتهن... ذيج الليله مانمت.. ظليت افكر شلون كدرت تكتلهه وشلون مدت ايدهه وخنكتهه بيدهه لو بمخده زين شلون حبست نفسهه وشكد ظلت ترافس وهي حدر ايدهه... متت من الفكير.. انه مسويه روحي نايمه وعناد هم احسنه مانايم ويفكر...انه طبقت وصيه ابوي من كال خلي حزنچ بداخلچ ولاتهلين العالم وياچ.. كل وكت ماموجود بي عناد اطلع الممه واظل ابچي احس روحي تنعصر عصر عليهه...
ماريد اطول المأسي عليكم... ظليت ع هل حال ايام واشهر.. كل شهر اكولن بلكت احبل وينترس حضني ويخف همي.. ماكو ماصار عدي..4 اشهر وره موتتهه ماحبلت.. فاطمه ظلت بالشهرين يم عماتهه وبعدين ردنهه.. بس ابوهه مايحاچيهه ابد.. يحضن ذولاك فروخه ويطيهم بس هي ولا يعتبرهه موجوده.. وماتابت .. من تشوفني تظل تخازر بيه.. انه اتحاشه افكر بيهه حته لااسوي بيهه مثل ماسوت ابتي.. مااريد اطيهه اهميه واحاول انسه چي هي عايشه ويانه ولازم احملهه... بس هي حته من ردت.. تاخذلهه يومين يمنه وترد يم عماتهه... اهلي مادرو بسالفه الخنكه..عبالهم بتي وحدهه كلبت واختنكت وماتت...ماردتت اشوه سمعتهه ولو هي چتاله بتي .. بس كلت خاف بعدين تنخطب ويبطلون منهه اذا درو...وانه مريت بهذا الشي واعرف ..عناد خطيه حته ضعف وتغير .. كام يدخن.. يمكن من الهم ابته فاطمه.. احنه واحد واسه الثاني.. بس كل شهر بنفس اليوم الصارت بي اموتن من البجي.. اتخيلهه هي موجوده وهذا الشهر كبرت وزاد وزنهه وصارت احله وبدن يطلعلهه سنون طگ گلبي كلش ومنا ماكو حباله...والله مرن 6 اشهر وبطت عليه الشهريه انه ايست كلت بعد ماكو حباله... وهاي بطت من الحرگه ع بتي والقهر الشفته ... شو بدت تصير عدي مثل اعراض حبالتي بامونه الله يرحمهه.. سولفت لعناد وطار من الفرحه.. جابلي جهاز غريب بلبيت.. اخلي بالادرار تكرمون ويطلع اذا حبله واذا لا... من كملت صحتله.. اجه شافه حضني وكال مبروك رويحتي... دمعت عيوني من الفرح.. واخيرا راح اصير ام.. بس كون ماتصير هم تجربه فاشله مثل خطباتي كبل ولا مثل امومتي بامونه مرت الاشهر وحته ماحسيت بنساوه من فرحتي وبيه مابيه اريد اخلص الايام واجيبن... هلمره كلت خل اسوي سونار وشيطلع خل يطلع.. سويت وطلع ولد ... وهسه احنه متانين شوفه صگر الشيخ عناد 😍 بعد اشهر قليله
هواي صبرت..هواي تانيت وهواي تمنيت.. صح اجني كلهن متأخرت بس ونعم بالله.. ماينسى عبده... اكرمني بزوج يسوه ذولاك الخطبوني كبل.. دين واخلاق وشرف وعفه واحترام ومحبة.. الله اخذ امانه مني وهي امونه ورد اطعمني بكرمه وعطيته بصگر الچان يتمناه عناد...
اهلي فرحو من درو بصگر خاصه ابوي.. اجاني للبيت وحط بيدي فلوس وكال ذبيحتين لصگر من يجي.. انه كلش فشلت ماعدنه هيج تصرف من ابوي بس هذا ابن عناد يصير عزيز هههه...
عناد..شوصفه مااوفي حگه..من فرحته بجيه صگر حته فاطمه سامحهه.. بس گال من يجي صگر مااخليكم بيت واحد..
نعم ..انها عطايا القدر المتأخره... صبرا جميلا والله المستعان...
تمت...
اسفه اذا ضوجتكم بالنشر.. بس تعرفون بدايه دوام وصادف محرم وممفتمهمه شي.. والحمد لله خلصت القصه ع خير وان شاء الله بالعاجل القريب نكتب شي جديد او احتمال ضعيف نكمل حلومه فصل ثاني...
احب اشكر اليعلقون بكل بارت ويصوتون.. واعتذر منهم لان طولت عليهم هوايه... احبكم
اما البقيه الي تشوفون نوروني بتصويتاتكم وتعبيقاتكم الحلوه...
ولنا لقاء يتجدد......🌹
